Namgumgu Namun Ige Hal11
1Ige hal tiwag mi ige et dēmtig vel mahē del n̄a Judea moyon̄teg noyoy so ige mey et Juw te en, ikēy se mēdēmtig temuy nohohole non Ḡod.2Yatkel Juw a nēdēmtig Tigsas en, kēy dēmdēm maymay so itōk so tep vēglal ige mey et Juw te so kēy wo dēmtig Tigsas. Mahē Pita mēdēn̄ me Jerusalem nen, ige gōh men̄en̄e hiy kē aē.3Kēy wo, “Bahap tō nēk mavan hay lēm̄ non ige a et tep vēglal te kēy ōk, tō megengen tiwag mi kēy?”4Tō Pita nivasemlō van hiy kēy vel haphap a meqtēg yak tō me, tō mēdēn̄ a lōlsēn.5Kē wo, “Mahē no motog tō Jopa en, nok tatay nen wah, no met nage qeleso no qoyqoy ēwē. Nage nan namalmal liwo, kē mēhēw tēqēl togolgol me qeleso net nētēy naqan̄qan̄yan vēvet tō nipyoy tēqēl how del alge.6No met hay lelo malmal en woqse haphap tuytuy del en, qeleso noqo, notok, nubus, nam̄at wa yatkelgi se, wa tiwag mi nahaphap bōg del wa nemen del, a geh alon en.7Tō naln̄e hohole mavan me hiy no so, ‘Hatig, Pita, wuh tegōm haphap geh nen ba gen.’8“Ba no wo, ‘!Nitog, Welan! No tit gen vēhte nage geh nen, veg kēy et wenwen te lengē wa nehet so gen.’9Tō no moyon̄teg lokse nohohole me den alge, a mavap so, ‘Nahaphap mey a Ḡod mak wenwen tō en, nēk nitog vavap so et wenwen te.’10Nage geh gōh mavan me vagtēl, tō nibah, wa tō namalmal tiwag mi vel haphap del alon en nivēykal lok alge.11“Togolgol lamahē nen, net vētēl mēdēn̄ me lēm̄ a no motogtog tō aē en. Net Tisisaria vitwag mēvētleg kēytēl me so lep no.12Ba Nuvu Yon̄ mavap me hiy no so, ‘Nēk nitog hiyey so dam kēytēl.’ Tō ige yathēthēngēn bul levete dam no van dēn̄ me Sisaria. Tō kemem qēt hay lēm̄ nonon net nan.13Tō kē nivasemlō me hiy kemem so kē met nin̄sel vitwag mavan me hiy kē, nitig a lelo ēm̄ nonon, ba mavap van hiy kē so, ‘Nēk vētleg noyoy n̄a Jopa hiy net vitwag nahan Simon Pita.14Kē so nivasem van noyoy hiy nēk mey a tavaēh vēh nēk tiwag mi ige del nōnōm.’15Nok qētēg hohole nen wah, Nuvu Yon̄ nihēw me hiy kēy qele a mēhēw tō me hiy kemem am̄ag.16Tō nok dēmlok nohohole nonon Welan a so, ‘Jon mavasugyon̄ kimi mi nēbē, ba Ḡod tavasugyon̄ kimi mi Nuvu Yon̄.’17Am̄ag, mahē a gēn mēdēmtig Welan Tigsas Kraēs en, Ḡod melep me Nuvu Yon̄ qeleso natapēva. !Ba Ḡod melep Nuvu Yon̄ van hiy kēy se! Bastō, ino et haytēyēh te so tigoy Ḡod.”18Tō ige tēlēm̄ yon̄ moyon̄teg bah nohohole gōh en, tō kēy et hohole hethet site hiy Pita ēgēn. Tō kēy lep kal nahan Ḡod, ba vap wo, “Nage gōh nēdēmdēm nan so Ḡod mitig helem̄ag ige mey a et Juw site, so wulyis nēdēmdēm nonoy so tēy nēh lap.”19Mahē ige lililwo Tujuw muwuh Steven wa makak tōqtōqyeg ige dēmtig a Jerusalem en, ige dēmtig m̄adeg mavan seleslen̄. Yatkel et den kēy mavan a yeh tewiwi, tō mēdēn̄dēn̄ geh Fonisia, Sayprus, tiwag mi Antiok. Tō kēy vavasemlō Noyoy Ēwē van hiy ige yatkelgi, ba a ige Juw vēlēs.20Ba yatkelgi den kēy, a nage Tasayprus wa Tasayrine en, kēy mavan dēn̄ Antiok, tō kēy qētēg hohole hiy ige Tikrik, tō vasemlō noyoy ēwē veg Welan Tigsas.21Namnen Welan apwoy, mak tō woqse et mēdēmtig. Tō kēy meleh namtevōy, tō mavan me ige non Welan.22Noyoy nan makalō, mēdēn̄ ige tēlēm̄ yon̄ n̄a Jerusalem en, tō kēy vētleg Banabas mavan Antiok.23Banabas mēdēn̄ me Antiok en, tō kē met vēglal so nasgōp non Ḡod mi kēy, tō kē memlaklak aē. Tō kē nihole biyin̄ kēy so tig netnet lēdēmtig nonoy van hiy Welan.24Banabas en, kē nam̄e et vitwag, kē nōyheg mi Nuvu Yon̄ wa nēdēmtig nonon namaymay. Tō kē mewseg woqse et se me hiy Welan.25Bahnentō Banabas nivan tasga Tarsus so nisok Sol.26Mahē a kē metsas Sol en, tō kē nivantēy lok kē me Antiok. Kōyō motog bēte wonwon vitwag, tō kōyō muqul tiwag mi nēm̄ yon̄ nan, wa vatvatgo woqse et. Tō ige tog lolqōn̄ a Antiok melep van nahay hiy ige dēmtig, tō kēy ōl totogyeg naha ‘Krēstēn’ van hiy kēy. 27Tō tege lamahē nen, ige et lēgēlgēg vivitwag mahatig den Jerusalem tō van tēqēl me Antiok.28Vitwag den kēy nahan Agabus. Kē nihatig tō nihohole nahap a Nuvu Yon̄ mavasemlō van hiy kē. Tō kē mavasemlō so namay liwo taqal namyam del. (Me atgiy en, namay nan mavan me lamahē a Kladius nēqēt mayanag goy ige Torom.)29Tō ige tin̄qoy mēdēmdēm so biyin̄ ige yathēthēy a togtō a Judea. Ba kēy movonm̄ēt so net vivitwag nilep van nēsēm haytēyēh a so kē telep vēh.30Tō kēy mak tatag. Tō kēy vēlsey tiwag nēsēm, tō hog van lemnen Banabas kōyō Sol, tō kōyō van tēy tō hog van lemnen ige lililwo ne ēm̄ yon̄ n̄a Judea.
The Seed Company