Romans12
1Kơt iên, wơ ŏh mi, yơng băh pơp đač Yang Trôk di, ăñ dăn čhôl trôt ŏh mi myơr jao ta Yang Trôk săk jăn ŏh mi di klăh di ƀơn pơp mhŏ yang brêh, ƀrăh ngôr, găl nuih Khua Yang, hư̆n jêng pơp kôh mpŭ geh guôp ŏh mi di.2Jêh iên man mhŏ hui nuk ho, ƀê̆ dăh ăn mlih yơng băh pơp mlih mhei mŏng pơp mĭn, no di ŏh mi dơi so klă năn pơp jêng pơp khơñ nhăp găl, găl nuih, jêh iên nư̆m nơn Yang Trôk di.3Bơ yơng mơn băh pơp đač jêh dơi ăn ta ăñ, ăñ dăn ngơi ta grăp nau nêh mŏng mbar ŏh mi ei ru mĭn ta săk tơm gao hĭn ta pơp khăng mĭn, mlih ta iên ăn ksiêm mĭn no di gư̆t răng, klăh di Yang Trôk jêh jao ăn ƀơn năk pơp đăo ta grăp nau nêh.4Bơ yơng klăh di băl băn mau ŏk khăn mŏng ƀơn săk jăn, ƀê̆ dăh lĕ mơt grăp khăn so mau ƀơn ju băk pơp dơi,5ndrơm kơt iên ya, lĕ mơt băl băn jêng ƀơn săk jăn mŏng Yang Tŏng Tlĕh, jêh iên grăp nau nêh jêng grăp khăn ju băk.6Ƀê̆ dăh băn mau grăp pơp ăn gai mdê mdê hui si pơp đač jêh iên dơi ăn ta băn: mau ya pơp dơi ăn ngơi pơp têh luôr, hư̆n ăn ngơi hui si năk pơp đăo;7mau ya nêh nai ăn nă đru bruă, hư̆n ăn sĭt suôr mŏng bruă mhŏ; mau ya nêh nai ăn nă tơ ti lăh, hư̆n ăn sĭt suôr mŏng bruă tơ ti lăh;8mau ya nêh nai ăn nă jôh lih, hư̆n ăn yua mŏng bruă jôh lih, pơp phă gai, ăn lăm ƀlang ta pơp bliêh; pơp nă kĕ kriê, hư̆n ăn mhŏ lĕ nuih nhăm; pơp ăn yơng ta nuih tlŏng đač, hư̆n ăn mhŏ ta pơp čhô̆ brơn.9Pơp khăp so thơp mhŏ jôn, yơng băh đhir ngĭt pơp djŏh, ñăt thêm săk tơm ta pơp găl;10jêng pơp găl guôp tŏng ăn pơp khăp khơñ ndăng găp; tô mô ta ndăng găp mŏng pơp mpŭ;11hư̆n jêng so mhŏ lĭ lŏ mŏng pơp hur har; dôh hôl mŏng nuih nhăm; mhŏ bruă Khua Yang;12čhô̆ brơn mŏng pơp čang mơn; gĭr ăt mŏng pơp knap mñai; prăl kjăp mŏng pơp kuôl dăn;13tăm phă pơp bhơi ta băl đăo ƀrăh; tư̆ng juôi nuih nhăm ruôm năč.14Ăn dăn pơp găl jôn ta băl mhŏ ƀai ta ŏh mi; ăn dăn pơp găl jôn jêh iên ei ru tăm păh;15no di čhô̆ brơn ju băk ta băl čhô̆ brơn; jêh iên ñim ta băl ñim;16jai mau ju băk ƀơn pơp mĭn ăn dăn ndăng găp, so mau pơp mĭn mgao, ƀê̆ dăh tŭ ruôm đơ băl plư̆p mblo. Ei ru ñjêng knhau knang ta săk tơm;17so dơi sŏk pơp djŏh plŏ pơp djŏh ta nai, ăn mhŏ ŏk pơp găl ta măt grăp nau nêh.18Ndă di dơi, u tŭk dơi mau mŏng băn, hư̆n ăn răng kriê pơp guôp găl ta grăp nau nêh;19wơ ŏh mi khăp khơñ, ei ru băn čŏng rŭ nua, ƀê̆ dăh ăn lơi ta pơp hao nuih Yang Trôk di, bơ yơng mau pơp jêh čih: “‘Pơp rŭ nua jêng bruă Ăñ ji; Ăñ jrăng rŭ nua,’ Khua Yang ngơi klăh iên.”20“Ƀê̆ dăh, ndă di băl rŏh ŏh mi di nguôt, ăn ta hên sông.Ndă di băl ĕh hêr dak, ăn ta hên ñêt.Bơ yơng jai mhŏ blăh iên, ŏh mi jrăng ăn nga iñ dư̆m tŏng bôk hên.”21Ei ru lơi pơp brêh băn ĕh gưt mŏng sô̆ pơp ƀai, ƀê̆ dăh ăn băn lăm rai pơp ƀai ta pơp găl.
FAR EAST BROADCASTING COMPANY