1Nehn anjoauwo mine armaj pwi wijahu ma pwehnglahng Jesus da ma wiawi oang mihn Galilee pwi, ma Pilate kojukdi nehn ahr wihwia arai meiroang kan oang Koahs.2Jesus japoangkihla irai, “Kamwai lemleme pwa mihn Galilee pwiai, ma mehkihdi joangoan kojkojjoauwe, ihr uhdahn armaj dipan naunahjang mihn Galilee‑ok ohroj?3Joah dauluhl! Kamwai en kidal pwa ma kamwai johpwa kerpwihla dipamwai kan, kamwai ohroj nen pel mehdi doahroar irai.4A imdoahr woal eijek walmennok ma wijahn iroir in Siloam kipdi pohrai, kojukdi irai. Kamwai lemleme pwa me kadehdehda pwa irai nauna jang armaj ohroj ma kin koaujoan Jerusalem?5Joah dauluhl! Kamwai en kidal pwa ma kamwai johpwa kerpwihla dipamwai kan, kamwai ohroj nen pel mehdi doahroar irai.”
Karajraj in Suhkoa Fig ma Joh Wah
6Jesus pel pwehnglahng irai karajraj pas, “Mine armaj men ah suhkoa fig pas mine nehn ah mwoaswello. Ih inlahng doli wah, a johpwa wah oau ih kapangda.7Ih pwehng nah jounmwoaswello, ‘Kapang pwa ne johnpar jiluh ngoahi indoa kapkapang wehn suhkoa fig pase, a joh mehkij ngoahi kapangda. Poaloahdihjang! Joh kaspoan a mohmohmourki pwirejje.’8Jounmwoaswello japoangkihla woallo, ‘Maing, mweidoahng mijkoalkoal ma ih joah nehn uhwa nehn johnpar oauwe. Ngoahi pirin jaripdi koiaji pidekihpene suhkoahu.9Ma ih pirin uhwa nehn johnpar allaluhdo, a mwehu; a ma joah, koawoa kapwa mweidoahng en poalpoaldi.’”
Jesus Kemwehuwihla Li Johmwehuki Sihn men Rehnin Sabbath
10Rehnin Sabbath oau Jesus wihwia Ah padahk nehn jinakoke oau.11Lihmen pwili mine wijahu, ma ngenin johmwehu dilingla ih oaroain johnpar eijek waluh ma kahrehda ih johmwehu. Liho johmwehuki sihn, kojpene, johkak inenda.12Nehn en Jesus kapangda liho, Ih pwehnglahng, “Li, koawoa en mwehuda jang oamw johmwehu!”13Ih ken kihdahng poahk pohn liho, a nehn anjoauwohr liho ken inenpijoang apel uhda kapkapnga Koahs.14Koaun in jinakokehu lioaskihla en Jesus kemwehuwihla lihmene rehnin Sabbath. Ih uhda pwehng pokonno, “Mine rehn wonou ma kisai en doadoahk; a ioar rehn koa ma kamwai en indoa pwa kamwai en kin oaloa kasihkeipamwai, a jaudi rehnin Sabbath!”15Koaunno japoangkihla ih, “Mwalaun kamwai! Jaudi kamwai ohroj kin jaladda kahu mwein ke ejel jang nehn dohiarai apel ukla irai oang in pil pwa irai en nimpil rehnin Sabbath.16A lihmene ma kadaudok en Abraham ma ne joajjoajjoalki ipen Jehsen johnpar eijek waluh; a joah koanoahng ih en lapwda jang nehn ah joal rehnin Sabbath?”17En Jesus pajpoang oauwe kajarohdi irai ohroj ma uhwoang, a armaj ohroj likin irai perenkihda wihwia kapwuriamwei ohroj ma Ih kin wiahda.
