Hibruw12

1Woqse et a kēy mavasemlō nēmētvuge bēdēmtig. Ikē qeleso gēn so gētyak valeh, wa kēy nahag walēg tō gayka mi namlaklak van hiy gēn. Sowle, itōk so gēn ukēg veteg nētētēy dēw del, wa nubug mey a gēn tavan gon towoyig vēh aē. Tō gēn sikyak valeh hiy mahē mey a Ḡod mal togyak vatag veg gēn, wa nitog n̄ayn̄ay den.2Et ēwē van hiy Tigsas. Kē nōtōti dēmtig wa nōlsi dēmtig. Veg kē met ēwē nayseyse bemlaklak en, tō kē et dēmsas te namamayge. Ba kē mavan heylō noyon̄memeh apwo wolwol. Tō togtōkē, kē nahag lemtō a letno haghag non Ḡod.
3Atmi dēmsas tow Tigsas, a qeleave tō ige gengenyeg metvale mi kē ba kē mitig maymay, tō so kimi tit n̄ayn̄ay vēhte tō tiple sisgoy den nēdēmtig.4Kimi se metvale mi negengenyeg, ba kimi et tig maymay te gaydēn̄ a naday nonmi molon̄ veg.5Tō kimi wun mololqōn̄ nohohole bevey biyin̄ mey a Ḡod mōlōl tō kimi ige yantēntēn so,Intik, nēk nitog dēmdēm su aē mahē a Ḡod niak maymay hiy nēk so nivatne nēk.Mahē kē nihole maymay hiy nēk en, nitog so nēdēmdēm nōnōm nisisgoy aē.6Veg Ḡod gōh, kē tavatne galsi ige a kē natam kēy,wa kē nivēvēg ige a kē vap so ikēy ige yantēntēn.
7Atmi tēygoy nememeh del a niqalqal kimi en, veg nememeh qeleso navatvatne a mavan me den Namam. Veg Ḡod niak hiy kimi qeleso ige yantēntēn. ?Wō ige imam nakak hiy ēntēn qelenen?8Ḡod nivatne yantēntēn del. So Ḡod wo et vatne te kimi en, tō nēdēmdēm nan so kimi et tiy yantēntēn te, ba kimi nēnētm̄ey talamaltow ēwē.
9Wa tō, gēn nēglal so imam nongēn me lemyam kē, kēy mavatne gēn, tō gēn dēmap kēy aē. ?Tō qeleave veg imam nongēn hag lōtōk en? Itōk so gēn dēmap yeh kē, ak tō gēn tētēy vēh nēh lap aē.10Ige imam nongēn me lemyam gōh en, kēy mavatne gēn, ba namaltē ēwē, ba kēy dēm van a so itōk mi kēy qeleanen. Ba Ḡod nivatne gēn veg kē nemyōs so nimyin̄ gēn, tō so gēn toyon̄ vēh qele ikē veg kē noyon̄.
11Mahē nage vitwag niqal net vitwag so nivatne kē en, kē tit malaklak vēhte ba kē nilolwon aē. Ba so kē wo mōm̄ōleg galsi bavatvatne nan en, tō kē telep nayseyse aē bēmētwuge tenenen, tō kē totog a natm̄at aē mi kē.
12Sōwlē, atmi suwyeg kēlkēl namnemi mey et hon̄hon̄yeg te tō en, wa nayn̄omi mey a meyeyey tō en.13Ak tenenen namtehal tō so nayn̄omi mey a nememeh aē en, tit tēvēy lok vēhte, ba niwē lokse. Namanig nan so ak maymay lokse nēdēmtig nonmi.
14Atmi helhel etgal so tog letm̄at tiwag mi ige sil del, wa atmi tog tēy nēh mey a noyon̄. Veg ige yon̄ vēlēs a tet Welan.15Tō etgoy galsi so tateh et nitigkēlē den nasgōp non Ḡod. Tō nitog ukukēg so net vitwag nivan me navatgo a nehet. Veg navatgo het qeleso nagapyuy. Kē nōqōvē, tō kē tak sapsapwōy vēh ige m̄adeg.16Etgoy so tateh et nilegleg soloteg. Wa etgoy so tateh et tit dēmap vēhte Ḡod, qeleso Esau.
Dēm lok Esau. Imam nonon mēvēyvēyne so Esau telep navawē liwo, ba kē mukēg veteg navatvat nan. Esau men̄yeg navatvat nan veg begengen ēwē. Ba negengen nan, kē megen qēt vag tiwag woy.
