1 Tesalonika4

1Sōwlē, yēhē bulsal, kimi ak malaklak Ḡod heylō lēmētwumi a kamtēl mavatne tō kimi aē. Tō kemem vēhge kimi, wa vahiy maymay kimi lahan Welan Tigsas so kimi ak maymay malig se van nēmētwumi.2Veg kimi nēglal galsi navatvatne mey a kemem mavatne tō kimi aē lahan Welan Tigsas.
3Ḡod nemyōs so kimi so yon̄. Atmi vayak den namtehal ne legleg soloteg.4Kē nemyōs so kimi vatne lok kimi lemtehal mey kimi liwo goy nataqn̄imi, tō kimi totog vēh lemtehal mey noyon̄, wa lēdēmap. 5Tō nitog dēmdēm maymay meh van hiy nēdēmdēm ne togay het, qeleaso ige lolqōn̄, a kēy et ēglal te Ḡod.6Nitog akak nehet hiy ige yathithimi wa yatētētami. Veg Welan tēvēvēg ige del bubug geh anen, qele a kamtēl mavap tō van hiy kimi, tō mavap vētday tō kimi aē.
7Veg Ḡod et ōlōl te gēn so gēn so gengenyeg, ba so gēn so yon̄.8Bastō ihēte a niyon̄yon̄vavaleh navatvatne nan en, kē et yon̄yon̄vavaleh te net vēlēs, ba kē niyon̄yon̄vavaleh Ḡod, im̄ey a melep van Nuvu Yon̄ nonon hiy kimi.
9Basnentō yēhē yathithik, kemem et vap dēmsas lok tetō kimi batamtam, veg kimi mahgemi mēglal den Ḡod qeleave tō kimi tatam ige tegha.10Veg kimi natam galsi ige yathithimi del n̄a Masedonia.
Tō kemem vahiy maymay kimi so kimi ak maymay malig se van.
11Atmi tig maymay lēdēmdēm nonmi tō so kimi totog yoyon̄ mi nēdēmap. Atmi nitog hesōsōn̄ lemgumgu nonon ige tegha, ba etgoy galsi namgumgu nonmi vivitwag. Nitog vēhge vaga nēsēm wa negengen den ige tegha, ba itōk so etgoy kimi mahgemi. Tō mugumgu maymay qeleaso kemem mavatne tō kimi aē en,12tō so kimi tit matēg vēhte hiy net tegha. Tō nēmētwumi tetnenen van lengon ige lolqōn̄.
13Itōk, entō gōh kemem hohole se veg ige non Ḡod mey a mal mat vatag. Kamtēl nemyōs so kimi ēglal nahap a Ḡod tagaleg hiy kēy, wa tō kamtēl et buste so kimi so lolwon yeh meh qele ige lolqōn̄. Ige lolqōn̄ et dēmdēyē te nēh lap tiwag mi Tigsas.
14Ba gen nēdēmtig so Tigsas mamat, tō mahatig lokse, tō tavan lokse me. Bastō gēn nēdēmtig so ige a nēdēmtig Tigsas, ba kēy mal mat vatag en, kēy tahatig lokse. Tō Ḡod telep kal kēy tiwag mi Tigsas.
15Welan mavap mahgen tō lohohole nonon, tō kemem hohole hiy kimi qelegōh. Mahē Tigsas nivan lok me en, ige mey a mal mat vatag tavan hiy kē am̄ag, tō gēn mey a nēh leptō en, tavan hiy kē atgiy.16Veg Welan mahgen tēhēw tēqēl me den lōtōk mi nōlōl liwo. Wa mayanag liwo non ige in̄sel niōlōl, tō ige in̄sel ip natō so ōlōl ige sil non Ḡod. Tō ige a mal mat a nēdēmtig Kraēs en, kēy tahatig am̄ag.17Ba igēn mey a tog ēh leptō en, gēn tevey kal atgiy. Welan telep kal gēn tiwag mi kēy, tō so gēn del tēvēyhēgēt tiwag mi kē lemlēg alge.
18Veg bege gōh, atmi vahiy maymay lokse kimi mi nohohole agōh.

The Seed Company

https://app.library.bible/content/ae2bad925cc7f490