John13
1Mông hư̆n, luôr ta Mar Găn Gao, Yang Yê-su gư̆t ru mông Yang di jêh trôh, no di Khua Yang du băh dôn teh ho băk ta Bap. Jăng jai jêh khăp ta nêh tơm gŭk ting ju Khua Yang mŏng dôn teh, hư̆n Khua Yang khăp hên tăl trôh tôč dư̆t.2Jai sông sa mơ mho, jai jêh yang djŏh răh mŏng nuih nhăm kăn Yu-đa Ič-ka-ri-ôt, kuôn tlau kăn Si-môn, no di kăn lhiăr Khua Yang,3bơ yơng gư̆t ru Bap jêh jao mŏng ti Khua Yang djăp bruă, jêh iên gư̆t ya Khua Yang trôh băh Yang Trôk jêh iên mơñ du plơ̆ băk Yang Trôk,4hư̆n Khua Yang dŏk du băh jhưng sông, lĕh ao ta ling. Jêh iên jai jêh sŏk dhiêm, Khua Yang put tŏng nuôi Khua Yang.5Jêh hư̆n, Khua Yang tôh dak mŏng măm jêh iên dư̆ng rao jŏng băl ƀing kna jêh hư̆n jut răñ jŏng hên ta dhiêm jêh Khua Yang put tŏng nuôi Khua Yang.6Jêh hư̆n, Khua Yang sak ta tŭk kăn Si-môn Pê-trôih. Kăn ngơi ta Khua Yang: “Wơ Khua Yang, Khua Yang rao jŏng ăñ lăh?”7Yang Yê-su boh dơk jêh iên ngơi ta kăn: “Bruă ăñ mhŏ ho, mông ho ñăm me wơng, ƀê̆ dăh ta kơi lĕ bruă ho, me jrăng wơng.”8Pê-trôih ngơi ta Khua Yang: “Ngĭn ngăn so dơi Khua Yang rao jŏng ăñ ji ƀă.” Yang Yê-su wêh ngơi ta kăn: “Ndă ăñ so rao jŏng ta me, hư̆n me so dơi mau ju khăn băk ăñ.”9Si-môn Pê-trôih ngơi ta Khua Yang: “Wơ Khua Yang, so mau băh gu jŏng ăñ ôh, ƀê̆ dăh lĕ wăt ti jêh iên bôk ăñ ya.”10Yang Yê-su ngơi ta kăn: “Nêh tơm jêh ư̆m ru so hôm wêh rao klăh iên, čuôm gu rao jŏng, bơ nêh hư̆n dơi ngôr lĕ mơt, jêh iên pu me jêh ƀrăh ngôr ƀê̆ dăh so mau lĕ mơt dŏng pu me ôh.”11(Bơ yơng Khua Yang gư̆t nêh tơm jrăng lhiăr Khua Yang, hư̆n yơh Khua Yang ngơi: “So mau lĕ mơt dŏng pu me dơi ƀrăh ngôr.”)12Kơt iên, jai jêh Khua Yang rao jŏng hên jêh iên Khua Yang lŏ wêh sŏh ao Yang di, mông hư̆n Khua Yang wêh gŭk mŏng sô̆, ngơi ta hên: “Pu me wơng ya pơp ăñ mhŏ ta pu me hư̆n?13Pu me kuôl ăñ jêng ‘Khua tơ ti’ jêh iên jêng ‘Yang’; pu me ngơi geh ru bơ yơng ăñ yŏng ngăn jêng klăh iên.14Hư̆n yơh, ndă ăñ, jêng Yang, jêh iên jêng Khua tơ ti, rao ru jŏng ta pu me, hư̆n ăn pu me tŏng rao jŏng ndăng pu me.15Bơ yơng jêh ăñ lăm tô mô ta pu me no di pu me ăt mhŏ ndrơm klăh di jêh ăñ mhŏ ta pu me hư̆n.16Ngĭn ngăn, ngĭn ngăn, ăñ ngơi ta pu me, nêh dư̆k ei so ram hĭn ta khua kăn; nêh bi la ăt so ram hĭn ta nêh yua kăn.17Ndă jêh pu me gư̆t wơng grăp bruă ho, hư̆n pu me dơi dơn pơp găl jôn ndă pu me mhŏ hui grăp pơp hư̆n.18So mau ăñ čiêng ngơi yơng ta lĕ mơt pu me; ăñ gư̆t nêh tơm jêh ăñ săč ruăh — ƀê̆ dăh no di pơp ngơi Ră Ƀrăh dơi jêng nư̆k: ‘Nêh sa ƀăñ băk ăñ kăn jơl ndơl jŏng tăm dăng ta ăñ.’19Dŏng băh mông ho, ăñ ngơi ta pu me luôr ta bruă hư̆n jrăng trôh, no di trôh mông ĕh trôh, pu me dơi đăo klă ăñ Khăng