Colossians1
1Kăn Pôl, ƀing kna Yang Tŏng Tlĕh Yê-su di hui si pơp khơñ Yang Trôk, jêh iên Ti-mô-thê, ŏh mi băl băn di,2ñuôr ta băl đăo ƀrăh wăt ta ŏh mi sĭt suôr mŏng Yang Tŏng Tlĕh ta uôn Kô-lô-se. Dăn pơp đač jêh iên pơp đăp nang băh Yang Trôk, jêng Bap jêh iên Yang Trôk băl băn, jêng Yang Tŏng Tlĕh Yê-su, trôh ta ŏh mi.3Hi lăh găl Yang Trôk, Bap Khua Yang băl băn, jêng Yang Tŏng Tlĕh Yê-su, mŏng grăp mông kuôl dăn ta ŏh mi,4bơ yơng hi jêh tuôm tŏng yơng ta pơp đăo ŏh mi di mŏng Yang Tŏng Tlĕh Yê-su jêh iên ta pơp khăp khơñ hư̆n jêng ŏh mi mau ru ta lĕ mơt băl đăo ƀrăh,5bơ yơng pơp čang mơn jêh ñăt thêm ru ta ŏh mi tŏng grăp tal trôk, hư̆n jêng pơp jêh ŏh mi tuôm tŏng băh mhei lak mŏng pơp đăo ngĭn ngăn, hư̆n jêng Pơp Găl,6jêng pơp jai ĕh mau mŏng mbar ŏh mi, jêh iên đô̆ nă Pơp Găl hư̆n dơi ĕh dŏk ta ram jêh iên ĕh mau ple kao tar ƀar mŏng teh dih, ăt klăh iên ya ĕh gŭk mŏng ŏh mi, dŏng băh nar ŏh mi jêh tŏng jêh iên riêm gư̆t pơp đač Yang Trôk di mŏng pơp ngĭn ngăn,7klăh di ŏh mi jêh riêm băh kăn Ê-phap-ra, jêng nêh mhŏ bruă ju băk khăp khơñ hi di, kăn jêng ju nau nêh dư̆k sĭt suôr Yang Tŏng Tlĕh di bi la un ta hi,8jêh iên jêng nêh lăm ƀlang ta hi gư̆t pơp khăp khơñ ŏh mi di mŏng Yang Ngăt Găl.9Yơng hư̆n, dŏng băh nar hi jêh tŏng klăh iên, hư̆n hi so mdei ôh kuôl dăn jêh iên kôh dăn ta ŏh mi, no di ŏh mi dơi bêng dlai pơp gư̆t wơng pơp khơñ Yang Trôk mŏng grăp pơp gư̆t mĭn jêh iên pơp gư̆t wơng ngăt myang,10no di djhuang sak năng ta măt Yang Trôk mŏng grăp pơp găl nuih nhăm Khua Yang, dơi mau ple mŏng grăp bruă găl, dơi sak ta ram mŏng pơp gư̆t năl Yang Trôk,11dơi mau pơp prăl ktang jêh iên bêng dlai ai ktang hui si pơp dơi myang guh ang Khua Yang di, no di trôh ta grăp mta pơp gir ăt jêh iên kjăp wăt nuih nhăm čhô̆ brơn,12myơr pơp lăh găl Bap, Mtao jêh ăn ta ŏh mi mau nư̆m djăp pơp gŭk mŏng pơp dơn ngăn ju băk băl đăo ƀrăh mŏng pơp ang.13Mtao hư̆n jêh lăm tlĕh băl băn băh pơp dơi pơp ngo măng di, jêh iên ndơp băl băn trôh ta čar Kuôn khăp khơñ Yang Trôk di,14mŏng Kuôn hư̆n, băl băn dơi mau pơp lăm tuai, hư̆n jêng pơp ndrŏh tih.15Kuôn hư̆n jêng rup Yang Trôk so dơi so, jêng Mtao lai săk luôr hĭn mŏng grăp pơp păm rih ñjêng.16Bơ yơng mŏng Kuôn, grăp pơp păm tŏng trôk wăt mŏng teh sô̆, pơp dơi so ta măt wăt pơp so dơi so ta măt, jêh rih ñjêng gơ gu. Wăt di lăh mtao, mdăh khua kĕ kriê, mdăh băl