Namgumgu Namun Ige Hal18
1Me atgiy, Pol nivan yak den Atens tō nivan Korint.2Tō kē metsas Nujuw vitwag nahan Aquila, kē nage Topontus. Aquila qoyo van gayaq ēwē tō me den Itali, a lepnō Rom. Ba mahē nēqēt mayanag Kladius mōvōyyak ige Juw del den Rom en, tō Aquila kōyō ēgnōn, nahan Prisila, mavan me lepnō Korint. Tō Pol mavan tō nitog tiwag mi kōyō.3Ba namgumgu namuytēl haytēyēh, a bususuy tapolēn ne ēm̄. Bastō Pol motog mi kōyō, tō kēytēl mugumgu tiwag.4Vel Qōn̄ M̄ōkheg, Pol nitoytoy lēm̄ tatay, so yap me ige Juw wa ige Krik.5Mahē Silas kōyō Timoti mavan me den Masedonia so biyin̄ goy Pol en, tō Pol nibah den nususuy tapolēn, bastō nitig tasga bavavasemlō Yoy Ēwē. Tō kē mavasem galsi van hiy ige Juw aso Kraēs en, ikē Tigsas.6Ba kēy mitig kēlē Pol, tō mitig het kē. Bastō kē mesyap yak nelem den neheyhey nonon. Tō kē nivap van hiy kēy so, “!Nēvēvēg wa naday nonmi apwomi mahgemi, ba et hiy no te, veg no netnenen! Entō gōh, no tavan vēlēs hiy ige mey a kēy et Juw te.”7Tō Pol nikalō den nēm̄ tatay, tō nivan lēm̄ non net vitwag nahan Titius Justus. Titius et Juw te, ba kē net bomogmogo goy Ḡod. Tō nēm̄ nonon nahag tiwag mi nēm̄ tatay non ige Juw.8Bahnentō, Krispus, net liwo goy nēm̄ tatay nen, kē mēdēmtig Welan. Tō ige del a lelo ēm̄ nonon Krispus en, kēy mēdēmtig qēt. Tō ige m̄adeg Tokorint moyon̄teg noyoy ēwē, tō mēdēmtig, wa mavasugyon̄.9Tō anqōn̄ vitwag, Welan mohole van hiy Pol loqoyqoy, so “Nitog mētēgteg, wa nitog haghag yoyon̄, ba hole tasga.10Veg ino tiwag mi nēk, tō tateh et so tak tēqtēqyeg nēk si so tak memeh nēk, veg net nam̄adeg me lepnō gōh mey a tēdēmtig no.”11Tō Pol motog van nen nēte vitwag nagaytegi, nivatvatne ige sil mi navavap non Ḡod.12Mahē Galio namyanag liwo goy noprovēns nan (nahan Akaya), ige Juw hay tiwag so tēy Pol tō m̄ōk kē lokot.13Tō kēy vap van hiy Galio so, “!Net gōh nivatvatne ige sil so mogmogo goy Ḡod lemtehal mey a et tatag te nele!”14Bahnentō, Pol nitēymat so nivap te hap, ba Galio nihole van hiy ige Juw so, “Yēhē Juw, so net vitwag wo mehel nele siso mak nage mey nehet yeh, tō no toyon̄teg vēh kimi aē.15Ba veg kimi vēy vēyle gatay navavap, wa nahah tegtegha, wa nele nonmi, tō atmi van ak lemyōs nonmi. Nok valeh yak no so vēvēg nahaphap qele anen.”16Tō Galio nivōyyak kēy den nēm̄ kot.17Tō ige Juw del mētēy maymay net liwo nonoy Sostēnēs, a kē net liwo ne ēm̄ tatay nonoy. Tō kēy vēhyuw mi kē lengo ēm̄ kot, ba Galio et dēmdēm te van aē.18Tō Pol motog nōqōn̄ m̄adeg van lepnō nen, tō kē qoyo van veteg ige yathēthēn. Ba Prisila kōyō Aquila mavan tiwag mi kē. Kēy mavan dēn̄ Kenkria, tō Pol nibal nēlēn tatag van navatvat a kē mavatvat tō aē. Bahnentō, kēytēl gam hiy Siria.19Tō kēytēl van me Efesas. Tō Pol mōm̄ōk Prisila kōyō Aquila so kōyō hag lap Efesas. Ba Pol mahgen nivanvan lēm̄ tatay, tō kē nitoytoy hiy ige Juw.20Tō kēy mēvēhge so kē totog tusu vēh tiwag mi kēy, ba kē mavaleh kēy.21Mahē kē so nivan veteg kēy en, kē nivap van hiy kēy so, “Nok van, ba no tavan lok me hiy kimi, sowo lemyōs non Ḡod.” Tō kē niyem lokse labaklap, tō nigam yak den Efesas.22Pol nivēykal van lepnō Sisaria en, tō nivan dēn̄ Jerusalem so nivap nohohole batamtam nonon van hiy ige tēlēm̄ yon̄. Tō me atgiy, kē nim̄ōl lokse Antiok.23Tō kē motog tekelgi bah van nen, tō kē nivan heylō lokse lelqelqevōnō Ḡalasia tiwag mi Frigia. Tō kē nivahiy maymay ige tin̄qoy telepnō nen.24Nujuw vitwag mavan me Efesas. Kē nahan Apolos, kē mowot n̄a Aleksadria. Ikē net lolmeyen vitwag, wa kē nēglal m̄ōleg hiy Nayapyap Yon̄.25Kē nēglal namtehal non Kraēs, tō navaksan aē bohole veg Tigsas. Tō navatvatne nonon netnenen. Ba kē nēglal vēlēs navasugyon̄ non Jon.26Tō kē meqtēg toytoy lēm̄ tatay non ige Juw. Prisila kōyō Aquila moyon̄teg kē en, tō kōyō mokokm̄egoy kē. Tō kōyō tuan malig se van hiy kē navatvatne bemtehal non Ḡod.27Mahē Apolos nemyōs so nivan how Korint a loprovēns Akaya en, ige yathēthēn Tefesas hole biyin̄ kē. Tō kēy mayap neletes van hiy ige tin̄qoy telepnō nen, so kēy lep vasgēt kē. Heylō nasgōp Ḡod mak tō ige Takaya mēdēmtig. Mahē a Apolos mēdēn̄ van Akaya en, kē memyin̄ kēy a nēkēkēn.28Veg Apolos mavaplō m̄ōleg so qeleave Nayapyap Yon̄ nivasemlō so Tigsas en, ikē Kraēs. Tō kē mēvēyle liwo tiwag mi ige Juw lengon ige sil, ak tō so ige sil m̄ōleg so nēdēmdēm non ige Juw et hēywē te.
The Seed Company