Mark8
1Mŏng grăp nar hư̆n, wêh mau ju pôl uôn lan ŏk ngăn, jêh iên so mau ju mta pơp no di sa, jai jêh kuôl băl ƀing kna Yang di, Khua Yang ngơi ta hên:2“Ăñ tŏng đač ta pôl uôn lan ho, bơ yơng hên gŭk răn băk ăñ trôh ta pei nar ho ru ƀê̆ dăh ñăm mau ju mta pơp no di sa.3Ndă ăñ yua hên du ta hih hên ta ndư̆l nguôt, hư̆n hên jrăng wiên mŏng nuông truông, jêh iên ƀơ ƀă nêh mŏng hên trôh băh tŭk wăč ngăn.”4Băl ƀing kna Yang di ngơi ta Khua Yang klăh iêu: “Nêh tơm mau ta o, mŏng tŭk ngă nguôi ho, u băh tŭk dơi sŏk no di ăn ta băl uôn lan klăh iêu ƀăñ sa ho?”5Khua Yang lup hên: “Pu me mau ŏk mlăm ƀăñ?” Hên têh: “Pŏh mlăm.”6Khua Yang ăn uôn lan gŭk mŏng teh, jêh iên jai jêh sŏk pŏh mlăm ƀăñ, lăh găl, Khua Yang phič jêh iên jao ta băl ƀing kna Yang di no di hên sak tŏng phă, kơt iên hên sak phă ta băl uôn lan.7Jêh iên hên mau ƀê̆ ka kuôn nê̆, hư̆n yơh jai jêh lăh găl yơng ta ka hư̆n, Khua Yang ngơi hên no di hên sak phă lĕ mơt ka hư̆n ya.8Uôn lan sa jêh iên dơi hơm, jêh hư̆n hên dôñ mau pŏh bai ƀăñ djăh hôm khăñ.9Mông hư̆n, mau năng ai puôn bau nau nêh, jêh hư̆n Khua Yang ăn hên du.10Mhăč rŏk, jai jêh mư̆t mŏng plŭng ju băk băl ƀing kna Yang di, Khua Yang sak trôh wăl Đa-ma-nu-tha.11Băl Pha-ri-si trôh ta iên jêh hư̆n hên dư̆ng tŏng nhan ta Khua Yang, hên khơñ so mŏng Khua Yang ƀơn pơp myang băh trôk, no di lông Khua Yang.12Jai jêh ndrôh djha mŏng nuih nhăm tŏ, Khua Yang ngơi: “Pơp mhŏ nuk ho khơñ so pơp myang? Ngĭn ngăn, ăñ ngơi ta pu me, so mau ƀơn pơp myang jrăng dơi ăn ta nuk băl ho ôh …”13Jêh hư̆n jai jêh ndrŏh hên, wêh mư̆t mŏng plŭng, Khua Yang găn gao hang đăh tŏ.14Băl ƀing kna jăng wăr ñôt ƀăñ, jêh iên hên so mau ju mta pơp băk săk mŏng plŭng, čuôm gu ju mlăm ƀăñ.15Khua Yang buôi hên klăh iêu: “Ăn dlăng nư̆k! Ăn gư̆t răng yơng ta pei băl Pha-ri-si di jêh iên pei Hê-rôt di.”16Hên tŏng ngơi ro do ndăng hên klăh iêu bruă ho jêng yơng băh hên so ñôt ƀăñ.17Bơ yơng gư̆t klăh iên, Yang Yê-su ngơi ta hên: “Pơp mhŏ pu me tŏng ngơi ro do yơng ta bruă pu me so mau ƀăñ? Pu me ñăm kăh tôr, jêh iên ăt ñăm gư̆t wơng lăh? Geh ya nuih nhăm pu me jêh ñjêng krăk dăng ru?18Mau măt ƀê̆ dăh so pu me so lăh? Mau tôr ƀê̆ dăh pu me so dơi tŏng lăh? Pu me ăt so kăh wơi ya lăh?19Jai ăñ phič prăm mlăm ƀăñ ta prăm bau nau nêh, dŏng ŏk bai bêng ƀăñ khăñ pu me dơi dôñ?” Hên têh ta Khua Yang: “Măt bar bai.”20“Mă năng pŏh mlăm ƀăñ ta puôn bau nau nêh, dŏng ŏk bai bêng ƀăñ khăñ pu me dơi dôñ?” Hên têh ta Khua Yang: “Pŏh bai.”21Jêh hư̆n Khua Yang ngơi ta hên: “Đô̆ nă mhŏ no di pu me