17Tō me atgiy en, kimi nēglal vatag. Mahē Esau nemyōs so nilep navawē nan den imam nonon en, imam nonon et mōyōs goy te. Tō Esau mosoksok lēlēge namtehal a so nileh nēdēmdēm non imam nonon, tō kē niten̄ aē.
18Mahē kimi van sisqet Ḡod en, et qele te mahē a ige Tisrael mavan sisqet tō Ḡod. Am̄ag kēy mavan luwutwut Sinai, mey a kēy teteyqal vēh. Tō Ḡod mēhēw tēqēl me luwutwut nan. Tō nep nalawlaw aē, wa mahē nōqōn̄ wa nemlēglēg sil, wa nelen̄ maymay aē.19Naln̄e tō nipip liwo aē, tō ige Tisrael yon̄teg a Ḡod niōlōl kēy. Kēy moyon̄teg nohohole nonon en, tō kēy mēvēhge maymay so kē nitog hohole lokse me hiy kēy.20Veg kēy tit tig maymay vēhte leln̄e vayēg mey a Ḡod mōlgontegoy so, “Kimi nitog vanvan me luwutwut agōh. Sowo net siso nahap qiyig tuytuy wo mavan dēn̄ van luwutwut gōh en, atmi yim mat kē.”21Mosis met nage gōh en, tō kē memtēgteg temun se, tō kē mavap wo, “No memtēgteg temuk tō nihyik meyeyey aē.”
22Ba kimi qiyig gōh netegha. Mahē kimi van sisqet Ḡod en, qeleso kē nilep kal kimi lemyeyen talge. Tō kimi mavan me luwutwut Saeon, igōhkē Jerusalem hag lōtōk en, a nalqelqevōnō non Ḡod a kē nēh tasga. Hag tō alon en ige in̄sel tey vag tey laklak mi namlaklak.23Tō hag tō alon en, nēvēwti nētnētm̄ey mey a kēy nam̄agoy. Ḡod mal qisen̄ vatag nahay lōbōk nonon. Tō hag tō alon en, Ḡod a tēvēvēg nisil del. Tō igōh kē natalan ige tenenen a Ḡod mak tō kēy nam̄e et yeh.24Tō igōh kē Tigsas a ikē nitiy et bakaktig nakavanan gayaq non Ḡod. Tō igōh kē naday non Tigsas a kē metetn̄eg apwon gēn so niak so gēn wenwen. Naday nan nitiy wē yeh den naday non Abel, veg naday non Abel mavasemlō so Ḡod tēvēvēg vēh nubug nagan net. Kimi mal van sisqet me hiy Ḡod ēgēn, tō nahaphap del gōh hiy kimi.
25!Etgoy galsi! Nitog yon̄yon̄vavaleh nohohole non Ḡod. Veg mahē kē mohole vētday ige Tisrael lemyam goh, kēy moyon̄vavaleh. Kēy et yow veteg te den nēvēvēg. Ba togtō qiyig gōhkē en, kē nahag letno liwo talge nonon so nihole vētday gēn. ?So gēn wo yon̄vavaleh kē, tō gēn so yow veteg den nēvēvēg qeleave?26Me am̄ag en, naln̄an Ḡod mak namyam kē miyiyeg qēt. Ba togtōkē kē mavatvat so, “No tiyiyeg namyam vag tiwag se. Ba et namyam vēlēs te, ba nōtōq se.”
27Nohohole a Ḡod mavap en so, “Vag tiwag se,” nēdēmdēm nan so vel haphap mey a tiyiyeg vēh en, kēy tisisgoy qēt, tō Ḡod telep yakyak kēy. Ḡod telepyak natawye haphap del a kē mitin̄ tō lemyam agōh. Ba nahaphap talge non Ḡod ēwē a tit yiyeg vēhte en, kēy tahag lap.
28Tō Ḡod telep me hiy gēn napnō vitwag mey a kē mahgen temyanag goy. !Napnō nan tit mumuyeg vēhte! Bastō itōk so gēn vēwē Ḡod aē, tō mogmogo goy kē mi nēdēmap wa namtēgteg lemtehal mey a kē temlaklak aē.29Veg hēywē, Ḡod nongēn qeleso nep mey a tegen qēt nowmat nahaphap a kē so nivēvēg.

The Seed Company

https://app.library.bible/content/ae2bad925cc7f490