Matthew22
1Jêh hư̆n boh pơp ngơi, Yang Yê-su ju dŏ hư̆t tơ ti hên ta pơp hơ hôr, klăh iêu:2“Uôn tŏng trôk dơi tŏng ndrơm klăh di ju nau nêh mtao, mtao hư̆n prăp prê mar tăm sai ta kuôn tlau kăn.3Mtao yua băl dư̆k kăn di sak no di kuôl đơ băl jêh nai ndơm čhưn ta mar tăm sai, ƀê̆ dăh hên so khơñ sak.4Mtao wêh yua băl dư̆k dơ dêh, klăh iêu: ‘Ăn ngơi ta băl jêh ăñ ndơm: “Dlăng ho, ăñ jêh drŏng ru pơp sông sa ăñ ji. Đơ ndrôk jêh iên ndrôk kuôn mă ăñ ji jêh nai mhŏ čĭ, jêh iên djăp pơp jêh prăp prê ru. Ăn sak trôh ta mar hư̆n.”’5Ƀê̆ dăh hên dŏk du bơ yơng so khơñ đing, nêh ho sak ta lŏ kăn, nêh tŏ mĭn ta bruă blơ̆ bro kăn di.6Bơ băl ƀơ ƀă, jai jêh hên ñư̆p băl dư̆k mtao di, jêh pŭ bang jêh iên lăm khư̆t.7Jêh hư̆n, mtao hao nuih, hư̆n yơh jai jêh yua ka han kăn sak, kăn yua hên lăm khư̆t lĕ băl ƀai hư̆n jêh iên jhu uôn ram băl ĕh.8Jêh hư̆n, mtao ngơi ta băl dư̆k kăn di: ‘Wăt di lăh mar tăm sai jêh prăp prê, ƀê̆ dăh đơ băl jêh ndơm hư̆n hên so năng.9Kơt iên, ăn sak trôh grăp truông mbăh, jêh hư̆n ndă pu me tŏng tuôm ta grăp nau nêh, hư̆n ăn ndơm trôh ta mar tăm sai.’10Jêh iên đơ băl dư̆k hư̆n, jai jêh hên sak ta grăp truông sak, hên tŏng ƀư̆n lĕ mơt đơ băl jêh hên tŏng tuôm, wăt djŏh wăt găl, jêh iên jŏng gung jêh bêng yơng băh băl năč sông sa.11Ƀê̆ dăh jai mư̆t no di dlăng lĕ mơt năč gŭk sông sa, mtao so ju nau nêh hư̆n so kăn sŏh kdrăp mar tăm sai.12Mtao ngơi nêh hư̆n: ‘Wơ găp, đô̆ nă me mư̆t mŏng o jai me so mau kdrăp tăm sai?’ Ƀê̆ dăh nêh hư̆n so hôm nă ngơi.13Jêh hư̆n, mtao lăh ta băl dư̆k: ‘Ăn čăp ti jŏng kăn ho jêh iên čĕ kăn mŏng tŭk ngo măng ta ling tŏ, tŭk jrăng mau pơp ôr ñim jêh iên kriêt sêk.’14Bơ yơng ŏk nêh dơi kuôl, ƀê̆ dăh ƀê̆ nêh geh săč.”15Mông hư̆n, jêh du băh iên, đơ băl Pha-ri-si trông čhai mhŏ mnăč no di hên dơi mblơm Khua Yang mŏng pơp ngơi.16Hên yua băl ƀing kna hên, ju băk ta băl pôl Hê-rôt, sak tuôm Khua Yang, hên ngơi: “Wơ khua, băl hi gư̆t ru khua jêng nêh ngĭn ngăn jêh iên ti lăh truông ƀăng Yang Trôk di ta pơp geh tŏng, jêh iên so mau pơp bhŭng nơn mŏng khua yơng ta grăp nau nêh, bơ yơng khua so dlăng môh măt bôk dih nai ôh.17Hư̆n yơh, dăn ăn băl hi gư̆t đô̆ nă khua mĭn? Dơi ya tôh jia ta Sê-sa mdăh so?”18Ƀê̆ dăh yơng băh jêh gư̆t luôr nuih nhăm djŏh hên di, Yang Yê-su ngơi: “Wơ băl pra mhŏ găl, pơp mhŏ pu me lông ăñ?19Ăn ta ăñ dlăng prăk tôh jia.” Hên ndơp ta Khua Yang prăk ju đơ-niê.20Khua Yang ngơi ta hên: “Rup jêh iên năn săk ho jêng nêh tơm di?”21Hên ngơi: “Pơp Sê-sa di!” Mông hư̆n, Khua Yang ngơi ta hên: “Kơt iên, ăn plơ̆ ta Sê-sa năn pơp kăn Sê-sa di, jêh iên plơ̆ ta Yang Trôk năn pơp Yang Trôk di.”22Jai jêh tŏng pơp ngơi hư̆n, hên hơ̆ hă ngăn, jêh