1Ih pel pwehng irai, “Ngoahi pwehng kamwai in mehlel, pwa epwi kamwai ma mine me, jehpirin mehdi, oaroh irai kapang wein Koahs ah pirin indoa in manman koalik.”
Jesus Lingla
2Mwerin rehn wonou Jesus ukda Peter, James apel John, ukdahla irai pohn dol illoahioau, pwa irai en kalahpwukla. Ih ken wikla mwohrai3Ah likkoauwok lingla pel korohrohla. Joh armaj men nehn jampah kak kakorohroihla likkoau doahroar me.4Sohnpadahk jilmenno kapangda Elijah apel Moses ara siksikesik oang Jesus.5Peter pwehng Jesus, “Jounpadahk, inenin mwehu asai minmine wijahkije. Kamai en kouda umpwal jiluh wijahkije, oau umwoamw, oau umwen Moses, a oau umwen Elijah.”6Irai majpwehkda, doahr ih ken jehjoahla pwa da ih en pwa.7Koasoau oau pwaindi irai; a ngilloau indihdo jang nehn koasoauwo, pwa, “Ioar Noai jermwein kajampwalwa me, kamwai rong Ih!”8Irai jipwoaljili ne johla armaj irai kapang pwen Jesus kalahpwuk.9Nehn irai indihdohjang pohn dollo, Jesus inoapwihdi irai en, “Johpwa pwehng emen da kamwai kapang, oaroh Nihn-Armaj iejda jang mehdi.”10Irai ken kapwaihahda da Ih pwa; irai ken sapda peipeidekpene nehn pwungarai ia woahwoahn lal kije, “Iejda jang ipen armaj mehdi kan.”11Irai idoak oang Jesus, “Amwda jounpadahk in Kojonneddok pwa Elijah uhdahn pirin sapin indoa?”12A Ih japoang irai, “Mehlel, Elijah uhdahn pirin sapin indoa pwa en koaunopda me ohroj. A amwda Puk Joarwi pwahki pwa Nihn-Armaj pirin oaloa loklok koalik apel wia mwahlla?13A Ngoahi pwehng kamwai, Elijah ne indoa a armaj kan wiahng me ohroj ma irai mwehuki, doahroar ma ne insingdi nehn Puk Joarwi.”
Jesus Kemwehuwihla Jermwein men ma Ngen Nauna Dilingla
14Anjoauwo irai lellahng ipen epwi Nah sohnpadahkkok, irai kapangda pokon koalik oau ma pidekihpene irai. A jounpadahk in Kojonneddo pwi akkakmaihoang sohnpadahkkok.15Nehn armajjok ahr kapangda Jesus, irai inenin pwuriamweikihla irai kijoupene rahnmwahuwi.16Jesus idoak ipen sohnpadahkkok, “Da kamwai akkakmaikihoang irai?”17Emen sohn pokonno japoang, “Maing, ngoahi wahdohng koawoa noai jermweinne ma ngen jaus dilingla ken jehjoahla lallal.18Anjoau ohroj ma ngenno kin dilingla ih, ih kin kipdihoang nehn pwirej, nehn oawoa kin pwuroarda, keikeikeisakai, a palwoaroa kin dengla. Ngoahi pwehng nihmw sohnpadahk kai irai en kauj jang ngen jausso, a irai johkak.”19Jesus japoang irai, “Kamwai inenin joah pwojon! Ia woaroai in Oai pirin minmine ipamwai? Ia woaroai in Oai pirin kanangmahioang kamwai? Kamwai wahdohng Ngoahi jermweinnen!”20Irai ken wahdohng jermweinno ipoa.Ngen jausso kapanngoar Jesus, a ih sihda pohn jermweinno, karoarroarihda, kapkihdihoang nehn pwirejjo, kasahpwroahjili oaroh pwuroarda nehn oawoa.21Jesus idoak ipen jamahu, “Ia woaroai in ah wihwia joanngoauwe?”A jamahu pwehng Jesus, “Jang oh in ah siksik, Maing.22A pehn dir ngen jausso kin nimen kojukdi ih nehn ah kin peiddoang ih nehn oai apel nehn pil. Mahkoahng kama, jeuwejehda kama, ma koawoa kak.”23Jesus ken pwehng ih, “‘Ma koawoa kak?’ Me ohroj kak pwoaida ipen inje ma pwojon.”24Nehn anjoauwohr jemen jermweinno pwehng Jesus, “Maing, ngoahi pwojon. A johpwa isar. Koawoa en jeuweje kakoalikihla oai pwojon.”25Nehn en Jesus kapangda doahr pokonno ne diddiddirla Ih ken weringda ngen jausso, “Koawoa, ngen pongpong apel jehjoa lallal, injang ipen jermweinnen. Johpwa pwuroahng dilloang nehn ih.”26Ngen jausso rahula, peiddi jermweinno nehn pwirej, diljang nehn ih. Jermweinno doahrla armaj mehdi men, epwi ken pwahpwahpwa pwa, “Ih ne mehdi.”27Jesus ken koldi poah jeuweje kauhda jermweinno.28Jesus dilda nehn ummwo kalahpwukla. Nah sohnpadahkkok idoak Ipoa, “Amwda kamai ke johkak kaujjang ngen jausso ipen jermweinno?”29A Ih japoang irai, “Joangoan ngen jaus oauwe johkak kajroahkjang, a ioarroar kapkap.”