ñôt bôk, mdăh pơp dơi, lĕ mơt jêh rih ñjêng yơng băh Kuôn jêh iên bơ yơng Kuôn.17Kuôn hư̆n jêh mau luôr ta grăp pơp păm, jêh iên grăp pơp păm dơi gŭk kjăp ju băk mŏng Kuôn.18Kuôn hư̆n ăt jêng bôk săk jăn di, hư̆n jêng pôl ƀrăh. Nư̆k Kuôn hư̆n jêng čŭ čam, jêng Mtao lai săk luôr hĭn mŏng mbar băl khư̆t, no di Kuôn hư̆n mhŏ Mtao gŭk ta măt tŏng grăp mta pơp păm.19Bơ yơng Yang Trôk čhô̆ brơn no di ăn ta grăp mta pơp nư̆m nơn gŭk mŏng Kuôn,20jêh iên mơn băh Kuôn no di lăm găl hư̆t grăp pơp păm ta Yang Trôk tơm, wăt di lăh grăp pơp păm mŏng teh, mdăh grăp pơp păm tŏng trôk, bơ yơng jêh lăm ndơp trôh pơp lăm găl mơn băh Kuôn hư̆n, yơng băh mham tŏng jhi tăm kăng Kuôn di.21Luôr lak, jăng jai nai dlăng ŏh mi jêng nêh ndrơh jêh iên băl rŏh tăm dăng mŏng pơp mĭn, mŏng grăp bruă djŏh ƀai,22ƀê̆ dăh nar o, ŏh mi jêh dơi lăm găl hư̆t mơn băh pơp khư̆t mŏng lŏng săk Kuôn di, no di lăm ƀlang ŏh mi ta măt Yang Trôk, jêng lĕ mơt nêh ƀrăh ngôr, so mau têl sôt, jêh iên so mau tŭk ƀuăh ñjăm,23khă bi ŏh mi gŭk nơn mŏng pơp đăo, gir čăt rĕh, kjăp, jêh iên so dơi nai yĕh băh pơp čang mơn kjăp Pơp Găl di hư̆n jêng pơp jêh ŏh mi tuôm tŏng, jêng Pơp Găl jêh têh sơm ta grăp pơp rih ñjêng mŏng sô̆ trôk, yơng băh pơp hư̆n, ăñ, kăn Pôl, jêh ĕh ñjêng ju nau nêh dư̆k.24Nar o ăñ čhô̆ brơn mŏng grăp pơp knap mñai ăñ ji yơng băh ŏh mi, jêh iên mŏng săk jăn ăñ tơm, jăng jai ăñ wêh mbăč grăp pơp hôm bhơi mŏng pơp ji kôr Yang Tŏng Tlĕh di, yơng băh săk jăn Khua Yang, hư̆n jêng pôl ƀrăh,25yơng băh iên, ăñ jêh ĕh ñjêng ju nau nêh dư̆k, hui si pơp kĕ kriê Yang Trôk di, bruă hư̆n jêh nai jao ta ăñ yơng băh ŏh mi, no di lăm jêh bruă têh sơm pơp ngơi Yang Trôk di,26hư̆n jêng pơp yuôm ndăp jêh srôm khăp găn gao grăp nuk jêh iên grăp pôl nhuôr, ƀê̆ dăh nar o, pơp yuôm ndăp hư̆n jêh dơi lăm ƀlang ta băl đăo ƀrăh Yang di,27jêng lĕ mơt nêh Yang Trôk khơñ lăm ƀlang đô̆ nă jêng pơp ndrŏng săh guh ang pơp yuôm ndăp ho mŏng băl uôn lan ling lač, hư̆n jêng Yang Tŏng Tlĕh gŭk mŏng ŏh mi, hư̆n jêng pơp čang mơn guh ang.28Ho jêng Mtao jêh hi têh sơm, jai jêh buôi grăp nau nêh, jêh iên tơ ti lăh grăp nau nêh ta lĕ mơt pơp gư̆t mĭn, no di hi dơi lăm ƀlang ta grăp nau nêh jêng nư̆m nơn mŏng Yang Tŏng Tlĕh.29Ăt yơng băh pơp hư̆n ăñ tŭ pơp ăr măh, tăm mblăh hui si pơp čhôl trôt Khua Yang di jai mhŏ bruă ta pơp myang mŏng ăñ.
FAR EAST BROADCASTING COMPANY