Karajraj in Liporro in suhkoa ma Keiou Siksik
18Jesus pel pwa, “Dahkij Wein Koahs doahroar? Dahkij Ngoahi kak karjahkihoang?19Ih doahroar liporro mustard oau ma armaj men oaloa apel poadokdi nehn ah mwoaswello. Liporro siksikko koapda wiahla suhkoa pas, mahnsang kan kin koammoal nehn rah kan.”
Karajraj in Ihs
20Jesus pel idoak, “Da Ngoahi en karjahioang Wein Koahs?21Ih doahroar me: lihmen oaloa ihs kij doaloahkihda pilahwa koalik kij, pilahwahu ken pwoaipijoang.”
Wanihmw Soahsiksik
22Jesus allaluhlahng nehn kahnihmw apel koujapw kan padpadahk oang armaj kan nehn Ah allaluhlahng Jerusalem.23Armaj men idoak oang Ih, “Maing, mehlel pwa armaj jipidpwi oar pirin mourla?” Jesus japoangla irai,24“Kamwai engdehn in alu nehn wanihmw soahsiksikko; pwa Ngoahi pwehng kamwai, armaj ngoadoar pirin jong dilda, a irai pirin johkak.25Nehn en koaun in umw men ah pirin uhda apel risingdi wanihmw in umwahu, kamwai pirin mine likin apel lesles apel pwa, ‘Maing, risingdahng kamai.’ Ih pirin japoangki kamwai, ‘Ngoahi jehjoa mihn ia pwi kamwai.’26Kamwai pirin japoangki, ‘Kamai ma pwili koawoa mwinge apel nim, apel koawoa ma ne padpadahk nehn amai kahnihmw!’27Ih pirin pel pwehng kamwai, ‘Ngoahi pel jehjoa ia wija kamwai injang. Kamwai alwehjang ngoahi, kamwai ohroj armaj mwoarjuwed pwi!’28Ia woahr amwai pirin joang apel keikeikeisakai nehn amwai pirin widahli Abraham, Isaac, Jacob apel joukohp ohroj nehn Wein Koahs, a kamwai pirin kerpwihek jang loaloa!29A mihn palimese apel palikapi, mihn paliepeng apel palieir, pirin wud indoa mwindihoang kamdipw nehn Wein Koahs.30Kamwai en kidal pwa iraihok ma mwerin anjoau oauwe, irai pirin mijoahla anjoauwo; a armaj in mijoa kan apkas irai pirin mwerinla.”
En Jesus Limpoak oang Jerusalem
31Nehn oar anjoauwo Pharisee pwi pwokdohng Jesus apel pwehng, “Maing, Koawoa pirin uhdahn injang me, inlahng ekij wija sohrohr, pwa Herod nimen kojukdi Koawoa.”32Jesus japoangla irai, “Kamwai alwe apel pwehng fox menen: ‘Koawoa en kidal pwa rehn oauwe apel lakapw, Ngoahi pirin kauj jang ngen jaus kan ipen armaj kan, kemwehuwihla johmwehu kan; apel nehn kajiluh in rehn Ngoahi pirin kadoarihla Oai doadoahk.’33A, rehn oauwe, pel lakapw, pel pali, ma Ngoahi uhdahn allaluhla; pwa joh wijahkij koanoahng joukohp men kin kojkojdi likin Jerusalem.34“Jerusalem, Jerusalem! Koawoa ma kin kojukdi joukohp kan, apel kin kasoahki sakai jounpakair kan ma koadoaddoardohng koawoa! Ia woahr koalik in Oai nimen jupwurkihpene poaihoa kai nihmw armaj kan, doahroar jummwa pein men kin pwainkihpene nah kan pehn poah kan, a koawoa kia mweidoahng Ngoahi!35Doari, pirin johla sohn oamw Umw Joarwihen! Koawoa en kidal pwa koawoa johla pirin kapang Ngoahi, oaroh lel anjoau ma koawoa pirin pwa, ‘Koahs en kapaiahda Ih ma indoa in oadoan Koaunno!’”