1 Samwele2mkw_wbt

Ane tondaka Yave

1Na yina, Ane sambilaka mutindu yayi:«Na Yave, mu ke na kilengi ya kulutila.Na Yave, mu me kuma na ngolo.Mu lenda kufungula yinwa na mantwala ya bambeni ya munu.Mu ke na kuyangalala samu ti, nge me sadisa munu.2Ata muntu kele ya longo mutindu Yave,Nzambi ya nkaka kele ve, kaka ni nge.Ya kele ve na ditadi ya ngolo yina ke tabilaka mutindu Nzambi ya beto.3Beno bika na kuzonza konso ntangu na lunangu.Beno zonza ve mambu yina kele ya buzitu ve.Samu ti Yave kele Nzambi yina zaba mambu nyonso.Mpe ni yandi ke fyongoninaka mavanga.4Munani ya binwani ya ngolo me zengana.Kasi bayina vwandaka ya kulemba me kuma na ngolo.5Bayina vwandaka kudya mbote,bawu ke na kusadila bantu ya nkaka samu na kuzwa kima ya kudya.Kasi bayina vwandaka kufwa nsatuke dyaka ve na nsatu.Kento yina vwandaka kisitame buta bambala nsambwadi.Kasi kento yina vwandaka na bana mingike na kubuta dyaka ve.6Yave ke salaka ti muntu kufwa,mpe yandi ke salaka ti muntu kuzinga.Yandi ke kulumunaka muntu na yinsi ya bantu ya kufwa,mpe yandi ke basisaka muntu kuna.7Ni Yave ke kumisaka muntu mputu,mpe ni yandi ke vwamisaka.Yandi ke kululaka mpe yandi ke zangulaka.8Yandi ke telemisaka muntu ya mpamba, yina ke ya kubwa na ntoto.Mpe yandi ke telemisaka mputu yina kele na mboloso .Samu na kuvwandisa bawu kintwadi na bantu ya mfunu.Yandi ke pesaka bawu kyandu ya nkembo mutindu difwa.Samu ti, makunzi yina ke simbaka ntoto kele ya Yave.Ni na zulu ya yawu, yandi tentikaka yinza.9Yandi ke kebaka bantu ya kukwikama.Kasi bantu ya yimbi ke zimbanaka na kati ya kitombe.Samu ti muntu lenda kununga ve na ngolo ya yandi mosi.10Yave ke nikaka bayina ke tediminaka yandi.Yandi ke dumaka kuna na dizulu samu na kunika bawu.Yave ke fundisa yinza nyonso.Yandi ke pesa lulendo na ntinu yina yandi ke byeka.Yandi ke bwela lulendo na ntinu yina yandi me soola.»
11Na manima, Elekana vutukaka na yinzo ya yandi, na bwala Lama. Kasi mwana ya yandi, Samwele, bikanaka kuna na Silo samu na kusadila Yave, na lutwadusu ya nganga-Nzambi Eli.

Bana ya Eli

12Bana ya Eli vwandaka bimpumbulu. Bawu vwandaka zitisa ve Yave.13Tala mutindu banganga-Nzambi yayi vwandaka sadila na mantwala ya bantu: Konso ntangu yina muntu vwandaka pesa munkayulu, kisadi ya nganga-Nzambi vwandaka kwiza ntangu ba vwandaka me manisa na kulamba mbisi. Yandi vwandaka kwiza na musoma ya bansongi tatu.14Yandi vwandaka tula yawu na kati ya nzungu ya kulambila: ya vwanda nzungu ya nene, to nzungu ya fyoti, to nzungu ya ntoto. Nyonso yina musoma vwandaka basisa na nzungu, nganga-Nzambi vwandaka baka yawu. Ni mutindu yina bawu vwandaka sadila na mantwala ya bantu nyonso ya Isayeli yina vwandaka kwiza kuna na Silo.15Ntete ti ba yoka mafuta ya kibulu, kisadi ya nganga-Nzambi vwandaka kwiza tuba na muntu yina vwandaka pesa munkayulu ti: «Pesa na nganga-Nzambi mbisi yina yandi ke yoka na tiya ya makala. Yandi ke ndima ve ti nge pesa yandi mbisi ya kulamba. Yandi ke ndima kaka mbisi ya nkunzu.»16Kana muntu yango tuba na yandi ti: «Beto yoka ntete mafuta.» Na manima, nge ke baka yina nge zola, kisadi vwandaka vutula na yandi: «Ve, pesa yawu malu-malu yayi. Kana ve, mu ke baka yawu na ngolo.»17Masumu ya bana yina ya Eli kumaka nene mingi na ntadisi ya Yave. Samu ti bawu vwandaka safula minkayulu yina bantu vwandaka pesa na Yave.
18Samwele vwandaka sala kisalu ya yandi na mantwala ya Yave. Yandi vwandaka ntwenya mpe yandi vwandaka na kifu ya kulwataka efode ya lino.

