Philippians3
1Six yaz nyăngz yâuf pez lex, blătc quaix đangz, oix zuc numđ nyađ yămz Zâu. Yaz songđ max numđ wâyb luungđ bix ja nâyx đomc wac phunz nyâuh, wâyc nây six phunz nyâuh tuz gongx.2Oix zuc bôngh wax đomc clô, oix zuc bôngh wax đomc okx nyăngz cumh pâuz munh, oix zuc bôngh ayx za quaix catz nyăngz gâyf wax đomc.3Wâyc pănh six senz ayx quaix catz nyăngz munh — six păngc Zâu Tênb-Huungh nyăngz Singx-Lingh bix canyx bongc wax đomc munh, numđ nyađ ayx nzetx lub tanv yămz Zâu Jix-Tuz, yâuc max zâyf păngc yămz nây stinb a,4max cun yaz hănđ naih gâyf păngc yămz nây stinb a. Năngđ coong naih tix lanh munh numđ naih gâyf păngc yămz nây stinb a têx, yaz lôx zef naih năngx đuungx têx:5Yaz ayx quaix catz nyăngz gâyf yămz tah pêtz wax noib, săngh I-sa-la-ên munh, Bên-ya-min wax stingx, ayx Hipđ-lu munh, yâuc ayx Hipđ-lu munh nyăngz sây; yămz gâyf njanh wax phănc, six Pha-li-si munh;6nzof yâuc joomz nyâuđ ayx huđ ănz jiux pangx; nzof coong tauv peengh stimz âyz gâyf njanh six tuz stunx coong max naih tinc nzêmh.7Tinyh phanv laiv huungđ tuz stunx ayx saix yămz yaz tauv laiv, têx wâyc Zâu Jix-Tuz, yaz mangc stiz six max setb luungđ tiny.8Max zâyf cungb nâyx cuungv, yaz yâuc stunx muif huungđ six max setb luungđ tiny, wâyc zuc năngx saix quaix six tuz pâyz Zâu Yê-su Jix-Tuz, yaz nyăngz Zâu, wâyc Nănh yaz bix noođ stâyb nzuf muif huungđ — yaz stunx wax đomc six cayx năngđ njămc nzav nâyx — nongc phunz yaz hayh tuz Zâu Jix-Tuz9yâuc tuz yămz Nănh cah njaf, tuz stunx ayx peengh stimz, max zâyf wâyc yaz âyz gâyf njanh bix tuz stunx ayx peengh stimz, six wâyc zen caođ Zâu Jix-Tuz — six tăng Zâu Tênb-Huungh taih nyăngz peengh stimz tuz njăpc taih yămz zen stimz cah zâyc —10nongc phunz yaz hayh pâyz tuz Nănh, cloon Nănh săngh taih nyăngz tômx jab, yâuc cloon Nănh songc ah stinz jau tanyđ zâuđ, yâuc tuz cayx năngđ Nănh nâyx yămz Nănh tayc nyăngz jau,11hănđ ayx laix, yaz lauf hayh tuz tăng tayc săngh taih.12Nây max six zâyf coong yaz bâyf jau đai tuz stâuđ nyâyc, yâuc max zâyf coong bâyf jau đai tuz clăkx clunh nzuf, six yaz jinh đangh nzac jab tiuv ayx tuz phunz yaz hayh tuz stipx sâuđ nyâyc, wâyc nây yaz songđ lauf jau đai tuz Zâu Yê-su Jix-Tuz zab tuz yaz nzof.13Yâuf pez lex, yaz six max zâyf stunx coong yaz bâyf jau đai ninyh tuz toongz tauh. Six yaz njinh luh tiuv ninyh: quanyf nzuf muif huungđ ănz cah đangz bix huungv ninyh cah đangc wax phanx,14Si zac ninyh tauv tuz sâuđ nyâyc nyăngz tinc, phunz yaz hayh tuz stipx tăng Zâu Tênb-Huungh yămz Zâu Yê-su Jix-Tuz bix êu taih yămz wa cah zâyc guungh nyăngz sâuđ nyâyc.15Wâyc nây, tinyh phanv laiv lanh oix tuz lub taih clăkx clunh, six sămv zuc nyâyh ayx năngđ nâyx, nzof năngđ coong nyâuh cănh nyâyh pitc huungđ jau, Zâu Tênb-Huungh six lauf cănh hinđ manyf wax huungđ phunz nyâuh.16Six pănh hayh ayx tuz beengc laiv, six hoopđ zuc ninyh beengc wa.17Yâuf pez lex, oix zuc ayx âyz yaz nyăngz gao, nzof yâuc oix zuc mangc wax đomc jinh đangh ayx âyz nâyx huungđ gao nyăngz munh, cayx năngđ nyâuh phătc buz ayx nyăngz gao nâyx.18Wâyc yaz njinh leox lauf coong ănz nyâuh — nzof nâyx zanyf yaz zef haoh bix coong timb — naih đuungx lanh munh, stiz six jinh đangh yămz ayx cayx năngđ cay cloon Zâu Jix-Tuz nyăngz săpc đăngc zax ayx yônz zaz nâyx,19tauv stêtb mâyv wax đomc munh six zuc mêtc, stiz nongc stiz nyăngz nyâuđ ayx zâu, nzof stiz nyăngz gwăngz eeng six stiz ayx wax đomc nyayz nzongf nyăngz dlayc, stiz six cungb nyâyh nây bamh canz nyăngz cumh pâuz jau cuungv.20Pănh six cah zâyc guungh nyăngz pec stingx, yâuc tăng wa pănh bix numđ nyađ zu pănh nyăngz Njâuv Zâu, six Zâu Yê-su Jix-Tuz,21Nănh six wav pănh nâyx nomz stanc nyăngz stinb pênx gwăngz eeng nyăngz stinb cayx năngđ Nănh nâyx, âyz năngđ Nănh nyăngz tômx jab ayx phunz muif huungđ zuc buc Nănh nzuf.
FAR EAST BROADCASTING COMPANY