1 Timothy4
1Yang Ngăt Găl ngơi klă klăh iêu mŏng nuk tôč dư̆t ho, ŏk nêh jrăng ndrŏh pơp đăo, hui gre pơp yang jăr huôk jêh iên pơp tơ ti lăh yang djŏh di,2yơng băh pơp jăr huôk băl pra mhŏ găl di, nuih nhăm băl hư̆n jêh ĕh ñjêng krăk dăng,3hên ghă so ăn tŏng gŭk tŏng sai, hên yua wiêr djăp mta pơp sa jêh Yang Trôk rih ñjêng ta nêh mau pơp đăo jêh iên gư̆t wơng pơp ngĭn ngăn, no di dơi yua ta nuih nhăm gư̆t lăh găl.4Bơ yơng djăp mta pơp Yang Trôk rih ñjêng nhăp găl gơ gu, jêh iên so mau ju mta pơp năng ndrŏh lat ôh khă bi sŏk dơn ta nuih nhăm gư̆t lăh găl,5bơ yơng pơp sông sa dơi ƀrăh ngôr mơn băh pơp ngơi Yang Trôk jêh iên pơp kuôl dăn.6Ndă ăn pơp hư̆n ta măt ŏh mi, me jrăng ñjêng nêh đru bruă găl Yang Tŏng Tlĕh Yê-su, dơi siêm ruông ta pơp ngơi yơng băh pơp đăo jêh iên pơp tơ ti lăh nhăp găl me jêh hui gre.7Ƀê̆ dăh ăn ndrŏh lĕ mơt pơp prơ djơh rơh băl u rañ di. Mlih mŏng iên, ăn lăm riêm săk tơm ta pơp gư̆t mpŭ,8bơ yơng “pơp riêm lăm ktang săk jăn mau pơp tŭ dơn phiêu gu, ƀê̆ dăh riêm nuih nhăm gư̆t mpŭ mau pơp tŭ dơn ta djăp bruă, bơ yơng mau pơp ƀuôn ta nuk ho jêh iên nuk ta kơi.”9Pơp ngơi hư̆n jêng năng đăo sĭt jêh iên năng sŏk ruôm lĕ mơt,10yơng băh băl băn tŭ pơp ăr măh jêh iên tăm mblăh ta pơp ho, bơ yơng băl băn mau pơp čang mơn mŏng Yang Trôk khăng brêh, Khua Yang jêng Yang Tŏng Tlĕh ta grăp nau nêh, luôr hĭn jêng băl đăo di.11Ăn têh sơm jêh iên tơ ti lăh grăp pơp hư̆n.12Ei ru ăn nai mưč kuôn yơng băh năm hôm ndôl sei, ƀê̆ dăh ăn me ñjêng nêh tô mô găl ta băl đăo, mŏng pơp ngơi, mŏng bruă mhŏ, mŏng pơp khăp khơñ, mŏng pơp đăo, mŏng pơp ƀrăh ngôr.13Ăn me kriêng dlăng ră, čhôl trôt, tơ ti lăh tăl trôh mông ăñ trôh.14Ei ru me lăm huăr pơp đač mŏng nuih nhăm me, hư̆n jêng pơp đač jêh nai ăn ta me mŏng pơp têh luôr, wăt ta pơp bi ti băh băl khua u rañ.15Ăn me riêm grăp bruă hư̆n, ăn me lăm jêh ĕh, no di pơp gư̆t me di ĕh sak ta ram klă ta măt grăp nau nêh.16Ăn răng ta săk jăn me tơm wăt ta pơp me tơ ti lăh. Ăn gŭk kjăp mŏng lĕ mơt pơp hư̆n, bơ yơng mhŏ klăh iên me jrăng lăm tlĕh me tơm wăt ta nêh iêt me ya.
FAR EAST BROADCASTING COMPANY