Jesus pel Pwuroahng Kohpda doahr Ah pirin Mehdi
30Jesus apel Nah sohnpadahkkok injang wijahu, kosehla wein Galilee. Jesus johpwa nimen armaj kan en kidal doahr Ah mwoakid kan.31Pwa Ih kin kawoahwoa oang Nah sohnpadahkkok: “Nihn-Armaj pirin ken likliklahng ipen armaj kan, ma pirin kojukdi Ih. A mwerin rehn jiluh Ih pirin iejda.”32A irai johpwa woahwoahki da Ih pwehng irai, a irai pel mijik in idoak ipoa.
Inje ma Keiou Laplap
33Irai lel Capernaum nehn irai mwindi nehn ummwo Jesus kalelpoak iparai pwa, “Da kamwai akkakmaiki allaluhdo nehn allo?”34A irai johpwa japoang; pwa nehn allo irai akmaipene nehn pwungarai, ki inje ma keiou laplap.35Jesus ken mwindi pangindo sohnpadahk eijek roahmenno ipoa pwehng irai, “Ma emen in kamwai nimen koaunda a en minehla mwerin, en wiahla en ohroj papah.”36Ih ken oaloa jeri men kihdi nehn pwung irai; jupwurpene jeriho, Ih pwehng irai,37“Ma emen ma kin kajamwo emen jeri siksik pwiai in oadoaioa, Ngoahi ioar ma ih kin kajamwo; A ma emen ma kin kajamwo Ngoahi, jaudi Ngoahi oar doari ih kin kajamwo, apel Ih ma kadardo Ngoahi.”
Armajjok ma Johkin Uhwoang Kisai kin Uhpali Kisai
38John pwehng Jesus, “Maing Jounpadahk, kamai kapang emen ma pwili kaujjang ngen jaus kan in oadoammwen, kamai ken inoapwihdi pwa jaudi kijehmai ih.”39A Jesus japoang, “Kamwai joah kainoapwihdi, pwa joh armaj ma kin wia manman in oadoaioa kak lahlahwe Ngoahi40Pwa emen ma johkin uhwoang kisai kin uhpali kisai.41Ngoahi pwehng kamwai in mehlel, ma emen mihndahkihla mwoakin pil oau oang emen in oadoaioa, ih nen uhdahn oaloa dupkoa.”
Doahroar Kahrehioang Emen nehn Dihp
42“Ma emen ma kahrehioang jeri siksik pwiai ma kin pwojon Ngoahi en wiahda dihp, mwehuwoang oau sakai koalikko en pirapirroang in sipinwoaroa, kapwuhrihekla nehn madauwo.43Ma oaloap poahmmwen kahrehioang koawoa nehn dihp, poaloahjang; pwa mwehu oang koawoa loapinpoa dilda nehn mour joahsuk jang poa riau peidek oang nehn ehl,44[wijahu ma arai mwajjok johkin mehdi, a oaiho johkin kunla.]45A ma oaloap pwoalkoamwen kahrehioang koawoa nehn dihp, poaloahjang; pwa mwehu oang koawoa en loapin e dilda nehn mour joahsuk jang e rahpas peidek oang nehn ehl,46[wijahu ma arai mwajjok johkin mehdi, a oaiho johkin kunla.]47A ma oaloap pwoaroan mijoammwen kin kahrehioang koawoa nehn dihp, roahkjang! Mwehu ma koawoa loapin pwoaroan maj dilda nehn wein Koahs jang pwoaroan maj riau a peidek oang nehn eh,48wijahu ma arai mwajjok johkin mehdi a oaiho johkin kunla.49“Armaj ohroj pirin mwakelkelkihla oai, doahroar meiroang kan kin mwakelkelkihla jed.50Jed mehkij ma mwehu; a ma nimen jeddo johla, da kamwai kak wiahng pwa nimen jeddo en pwuroahng minehda? Amwai mour en mwehu anjoau ohroj doahroar jed, a kamwai nen injenmwahupene nehn pwungamwai kan.”