Ephesians5
1Kơt iên, ăn ñjêng nêh mhŏ hui Yang Trôk, ndrơm klăh di ŏh kuôn khăp khơñ ngăn Yang di,2jêh iên ăn brêh mŏng pơp khăp khơñ, ăt klăh di Yang Tŏng Tlĕh jêh khăp băl băn jêh iên săl săk Khua Yang tơm bơ yơng băl băn klăh di ƀơn pơp myơr jêh iên pơp mhŏ yang wăt pơp ƀau kăh tlŏh nŏh myơr ta Yang Trôk.3Bơ pơp dŏng tư̆r, wăt ta grăp pơp so ƀrăh ngôr mdăh he khơñ so dơi lŏ tŏng wañ mŏng mbar ŏh mi, klăh di pơp hư̆n jêng geh guôp ta băl đăo ƀrăh,4ăt ei ru ngơi pơp ngơi păh rak, pơp ngơi dăh dan, mdăh pơp ngơi tŏng liê̆ tih kdrăp — jêng pơp so geh guôp — ƀê̆ dăh mlih mŏng iên ta pơp ngơi lăh găl.5Ngăn ya, ăn gư̆t klă pơp ho klăh iêu, grăp băl dŏng tư̆r, so ƀrăh ngôr, mdăh he khơñ — hư̆n jêng băl kôh rup yang — so mau ngăn drăp mŏng uôn Yang Tŏng Tlĕh di jêh iên Yang Trôk.6Ei ru ăn nai mblơm ŏh mi ta grăp pơp ngơi dăh dan, bơ yơng lĕ mơt pơp hư̆n, pơp hao nuih Yang Trôk di trôh tŏng grăp ŏh kuôn so gưt dơk.7Hư̆n yơh, ŏh mi ei ru ñjêng băl tăm guôp băk hên,8bơ yơng luôr lak ŏh mi hôm ngo măng, ƀê̆ dăh nar o jêng pơp ang mŏng Yang Trôk. Ăn gŭk brêh ndrơm klăh di ŏh kuôn pơp ang di9(bơ yơng ple kao pơp ang di gŭk mŏng grăp pơp găl nhăp, pơp geh tŏng, jêh iên pơp ngĭn ngăn),10jai jêh ksiêm dlăng klă u tŭk jêng pơp geh nuih nhăm Yang Trôk.11Ei ru tăm guôp mŏng grăp bruă dăh dan pơp ngo măng di, ƀê̆ dăh ăn lăm pơl ĕh găl hĭn.12Bơ yơng prêng ngăn ya čuôm gu tŏng wañ trôh ta bruă hên mhŏ muôč.13Ƀê̆ dăh grăp pơp jêh so klă jai jêh dơi lăm ƀlang yơng băh pơp ang, bơ yơng grăp pơp jêh so klă jêng pơp ang gơ gu.14Klăh iên, mau pơp ngơi:“Ăn ngĕh, wơ nêh hôm bê̆,ăn dŏk du băh pôl nêh khư̆t,Yang Tŏng Tlĕh jrăng đang ang me.”15Hư̆n yơh, ăn răng kjăp ta pơp ŏh mi gŭk brêh — ei ru ñjêng klăh di nêh plư̆p ƀê̆ dăh ăn ñjêng klăh di nêh gư̆t mĭn,16gư̆t yua mông nar, bơ yơng lĕ mơt nar jêng djŏh.17Kơt iên, ei ru ñjêng nêh plư̆p, ƀê̆ dăh ăn gư̆t u tuk jêng pơp khơñ Yang Trôk di.18Ei ru ñư̆l nơm, bơ yơng pơp hư̆n jêng pơp mbŭk. Gao băh iên, ăn bêng dlai ta Yang Ngăt Găl,19tăm boh dơk ndăng găp ta pơp muñ yau, pơp muñ ƀrăh jêh iên pơp muñ nơ nei, ta nuih nhăm băl băn muñ jêh iên nơ nei Yang trôk,20myơr pơp lăh găl Yang Trôk, jêng Bap, mŏng grăp mông ta grăp pơp mŏng năn Yang Tŏng Tlĕh Yê-su, Khua Yang băl băn,21ăn gưt mpŭ ndăng găp mŏng pơp bhŭng mpŭ Yang Tŏng Tlĕh —22Wơ nêh ñjêng ur, ăn gưt ta sai tơm klăh di gưt Yang Trôk.23Bơ yơng sai jêng bôk ur, ăt klăh di Yang Tŏng Tlĕh jêng bôk pôl ƀrăh Khua Yang tơm jêng Yang Tŏng Tlĕh săk jăn.24Kơt iên, pôl ƀrăh gưt mpŭ Yang Tŏng Tlĕh đô̆ nă hư̆n ur ăt gưt mpŭ ta sai tơm mŏng grăp bruă kơt iên ya.25Wơ nêh ñjêng sai, ăn khăp khơñ ur me tơm, ăt klăh di Yang Tŏng Tlĕh jêh khăp pôl ƀrăh jêh iên săl săk tơm bơ yơng pôl ƀrăh,26no di Khua Yang dơi lăm ƀrăh pôl hư̆n, jai jêh dơi lăm ƀrăh ngôr ta dak rao wăt ta pơp đăo,27no di Khua Yang dơi lăm ƀlang săk tơm ta ƀơn pôl ƀrăh guh ang, so mau têl ƀơ̆, mdăh têl sôt, mdăh mau ju mta pơp klăh iên, ƀê̆ dăh no di pôl hư̆n dơi ƀrăh ngôr jêh iên so mau tŭk ƀuăh ñjăm.28Klăh iên ya hư̆n sai ăt ăn khăp khơñ ur tơm ndrơm klăh di săk jăn tơm. Nêh sai khăp ur tơm jêng khăp săk jăn tơm.29Bơ yơng so mau nêh hao nuih ta săk jăn tơm ƀă, ƀê̆ dăh siêm ruông jêh iên năk iêl ĕh, ăt klăh di pơp Yang Tŏng Tlĕh ta pôl ƀrăh,30bơ yơng băl băn jêng grăp khăn mŏng săk jăn Khua Yang.31“Yơng klăh iên, nêh tlơ tlau jrăng yĕh mei bap jêh iên jrăng tăm tlăč ta ur kăn, lĕ bar nau jrăng ñjêng ƀơn lŏng săk.”32Pơp yuôm ndăp ho jêng ram ngăn — ƀê̆ dăh ăñ jai ngơi yơng ta Yang Tŏng Tlĕh jêh iên yơng ta pôl ƀrăh.33Wăt di lăh kơt iên, ŏh mi ăt hui hdră hư̆n — ta ju nau nêh — grăp nau sai ăn khăp ta ur tơm klăh di săk jăn tơm, bơ nêh ur hư̆n jêng ăn gưt mpŭ ta sai tơm.
FAR EAST BROADCASTING COMPANY