1 Pita5
1Yēhē tamatmayge bitigtig helem̄ag ēm̄ yon̄, nok so hole biyin̄ kimi. Veg ino se net bitigtig helem̄ag ēm̄ yon̄, wa no met noyon̄ memeh non Kraēs, wa ino se tuqultiwag lēlēn̄as a Ḡod tavasemlō.2Tō nok so vap van hiy kimi so, etgoy galsi ige sipsip non Ḡod. Ḡod mal m̄ōk kimi so etgoy ige nonon. Tō kimi so mugumgu malaklak mi navaksami, ba et bemgumguteg ēwē te, si beleplep sēm yeghuquy ēwē. Itōk so kimi mayanag goy kēy mi namyōs del nonmi.3Ige tēlēm̄ yon̄ a Ḡod mōm̄ōk kēy van lemnemi en, atmi tig helem̄ag kēy mi namakaliw ēwē nonmi, ba et bēmētwumi te mey namaymay.4Tō nōqōn̄ a Ḡod tavasemlō Nitiy Et Betetgoy sipsip en, kē tōm̄ōk liqtimi nōwō-ōyōy ne lēn̄as a nangon tit hay vēhte.5Qelese nen yēhē lōmlōmgep, atmi tog leln̄an ige tamatmayge, wa dēmbēbēw vaga. Veg,Ḡod niwulwulyis nangon den ige a dēmdēm liwo kēy,ba kē nileplep van nasgōp hiy ige a kēy dēmdēmbēbēw.6Bastō atmi dēmbēbēw, tō hag lap how leln̄an Ḡod, a namnen namaymay tō so kē telep kal kimi lōqōn̄ tenenen nan.7Vel lolwon nonmi en, ukēg veteg van hiy kē, veg vaga kē nidēmdēm veg kimi.8Atmi dēm m̄ōleg wa etgoy galsi kimi den natvale nonmi, Satan. Kē qele nalayon a nivanvan kēlkēl, nimomoy, wa nisoksok net so nikuy.9Tig netnet mi nēdēmtig nonmi so tigoy kē. Wa dēmsas so vel vōnō walēg lemyam ige yathithimi wa yatētētami, kēy yon̄yon̄teg ninhet se qele kimi en.10Dēm lok so Ḡod Besgōp Del en, kē may ōlōl kimi heylō Kraēs Tigsas, so van hay lēlēn̄as nonon a totogtog lap vaga. Me atgiy kimi yon̄ memeh busu tekelgi ēwē, tō Ḡod mahgen tōm̄ōk galsi kimi, tak maymay kimi, tavahiy maymay kimi, wa telep van nōgōygōyimi.11!Namaymay nivan lap van hiy kē vaga! Qeleanen.12No mayap neletes su gōh van hiy kimi heylō Silas. Ikē ēthēngēn mey a nok et van so kē nitiy et. No mayap neletes gōh so hole biyin̄ kimi, wa so vap lō so megōh nitiy sōgōp den Ḡod. Tig netnet lesgōp nan.13Nēm̄ yon̄ n̄a Babilon a Ḡod movonyak tō tiwag mi kimi en, kē nivap namlaklak hiy kimi. Wa intik se, a Mak, kē se qeleanen.14Vap namlaklak hiy kimi, ba pōpōn kimi mi natamtam.
Natm̄at notog tiwag mi kimi del a hay mi Kraēs.
Natm̄at notog tiwag mi kimi del a hay mi Kraēs.
The Seed Company