Romans10

1Yâuf pez lex, yaz nyăngz nyâuđ njaf oix nyăngz cloon yaz cloo Zâu Tênb-Huungh tayv phunz I-sa-la-ên munh nyăngz wac, six oix nongc phunz stiz tuz njâuv.2Wâyc yaz ayx zanyx manyf phunz stiz coong stiz joomz nyâuđ Zâu Tênb-Huungh nzongf, six yâuc pyac nyâuđ longđ.3Wâyc max manyh pec Zâu Tênb-Huungh nyăngz peengh stimz, yâuc âyz jab bix cănh njăpc stiz nyăngz peengh stimz, wâyc nây stiz songđ max buc yămz Zâu Tênb-Huungh nyăngz peengh stimz.4Wâyc Zâu Jix-Tuz six ayx phunz gâyf njanh soongb nzuf, phunz muif lanh zen nyăngz munh tuz stunx ayx peengh stimz.5Wâyc Mô-sê ja coong tauv yămz gâyf njanh taih nyăngz peengh stimz, coong: “Laiv lanh ayx âyz nâyx đomc jau, nănh six tuz păngc nây bix săngh.”6Six păngc zen stimz nyăngz peengh stimz six coong ayx nâyx: “Năngx gâyf coong ănz mâyh nyăngz nyâuđ coong: ‘Mănv cayx staox guungh ninyh?’ (nây six, nongc ênz Zâu Jix-Tuz nzac);7max six coong: ‘Mănv cayx nzac ngoom đôz ninyh?’” (nây six, nongc ênz Zâu Jix-Tuz tăng tayc staox taih).8Năngđ nây, wax wax đomc jau six coong ayx laix? “Wac yămz stătx mâyh nzongf, yămz mâyh nyăngz nzetx yâuc yămz mâyh nyăngz nyâuđ.”
Nây six buz nzônh coong zen stimz nyăngz wac.
9Năngđ coong nyâuh nongc nyâuh nyăngz nzetx nhlimc Zâu Yê-su ayx Zâu, nzof yămz nyâuh nyăngz nyâuđ yâuc zen coong Zâu Tênb-Huungh ayx phunz Nănh tăng tayc săngh taih, nyâuh songđ tuz njâuv.10Wâyc zuc laiv lanh nongc nyâuđ zen six tuz stunx ayx peengh stimz, nzof laiv lanh nongc nzetx nhlimc six tuz njâuv.11Wâyc Canyx Stâub coong: “Laiv lanh zen caođ Nănh six max zuc nyayz.”12Wâyc Yu-tai munh cloon Hi-lapc munh six max cănh lanyc; wâyc songc ah Tauh Zâu six muif lanh munh nyăngz Zâu, laiv lanh munh joođ Nănh, Nănh six sađ pôz phunz.13Wâyc “laiv lanh munh êu Zâu nyăngz manyh, songđ tuz njâuv.”14Ha nâyx, stiz max zeengx zen bix ayx laix hayh êu tauv Nănh? Nzof stiz max zeengx tuz numđ lănv tauv Nănh bix ayx laix hayh zen? Max naih munh ninyh nzônh gâyf, stiz bix ayx laix hayh tuz numđ?15Nzof năngđ coong max naih mănv tuz paiđ ninyh bix ayx laix hayh nzônh gâyf? Năngđ naih wac ja, coong: “Nzônh cuđ jenx munh nyăngz staux pên senz quai nzongf!”
16Manyf nâyx, six max zâyf muif lanh munh mungv âyz Cuđ Jenx. Wâyc I-sa-ya coong: “Zâu lex, naih mănv zen buz nzônh nyăngz wac heh?”17Wâyc nây, munh naih zen stimz six tăng stiz tuz numđ, nây tuz numđ nyăngz six numđ tăng munh nzônh Zâu Jix-Tuz nyăngz wac.18Six, yaz joođ naic: “Zâyf stiz max zeengx tuz numđ max?” Senz nyăngz six, “Wax đomc nzônh gâyf munh nyăngz stingb naih nhlangđ pong nây guungh đi, nzof stiz nyăngz wac yâuc ninyh tauv zomc guungh đi.”
19Yaz zef joođ naic: “Ha six I-sa-la-ên munh bix max saz tuz mah?” Tah yetx, Mô-sê coong: “Yaz six ayx phunz nyâuh numđ nhlenx tăng max zâyf songc ah huungđ pec stingx nyăngz munh. Yaz six nongc tăng ah huungđ pec stingx max naih tongb manyh taih nhlef ayx phunz nyâuh numđ nhlenx.”
20Nzof I-sa-ya, nănh yâuc pungx stimz coong: “Max lov Yaz wax đomc munh yâuc tuz pongh Yaz, Max zah naic Yaz wax đomc munh Yaz yâuc phunz pâyz.”
21Six coong tauv I-sa-la-ên munh, Nănh yâuc coong: “Yaz stuungb Yaz nyăngz puf quaix noib, huungv quaix ah stingx nyâuđ nhlengc cloon max mungv wac nyăngz munh ninyh.”

FAR EAST BROADCASTING COMPANY

https://app.library.bible/content/4031cf477b55913c