Luke10
1Ta kơi lĕ mơt bruă hư̆n, Khua Yang ăt săč ruăh pŏh jăt bar nau nêh dơ dêh, jêh iên yua hên sak bar nau ju tŭk sak luôr ta măt Khua Yang sak grăp uôn ram jêh iên ta tŭk Khua Yang tơm ăt jrăng sak ya.2Khua Yang ngơi ta hên: “Khă dơm riêk jêh trôh, ƀê̆ dăh nêh riêk ƀê̆ ngăn. Kơt iên ăn dăn ta Khua dơm riêk no di Khua Yang yua băl riêk mư̆t mŏng dơm riêk Yang di.3Ăn sak. Dlăng tŏ, ăñ yua pu me sak klăh di biêp kuôn gŭk mŏng mbar pôl sau rhau.4Ei ru ñôt kdô prăk, kdô sak truông, jep, jêh iên ei ru ka kôh nai jai sak truông.5Năn nêh hih pu me mư̆t, luôr ngăn ăn ngơi: ‘Đăp nang ta hih ho.’6Ndă kuôn pơp đăp nang gŭk ta iên, hư̆n pơp đăp nang pu me jrăng trôh ta nêh hư̆n; ƀê̆ dăh ndă so ĕh jrăng plŏ hư̆t ta pu me.7Ăn gĭr gŭk mŏng hih hư̆n, sa jêh iên ñêt năn pơp dơi dơn băh hên, bơ yơng nêh mhŏ bruă mưn năng dơn pơp khôm kăn. Man du băh hih ho tlơt hih tŏ.8U ta tŭk uôn pu me sak mư̆t jêh iên hên ruôm pu me, ăn sa năn pơp hên dŏng ta pu me,9ăn lăm nêh kuôp ji ta iên, jêh iên ngơi ta hên, ‘Uôn Yang Trôk jêh trôh mơñ ta ŏh mi ru.’10Jêh iên u ta uôn pu me mư̆t ƀê̆ dăh so hên ruôm pu me, jai jêh du ta truông uôn ram hư̆n, ăn ngơi klăh iêu:11‘Tăl ta ƀhŭl teh băh uôn pu me ĕh krăp ta jŏng hi, ăt hi tơ tôh ƀhiêu no di tăm dăng ta pu me! Ƀê̆ dăh ăn gư̆t pơp ho, hư̆n jêng uôn Yang Trôk di jêh trôh mơñ ru.’12Ăñ ngơi ta pu me klăh iêu ndă yơng ta uôn Sô-đôm mŏng nar hư̆n lak, ĕh jrăng nghơč hĭn ta uôn ram ho.13Knap mñai ta me, uôn Kô-ra-sin! Knap mñai ta me, uôn Ƀêt-sai-đa! Ndă di lĕ mơt bruă myang, hư̆n ĕh lăm ƀlang mŏng mbar pu me, jêh dơi lăm ƀlang ta Ti-rơ jêh iên Si-đôn, năng ai hên jêh niêl mlih, hên gŭk mŏng dô̆ buh wăt ta ao kdô băh yau ru.14Hư̆n yơh, jrăng nghơč hĭn ta Ti-rơ jêh iên Si-đôn mŏng pơp phat dôih gao hĭn ta pu me.15Bơ me, Ka-ƀê-na-um, me mĭn dăh nai jrăng hơk me trôh tŏng trôk tê̆ lăh? Nai jrăng lăm jư̆r me trôh ta uôn băl khư̆t.16Nêh tơm gĭr iêt pu me jêng gĭr iêt ăñ, jêh iên nêh tơm so ruôm pu me jêng so ruôm ăñ, ƀê̆ dăh nêh tơm so ruôm ăñ jêng so ruôm Mtao yua ăñ.”17Jêh hư̆n pŏh jăt bar nau ƀing kna du plŏ ta pơp čhô̆ brơn, têh: “Wơ Khua Yang, mŏng năn Khua Yang, tăl ta yang djŏh ăt ĕh gưt ta măt hi ya.”18Ƀê̆ dăh Khua Yang ngơi ta hên: “Ăñ so luôr ru Sa-tan lăč băh trôk ndrơm ƀlĭp lơp.19Dlăng ho, ăñ jêh ăn ta pu me pơp myang no di juôt tŏng bêh jêh iên ndrơng wơng, jêh iên tŏng lĕ mơt pơp dơi băl rŏh di, hư̆n yơh nư̆k ngăn so mau ju mta pơp dơi mhŏ djŏh ta pu me ƀă.20Ƀê̆ dăh, man čhô̆ brơn ta bruă hư̆n, jêng bruă yang djŏh gưt ta pu me, ƀê̆ dăh ăn čhô̆ brơn bơ yơng năn pu me jêh nai čih mŏng Uôn Găl.”21Mŏng mông hư̆n, Khua Yang čhô̆ brơn ngăn mŏng Yang Ngăt Găl, jêh iên ngơi: “Wơ Bap, jêng Yang ta trôk jêh iên teh, Kuôn nơ nei Bap bơ yơng Bap jêh srôm ndăp lĕ mơt pơp ho băh băl gư̆t wơng jêh iên băl gư̆t mĭn, ƀê̆ dăh Bap jêh lăm ƀlang ĕh ta băl ku sei. Wơ Bap, geh ru, yơng kơt iên jêng pơp găl nhăp ta măt Bap.”22“Grăp bruă jêh jao ta Kuôn băh Bap Kuôn di, so mau