Romans14
1Gao băh iên, ăn ruôm nêh djhup dư̆r mŏng pơp đăo, ei ru wiêng trôh ta bruă phat dôih grăp pơp mĭn mdê mdê.2Wăt di lăh ju nau nêh hư̆n mau nuih nhăm đăo no di dơi sa djăp mta pơp, ƀê̆ dăh nêh djhup dư̆r čuôm gu sa pai ha.3Nêh sa ei ru mưč nêh so sa, jêh iên nêh so sa ei ru phat dôih nêh sa. Bơ yơng Yang Trôk jêh ruôm nêh hư̆n.4Wơ nêh phat dôih dư̆k mŏng hih nêh dơ dêh me jêng nêh tơm? Nêh hư̆n dŏk mdăh ĕh bông hư̆n jêng yơng băh khua kăn di. Ƀê̆ dăh nêh hư̆n nai jrăng ăn kăn dŏk kjăp, bơ yơng Yang Trôk mau pơp dơi ăn kăn dŏk kjăp.5Wăt di lăh nêh ho kčăh nar tê̆ ta nar sô̆, ƀê̆ dăh nêh dơ dêh mĭn grăp nar jêng nhăp găl. Grăp nau nêh ăn đăo kjăp mŏng pơp mĭn tơm.6Nêh ñôt nar jêng ñôt yơng băh Yang Trôk, nêh sa jêng sa yơng băh Yang Trôk, bơ yơng nêh hư̆n lăh găl Yang Trôk, nêh so sa jêng so sa yơng băh Yang Trôk, nêh hư̆n ăt lăh găl Yang Trôk ya.7Yơng băh so mau ju nau nêh mŏng băn brêh yơng băh băn tơm, jêh iên ăt so mau ju nau nêh khư̆t yơng băh săk tơm.8Bơ yơng wăt di lăh băn brêh, jêng brêh yơng băh Yang Trôk, khă jai băn khư̆t, jêng băn khư̆t yơng băh Yang Trôk. Kơt iên, wăt di lăh băn brêh mdăh wăt di lăh mông băn khư̆t, hư̆n băl băn ăt gŭk mŏng Yang Trôk gu.9Yơng băh pơp ho yơh, Yang Tŏng Tlĕh jêh khư̆t jêh iên wêh dŏk brêh, no di Khua Yang jêng Mtao ta nêh khư̆t, wăt ta nêh brêh.10Bơ me ho, pơp mhŏ me wêh phat dôih ŏh mi me tơm? Mdăh kăn tŏ, pơp mhŏ me mưč mač ŏh mi me tơm? Bơ yơng lĕ mơt băl băn jrăng lăm ƀlang băn tơm ta măt jhưng phat dôih Yang Trôk di.11Bơ yơng pơp čih:“Khua Yang ngơi klăh iêu: ‘Klăh di Ăñ khăng brêh, grăp bôk krŭng jrăng čuôn ta măt Ăñ,jêh iên grăp piêt jrăng têh sơm ta măt Yang Trôk.’”12Hư̆n yơh, grăp nau nêh mŏng băl băn jrăng têh sơm yơng ta bruă băn tơm ta Yang Trôk.13Blăh iên, băl băn ei ru hôm phat dôih ndăng tơm ôh, ƀê̆ dăh ăn mhŏ klăh iêu găl hĭn: ei ru ăn bôk mau păk jŏng mdăh pơp lăm bông ta măt ŏh mi tơm.14Ăñ gư̆t jêh iên ăñ đăo kjăp mŏng Yang Yê-su klăh iêu, hư̆n jêng so mau ju mta pơp yơng băh ĕh tơm jêng ƀơ̆ ñơ̆, băh gu nêh tơm mĭn ta pơp hư̆n jêng ƀơ̆ ñơ̆, hư̆n jêng pơp hư̆n jêng ƀơ̆ ñơ̆ ta nêh hư̆n gu.15Ndă di nêh ŏh mi băn di mau pơp ênguôt yơng băh pơp sông sa, hư̆n jêng ŏh mi so hôm djhuang sak mŏng pơp khăp khơñ ôh. Ei ru yơng băh pơp sông sa băn di lăm rai ŏh mi hư̆n, hư̆n jêng nêh jêh Yang Tŏng Tlĕh khư̆t un ru.16Kơt iên, ei ru ăn pơp nhăp găl ŏh mi di geh ta pơp nai mưč.17Bơ yơng uôn Yang Trôk di so geh mŏng pơp sa mdăh pơp ñêt, ƀê̆ dăh hư̆n jêng pơp geh tŏng jêh iên pơp đăp nang ju băk pơp čhô̆ brơn mŏng Yang Ngăt Găl.18Bơ yơng nêh tơm mhŏ bruă Yang Tŏng Tlĕh hui si truông ho hư̆n găl nuih nhăm Yang Trôk jêh iên mau pơp tŭ ư băh kuôn nêh.19Hư̆n yơh, ăn băl băn tư̆ng juôi đơ pơp lăm găl jêh iên năn pơp dơi tŏng čhôl trôt ndăng găp.20Man lăm rai bruă Yang Trôk di yơng băh pơp sông sa. Wăt di lăh grăp pơp jêng ƀrăh ngôr, ƀê̆ dăh jêng tih ta nêh sa hui si pơp lăm păk bông.21Pơp găl ngăn jêng so sa čĭ mdăh ñêt nơm mdăh mhŏ djăp mta pơp jêng pơp ĕh lăm păk bông ta ŏh mi băn di, mdăh mhŏ tih, mdăh ñjêng djhup dư̆r.22Mŏng ŏh mi mau pơp đăo đô̆ nă, ăn ñôt kjăp mkă hui si băn tơm ta măt Yang Trôk. Găl jôn ngăn ta nêh so čŏng phat dôih săk tơm mŏng pơp băn đăo jêng geh.23Ƀê̆ dăh ju nau nêh jêh nai kčăh dôih ru ndă nêh hư̆n jêh kăn sa jăng jai kăn đing, bơ yơng so ĕh trôh băh pơp đăo. Gao băh iên, đơ bruă so ĕh trôh băh pơp đăo hư̆n jêng pơp tih.
FAR EAST BROADCASTING COMPANY