1 Corinthians13

1Khă ăñ thơp ngơi grăp pơp ngơi kuôn nêh jêh iên băl myang, ƀê̆ dăh ăñ so mau pơp khăp khơñ, hư̆n ăñ jêh ĕh ñjêng čư̆ng ndrau sư̆k tôr mdăh dang čhur čher.2Khă ăñ mau pơp đač ngơi pơp têh luôr jêh iên gư̆t wơng lĕ mơt pơp yuôm ndăp wăt ta grăp pơp gư̆t mĭn, jêh iên khă ăñ mau bêng pơp đăo tăl dơi yĕh yôk čuôr, ƀê̆ dăh ăñ so mau pơp khăp khơñ, hư̆n ăñ ăt jêng dăh dan ya.3Khă ăñ phă gai lĕ mơt ngăn drăp ăñ mau, jêh iên khă ăñ săl săk ăñ no di ăñ dơi nơ nei ăñ tơm, ƀê̆ dăh ndă so ăñ mau pơp khăp khơñ, hư̆n ăñ ei ya mau pơp dơn.4Pơp khăp khơñ krĕh gĭr ăt jêh iên lăm ƀlang pơp băn dhư̆, pơp khăp khơñ so kĕh nač, pơp khăp khơñ so mbŭ săk, ăt so mau pơp mgao,5so mhŏ bruă djŏh, so tư̆ng juôi năn pơp tŭ dơn ta tơm, ăt so jơñ nuih, so mĭn pơp jhat ƀai,6so čhô̆ brơn ta pơp so kpă, ƀê̆ dăh čhô̆ brơn mŏng pơp ngĭn ngăn;7pơp khăp khơñ đač djăp mta pơp, tip djăp mta pơp, čang mơn djăp mta pơp, jêh iên gĭr ăt djăp mta pơp.8Pơp khăp khơñ so dơi tôč. Ƀê̆ dăh, wăt di lăh dơi ngơi têh luôr, hư̆n ĕh jrăng dư̆t; wăt di lăh dơi ngơi ŏk pơp ngơi, ĕh jrăng lĕ; wăt di lăh mau pơp gư̆t mĭn, hư̆n ĕh so hôm ya.9Bơ yơng băn gư̆t wơng ñăm nư̆m, jêh iên băn ngơi pơp têh luôr ñăm nư̆m ya.10Ƀê̆ dăh jăng jai pơp nư̆m nơn trôh, jêh iên pơp ñăm nư̆m hư̆n jrăng gao lĕ.11Jăng jai ăñ hôm jêng ku sei, ăñ ngơi blăh di ku sei, ăñ mĭn blăh di ku sei, ăñ mgăl blăh di ku sei. Trôh năm ăñ ram, ăñ ndrŏh lĕ mơt bruă ku sei.12Bơ yơng nar o, băn so ta pơp ƀơ ƀlu mŏng măt king, ƀê̆ dăh mông hư̆n băn jrăng so măt drăh măt. Nar o, ăñ dơi gư̆t čuôm gu ju khăn, ƀê̆ dăh trôh mông hư̆n, ăñ jrăng gư̆t nư̆m nơn, ăt ndrơm klăh di ăñ jêh gư̆t năl nư̆m nơn.13Ƀê̆ dăh nar o hôm pei mta pơp ho: Pơp đăo, pơp čang mơn, jêh iên pơp khăp khơñ. Ƀê̆ dăh pơp yuôm hĭn mŏng pei mta pơp hư̆n jêng pơp khăp khơñ.

FAR EAST BROADCASTING COMPANY

https://app.library.bible/content/72b5c125a759a2b1