Dikanda ya Samwele

19Konso mvula, mama ya Samwele vwandaka tungila Samwele kiyunga ya fyoti. Yandi vwandaka natina yandi yawu ntangu yandi vwandaka kwenda kintwadi na bakala ya yandi na Silo, samu na kupesa munkayulu ya konso mvula.20Eli vwandaka sakumuna Elekana na kento ya yandi na kutuba: «Bika ti Yave kupesa dyaka nge bana na kento yayi, samu na kuyingana na kisika ya mwana yina Ane pesaka na Yave.» Na manima, ba vutukaka na yinzo ya bawu.21Yave lakisaka bumbote ya yandi na Ane. Ane kuzwaka dyaka bivumu ya nkaka, mpe yandi butaka dyaka bana tatu ya babakala na bana zole ya bakento.
Ntwenya Samwele vwandaka kula na mantwala ya Yave.

Nganga-Nzambi Eli sembaka bana ya yandi

22Eli vwandaka me nuna mingi. Yandi kuwaka mambu yina bana ya yandi vwandaka sala na sika ya bantu nyonso ya Isayeli. Yandi kuwaka mpe ti ba vwandaka vukisa mfulu na bakento yina vwandaka sala na mwelo ya Yinzo ya Mbwabanu.23Yandi tubaka na bawu: «Samu na yinki beno ke na kusala mambu ya mutindu yina? Mu ke na kuwa na bantu nyonso mambu ya beno ya yimbi, yina beno ke na kusalaka.24Ve, bana ya munu. Mambu yina mu ke na kuwa kele mbote ve. Beno ke na kusala ti bantu kusala masumu na ntadisi ya Yave.25Kana muntu me sala disumu na muntu ya nkaka, Nzambi ke vwanda nzonzi. Kasi, kana muntu me sala disumu na Yave, nani ke vwanda nzonzi ya yandi?» Bawu kuwaka ve mambu yina tata ya bawu zonzaka. Samu ti Yave kanisaka na kufwa bawu.
26Ntwenya Samwele vwandaka tatamana na kukula. Yandi vwandaka ya kuzolakana na meso ya Yave mpe na meso ya bantu.

Kitumbu ya Nzambi samu na Eli na dikanda ya yandi

27Muntu mosi ya Nzambi kwizaka tala Eli mpe tubaka na yandi: «Yave ke na kutuba: Ni munu ve salaka ti dikanda ya tata ya nge kuzaba munu na ntangu yina bawu vwandaka sadila Falawokuna na yinsi ya Ngipiti?28Mu soolaka dikanda ya tata ya nge na kati ya makanda nyonso ya Isayeli samu na kuvwanda nganga-Nzambi ya munu. Yandi fwana kukwenda na mesa ya maaka, samu na kuyoka maaka ya nsunga ya mbote. Yandi fwana kulwata efode na mantwala ya munu. Mu pesaka na dikanda ya tata ya nge kikunku na kati ya minkayulu nyonso yina bana ya Isayeli ke pesaka munu.29Samu na yinki beno ke na kusafula minkayulu mpe makabu ya munu yina mu tumisaka na kupesaka na yinzo ya munu? Samu na yinki nge ke na kuzitisa bana ya nge kulutila munu? Beno ke na kukuma nene na kudyaka bikunku yina me lutila mbote na kati ya minkayulu nyonso ya bantu ya munu ya Isayeli.30Ni yawu yina, Yave, Nzambi ya Isayeli, ke na kutuba: Mu tubaka ti dikanda ya nge na dikanda ya tata ya nge ke vwanda bantu ya munu ya seko. Kasi na ntangu yayi, Yave ke na kutuba, ya ke vwanda dyaka ve mutindu yina! Samu ti mu ke zitisa bayina ke zitisaka munu. Kasi bayina ke zitisaka munu ve, ba ke vwanda bantu ya mpamba.31Ntangu ke na kukwiza yina mu ke kufwa bantwenya nyonso ya dikanda ya nge, na ya dikanda ya tata ya nge. Ata muntu na dikanda ya nge ke nuna dyaka.32Ntangu mambu nyonso ke vwanda mbote samu na Isayeli, nge ke tala mpasi yina ke bwidila yinzo ya munu. Mpe ata muntu na dikanda ya nge ke kuma dyaka kiboba.33Mu ke sala ti muntu mosi ya dikanda ya nge kuvwandaka bantangu nyonso pene-pene ya kiyokolo ya munu ya minkayulu samu na kusukisa nge ntima, mpe samu ti kyese ya nge kumanisa. Bantu nyonso ya nkaka ya dikanda ya nge ke kufwa na buntwenya nyonso.»34«Mambu yina ke kumina Wofeni na Fineyase, bana zole ya nge, ke vwanda kidimbu samu na nge. Bawu nyonso zole ke kufwa kilumbu mosi.35Na manima, mu ke soola nganga-Nzambi mosi ya kivuvu. Yandi ke sadila mutindu kele luzolo ya munu. Mu ke pesa yandi dikanda yina ke zingila. Bantangu nyonso, yandi ke sadila munu na ntadisi ya muntu yina mu ke byeka.36Konso muntu yina ke bikana na dikanda ya nge ke kwiza fukimina yandi, samu na kusosa mwa ndambu ya mbongo na mwa kibuku ya dimpa. Muntu yina ke tuba: “Mulemvo ya nge. Pesa munu mwa kisalu na bisalu ya bunganga-Nzambi, samu ti mu banda na kuzwaka mwa kima ya kudya.”»
expand_more
Search