ñăm gư̆t wơng?”22Hên sak trôh Ƀêt-sai-đa, jêh iên nai sak ndơp ta Khua Yang ju nau nêh tiêh, jêh iên hên kôh dăn Khua Yang no di Khua Yang dơi bi ti ta kăn hư̆n.23Kŏng ti nêh tiêh, Khua Yang têk kăn hư̆n du ta ling uôn. Jai jêh čhŏh dak diêu tŏng măt kăn, bi ti Yang di tŏng săk kăn, Khua Yang lup kăn: “Me dơi so djăp pơp ya?”24Ngơk dlăng tŏng tê̆, kăn ngơi: “Ăñ so nai ƀê̆ dăh dlăng hên ndrơm tơm jhi jai sak.”25Jêh hư̆n, wêh ju dŏ hư̆t, Khua Yang bi ti tŏng măt kăn, jêh iên kăn dlăng goh iêu tŏ, pơp ngo dơi băh jêh iên kăn dơi so grăp pơp ta pơp klă nơn.26Khua Yang yua kăn du hih kăn di, jêh iên tơ tă: “Ei ru sak mư̆t mŏng uôn.”27Yang Yê-su wăt ta băl ƀing kna Yang di sak mư̆t mŏng grăp uôn đăm čar Sê-sa-rê Phi-lip, jêh iên jai sak truông, Khua Yang lup băl ƀing kna Yang di, ngơi ta hên klăh iêu: “Nai ngơi ăñ jêng nêh tơm?”28Jêh hư̆n hên têh ta Khua Yang, ngơi klăh iêu: “Yô-han Ƀap-tit, mau nêh ngơi ‘Ê-li,’ mau ya nêh ngơi jêng: ‘Ju nau mŏng băl khua têh luôr.’”29Khua Yang lup hên: “Bơ pu me lăh ăñ jêng nêh tơm?” Jêh hư̆n mông ngơi, Pê-trôih ngơi ta Khua Yang: “Khua jêng Yang Tŏng Tlĕh.”30Khua Yang buôi hên klăh iêu hên so dơi têh ta nai yơng ta Khua Yang ôh.31Jêh iên Khua Yang dư̆ng tơ ti hên klăh iêu Kuôn Nêh jrăng tŭ ŏk pơp ji knap, tŭ nai ndrŏh lat yơng băh băl khua u rañ, băl khua mhŏ yang ram wăt ta băl khua tơ ti pơp bhiên, jêh iên nai lăm khư̆t lat, jêh hư̆n pei nar ta kơi wêh dŏk brêh.32Khua Yang ngơi pơp ho klă klư̆ng nơn. Pê-trôih, jai jêh đŏh Khua Yang tŭk dêh, dư̆ng ƀuăh ñjăm Khua Yang.33Ƀê̆ dăh, jai jêh wiêng dlăng iêu băl ƀing kna Yang di, Khua Yang ôt ñjăm Pê-trôih klăh iêu: “Wơ Sa-tan, ăn du lat băh kơi ăñ! Bơ yơng me so ăn nuih nhăm me mĭn ta bruă Yang Trôk di ôh, ƀê̆ dăh čuôm gu ta bruă kuôn nêh.”34Jai jêh kuôl băl uôn lan wăt băl ƀing kna Yang di, Khua Yang ngơi ta hên: “Ndă nêh tơm khơñ hui gre ta kơi ăñ, nêh hư̆n ăn ndrŏh lat kăn tơm, tung jhi tăm kăng kăn di jêh iên gre ăñ.35Bơ yơng đơ nêh tơm khơñ tlĕh pơp brêh kăn, hư̆n jrăng lăm nga ĕh, bơ nêh tơm yơng băh ăñ jêh iên Pơp Găl jrăng tŭ ư lăm nga pơp brêh kăn, hư̆n jrăng dơi lăm tlĕh ĕh.36Bơ yơng năn pơp tŭ dơn ta nêh dơi mau lĕ dôn teh ƀê̆ dăh nga lat ngăt nhuôl kăn di?37Năn pơp nêh hư̆n jrăng sŏk no di mlih hư̆t ngăt nhuôl kăn?38Ndă nêh tơm tŏng prêng yơng ta ăñ jêh iên yơng ta pơp ngơi ăñ ji mŏng nuk čhơng tăt jêh iên tih djŏh ho, hư̆n Kuôn Nêh ăt jrăng prêng ya yơng ta nêh hư̆n jai Khua Yang trôh mŏng guh ang Bap Yang di wăt ta băl myang ƀrăh.”
FAR EAST BROADCASTING COMPANY