hư̆n hên du, ndrŏh Khua Yang ta iên.23Mŏng nar hư̆n ya, đơ băl Sa-đu-sê sak tuôm Khua Yang, bơ yơng hên krĕh ngơi jêng so mau pơp wêh dŏk brêh, hư̆n hên sak lup čêk Khua Yang,24klăh iêu: “Wơ khua, Mô-ih ngơi: ‘Ndă mau nêh khư̆t jai so mau kuôn, ŏh tlơ tlau nêh hư̆n jrăng gŭk ur mi kăn di jêh iên bă kuôn ta nêh mi kăn di.’25Ƀê̆ dăh mŏng băl hi mau pŏh nau ŏh mi tlơ tlau, nêh luôr bôk, jai jêh mau hih nhăk, kăn khư̆t. Jêh iên kăn lơi ur kăn di ta ŏh kăn, jai so mau kuôn.26Nêh tal bar jêh hư̆n nêh tal pei, tăl trôh nêh tal pŏh, ăt klăh iên ya.27Jêh hư̆n trôh kơi dư̆t, nêh u ur hư̆n khư̆t ya.28Kơt iên, mŏng pơp wêh dŏk brêh, de hư̆n jrăng jêng ur ta nêh tơm mŏng pŏh nau ŏh mi hư̆n? Bơ yơng lĕ mơt hên jêh gŭk de.”29Ƀê̆ dăh jai boh pơp hư̆n, Yang Yê-su ngơi ta hên: “Pu me jêh čhuai ru, bơ yơng so gư̆t Ră Ƀrăh wăt pơp myang Yang Trôk di.30Bơ yơng mŏng pơp wêh dŏk brêh, kuôn nêh so hôm tăm sai mdăh sak gŭk sai, ƀê̆ dăh hên jrăng ñjêng klăh di băl myang tŏng trôk.31Ƀê̆ dăh yơng ta pơp wêh dŏk brêh băl khư̆t di, pu me ñăm tuôm dlăng pơp ngơi jêh Yang Trôk ngơi ta pu me, klăh iêu:32‘Ăñ jêng Yang Trôk kăn A-bra-ham, Yang Trôk kăn I-săk jêh iên Yang Trôk kăn Ya-kôp di’? Yang Trôk so geh jêng băl khư̆t di, ƀê̆ dăh jêng băl brêh di.”33Jai tŏng klăh iên, uôn lan dlăng ndrơh ngăn yơng ta pơp tơ ti lăh Yang di.34Bơ băl pôl Pha-ri-si, jai jêh hên tŏng ru Khua Yang jêh mhŏ ta băl Sa-đu-sê dăl dơk, hư̆n hên tŏng ƀư̆n ndăng hên.35Ju nau nêh mŏng băl hên, jêng khua pơp bhiên, kăn lup čêk no di lông Khua Yang —36“Wơ khua, năn pơp bhiên ram hĭn mŏng grăp pơp bhiên?”37Jêh hư̆n Khua Yang ngơi ta kăn: “‘Ăn khăp Yang, jêng Yang Trôk kuôn di, ta lĕ mơt nuih nhăm kuôn, wăt ta lĕ ngăt nhuôl kuôn jêh iên lĕ mơt pơp gư̆t mĭn kuôn di.’38Hư̆n jêng pơp bhiên ram jêh iên yuôm bhăn hĭn.39Bơ pơp bhiên tal bar ndrơm pơp hư̆n ya — ‘Ăn khăp khơñ nêh kiêu ma kuôn di klăh di săk jăn kuôn tơm.’40Lĕ mơt pơp bhiên jêh iên pơp têh luôr dơi knang băh bar pơp bhiên ho.”41Mông hư̆n, jai jêh băl Pha-ri-si dơi tŏng ƀư̆n ju băk, Yang Yê-su lup hên,42klăh iêu: “Đô̆ nă pu me mĭn yơng ta Yang Tŏng Tlĕh? Khua Yang jêng kuôn nêh tơm di?” Hên têh ta Khua Yang: “Kuôn mtao Đa-wit di.”43Khua Yang ngơi ta hên: “Kơt iên đô̆ nă mhŏ ta Đa-wit, mŏng Yang Ngăt Găl, kăn kuôl Khua Yang jêng Yang Trôk, jai ngơi:44‘Yang ngơi ta Yang ăñ:“Ăn gŭk ta đăh ma Ăñ,tăl trôh ta mông Ăñ ăn grăp băl rŏh kuôn di ta jŏng kuôn”’?45Kơt iên ndă Đa-wit kuôl Khua Yang jêng ‘Yang,’ hư̆n đô̆ nă Khua Yang dơi ñjêng kuôn mtao hư̆n?”46So mau nêh dơi plơ̆ lăh ta Khua Yang ƀơn pơp ngơi, ăt so mau nêh ya năñ lup čêk Khua Yang dŏng băh nar hư̆n.
FAR EAST BROADCASTING COMPANY