nêh gư̆t Kuôn jêng nêh tơm čuôm gu Bap, jêh iên so mau nêh gư̆t Bap jêng nêh tơm čuôm gu Kuôn jêh iên ta nêh tơm Kuôn khơñ lăm ƀlang.”23Jêh hư̆n Khua Yang wiêng dlăng ta băl ƀing kna, Khua Yang ngơi gu ta hên: “Găl jôn ta măt dơi so pơp pu me so.24Bơ yơng ăñ ngơi ăn pu me gư̆t klă ŏk băl tơm têh luôr jêh iên mtao čiêng so pơp pu me so, ƀê̆ dăh so dơi so, jêh iên tŏng pơp pu me tŏng, ƀê̆ dăh so dơi tŏng.”25Jêh iên dlăng ho, mau ju nau khua tơ ti pơp bhiên tŏ dŏk tŏng tê̆ no di lông dlăng Khua Yang, jai ngơi: “Wơ Khua, ăñ jrăng dơi dơn pơp brêh hui hai năn pơp ăñ mhŏ?”26Ƀê̆ dăh Khua Yang ngơi ta kăn: “Năn pơp dơi čih mŏng pơp bhiên? Me dlăng đô̆ nă so ĕh ngơi?”27Jai boh pơp, kăn ngơi: “Ăn me khăp Yang jêng Yang Trôk me di ta lĕ nuih nhăm me, ta lĕ ngăt nhuôl me, ta lĕ ai ktang me, ta lĕ pơp mĭn me, jêh iên ăn khăp ta nêh kiêu ma me ndrơm săk tơm.”28Hư̆n yơh Khua Yang ngơi ta kăn: “Me ngơi geh ngăn ru. Ăn mhŏ kơt iên hư̆n me jrăng brêh.”29Ƀê̆ dăh bơ yơng khơñ lăm ƀlang pơp kpă kăn tơm, kăn ngơi ta Yang Yê-su: “Ndă iên nêh tơm jêng nêh kiêu ma ăñ?”30Jêh hư̆n jai boh pơp, Yang Yê-su ngơi: “Ju nau nêh tŏ sak băh uôn Yê-ru-sa-lem jư̆r ta uôn Yê-ri-kô, hư̆n kăn ĕh lăč mŏng ti băl tlĕ, băl ĕh lĕh lĕ čhum ao kăn jêh iên jai jêh pŭ bang tăl sôt, băl ĕh tuôt du, ndrŏh kăn khư̆t dăl ta iên.31Mŏng mông hư̆n, mau ju nau khua mhŏ yang ram tŏ jai sak truông hư̆n, jêh iên jai so nêh hư̆n, kăn diêr ju đăh tŏ.32Klăh iên ya, ju nau nêh Lê-wi, jai sak trôh tŭk ho jêh iên so nêh ĕh wiên, ăt kăn diêr gao đăh tŏ ya.33Ƀê̆ dăh ju nau nêh Sa-ma-ri tŏ, mŏng mông sak truông, trôh ta tŭk nêh ĕh wiên hư̆n, jêh iên jai jêh so, hư̆n kăn mau nuih nhăm tŏng đač.34Jai jêh sak mơñ, kăn put un tŭk sôt nêh ĕh wiên, tôh dak gư̆n jêh iên nơm tŏng iên. Jêh hư̆n yơk pŏng knai ăn hao tŏng kơi ƀle hĕ kăn, sak ndơp nêh hư̆n trôh ta hih ñjŏh jêh iên mdrao un ta nêh hư̆n.35Mŏng nar ta kơi, jai jêh sŏk bar đơ-niê, kăn ăn ta khua hih ñjŏh jêh iên tơ tă: ‘Ăn mdrao un kăn ho, jêh iên ndă me lăm le gao hĭn ta iên, trôh mông ăñ du, ăñ jrăng lŏ wêh čiu ta me.’36Me mĭn nêh tơm mŏng pei nau hên hư̆n ñjêng nêh kiêu ma ta nêh ĕh wiên lăč mŏng ti băl blăč?”37Kăn wêh lăh: “Nêh jêh lăm ƀlang nuih nhăm tlŏng đač ta nêh ĕh wiên hư̆n” Kơt iên Yang Yê-su tơ tă kăn: “Ăn me sak jêh iên mhŏ trip klăh iên.”38Jai hên sak truông, Khua Yang mư̆t mŏng ju čăm uôn hư̆n, jêh iên mau ju nau u ur tŏ năn Ma-thê sak drông Khua Yang.39De mau ju nau ŏh u ur năn Ma-ri, gŭk ta jŏng Yang Yê-su, iêt pơp Khua Yang.40Ƀê̆ dăh Ma-thê jai rŭng răng ta ŏk mŏk bruă prăp prê, jêh hư̆n de sak ngơi: “Wơ Khua Yang, Khua Yang so gư̆t lăh ŏh ăñ lơi gu ju nau ăñ mhŏ bruă? Hư̆n yơh, dăn ngơi ta ŏh ăñ, ăn de đru ăñ ƀă.”41Ƀê̆ dăh, jai boh pơp, Khua Yang ngơi ta de: “Wơ Ma-thê, Ma-thê, e rŭng răng jêh iên mĭn ŏk ir ta bruă,42ƀê̆ dăh čuôm gu ƀơn bruă jêng yuôm hĭn. Bơ yơng Ma-ri jêh săč ruăh khăn yuôm, jêng khăn so mau nêh dơi sŏk sua băh de ƀă.”
FAR EAST BROADCASTING COMPANY