Mau.20Ngĭn ngăn, ngĭn ngăn, ăñ ngơi ta pu me, nêh tơm ruôm nêh jêh ăñ yua hư̆n jêng ruôm ăñ, jêh iên nêh tơm ruôm ăñ jêng ruôm Mtao jêh yua ăñ.”21Jai jêh ngơi grăp pơp hư̆n, Yang Yê-su ênguôt mŏng nuih nhăm, jêh hư̆n Khua Yang dlăng nư̆k jêh iên ngơi: “Ngĭn ngăn, ngĭn ngăn, ăñ ngơi ta pu me, ju nau nêh mŏng pu me jrăng lhiăr ăñ.”22Băl ƀing kna tŏng rŭng ndăng hên, so gư̆t Khua Yang čiêng ngơi ta nêh tơm.23Mông hư̆n, ju nau mŏng băl ƀing kna Yang, hư̆n jêng nêh Yang Yê-su khăp, jai gŭk ta kêng jhưng sông, kăn sing ta nuih Yang Yê-su.24Hư̆n yơh, Si-môn Pê-trôih mhŏ tô mô ta kăn hư̆n no di kăn lông lup, “Nêh Khua Yang ngơi hư̆n jêng nêh tơm?”25Bơ yơng hư̆n yơh, jai jêh sing săk kăn tŏng nuih Yang Yê-su, nêh hư̆n ngơi ta Khua Yang: “Wơ Khua Yang, nêh tơm hư̆n?”26Yang Yê-su têh: “Hư̆n jêng nêh jai jêh ñŭk ƀăñ ho, ăñ jrăng sŏk ƀăñ jêh iên ăn ta kăn hư̆n.” Jêh iên, jêh ñŭk ƀăñ hư̆n, Khua Yang ăn ta kăn Yu-đa, kuôn kăn Si-môn Ič-ka-ri-ôt.27Jêh ăn ƀăñ hư̆n, trip mông hư̆n Sa-tan mư̆t mŏng kăn. Hư̆n yơh, Yang Yê-su ngơi ta kăn: “Pơp me mhŏ hư̆n, ăn mhŏ gơñ yơh.”28(Mông hư̆n, so mau nêh jai gŭk mŏng jhưng hư̆n gư̆t pơp mhŏ Khua Yang ngơi ta kăn klăh iên.29Bơ yơng mau nêh mĭn, yơng kăn Yu-đa ñôt prăk, hư̆n Yang Yê-su ngơi kăn: “Ăn ruôt djăp mta pơp khơñ yua mŏng mông mar,” mdăh no di tŏng phă ƀê̆ pơp ta băl ƀun ƀin.)30Hư̆n yơh, jai jêh sŏk ƀăñ, kăn du mhăč rŏk ta ling. Mông hư̆n, trôk jêh ngo.31Kơt iên, jêh kăn du băh iên, Yang Yê-su ngơi: “Mông ho, Kuôn Nêh dơi mau pơp nơ nei, jêh iên Yang Trôk dơi mau pơp nơ nei mŏng Khua Yang.32Jêh hư̆n Yang Trôk jrăng nơ nei Kuôn Nêh mŏng Khua Yang tơm, jêh iên Khua Yang jrăng nơ nei Kuôn Nêh mông hư̆n rŏk.33Wơ băl kuôn sei dêt, ăñ gŭk băk pu me hôm bhiêu gu. Pu me jrăng juôi ăñ, jêh iên ndrơm klăh di jêh ăñ ngơi ta băl Yo Thaĭ ru: ‘Tŭk ăñ sak, pu me so dơi sak trôh.’ Nar o, ăñ ăt ngơi klăh iên ta pu me ya.34Ăñ ăn ta pu me ƀơn pơp bhiên mhei, no di pu me dơi tŏng khăp ndăng tơm; klăh di jêh ăñ khăp pu me, no di pu me lŏ tŏng khăp ndăng pu me.35Ndă pu me mau pơp khăp ndăng pu me tơm, yơng băh iên yơh, grăp nau nêh nai jrăng gư̆t pu me jêng ƀing kna ăñ.”36Si-môn Pê-trôih ngơi ta Khua Yang: “Wơ Khua Yang, u tŭk Khua Yang sak?” Yang Yê-su ngơi ta kăn: “Tŭk ăñ sak, nar o pu me ñăm dơi hui gre ăñ, ƀê̆ dăh ta kơi ho, pu me jrăng hui gre.”37Pê-trôih ngơi ta Khua Yang: “Wơ Khua Yang, pơp mhŏ so dơi ăñ gre Khua Yang mông ho? Ăñ jrăng săn pơp brêh ăñ yơng Khua Yang.”38Yang Yê-su ngơi: “Me jrăng săn pơp brêh me yơng băh ăñ lăh? Ngĭn ngăn, ngĭn ngăn, ăñ ngơi ta me, iêr kuăng so ĕh ndrau tăl trôh mông me khan ăñ pei dŏ.”
FAR EAST BROADCASTING COMPANY