Matthew7
1Nyâuh năngx gâyf tingc munh nyăngz stoif, nyâuh nzăngđ max zuc tingc stoif.2Wâyc yămz nyâuh tingc munh nyăngz stoif ayx laix, nyâuh lauf zuc tingc năngđ wa nâyx, wâyc nyâuh gaob buc laiv phunz munh, six lauf tuz gaob buc wa lauf phunz nyâuh.3Săngh laix mâyh phătc mâyh nyăngz yâuf pez nyăngz mâyc cah njaf naih njămc stăm, bix max phătc mâyh nyăngz mâyc cah njaf naih ah cănv njăngx heh?4Mâyh laiv ayx laix hayh bux mâyh nyăngz yâuf pez coong: ‘Phunz yaz stăngc mâyh zoz mâyc njămc bex,’ bix mâyh nyăngz mâyc cah njaf jinh đangh naih ah cănv njăngx heh?5Pâyc zac nyâuđ yootz nyăngz munh lex, oix zuc zoz mâyh nyăngz mâyc wax cănv njăngx đangc, nzăngđ hayh phătc jau zoz mâyh yâuf pez nyăngz mâyc nzămc ayx queengx.6Nyâuh năngx gâyf phunz đăngb zeengh nyăngz tax huungđ phunz clô, yâuc năngx gâyf quanyf poou zâuz ănz tungf. Tungf cungb hayh zaiđ njenđ ănz wa staux đi cuungv, yâuc winb đangz lauf zeb tăpc nyâuh.7Oix zuc joođ, nyâuh nzăngđ tuz sađ phunz, oix zuc lov, nyâuh nzăngđ tuz phătc. Oix zuc nzoz jeengh, jeengh nzăngđ goib phunz nyâuh.8Wâyc tinyh phanv laiv lanh joođ six tuz; laiv lanh lov six phătc; laiv lanh nzoz jeengh, jeengh six goib.9Nyâuh naih tix lanh munh, nănh nyăngz sây naic nzu — nănh bix ninyh zoz njăuz phunz sây max six?10Max six tauh sây naic byauf, nănh bix ninyh phunz nangz sây heh?11Wâyc nây, năngđ coong nyâuh six, munh huđ, lôx năngx pâyz tuz phunz muif huungđ gongx nyâuh nyăngz sây, nyâuh nyăngz Pha yămz wa cah zâyc Tênb-toongh six lauf oix sađ phunz muif huungđ gongx nyăngz, phunz joođ Nănh wax đomc munh?12Năngđ nây, yămz muif huungđ dlayc, năngđ coong nyâuh oix nongc munh ayx laiv huungđ phunz nyâuh, nyâuh oix zuc ayx wax huungđ phunz munh, wâyc nây six gâyf njanh cloon tâuc wac munh nyăngz wac.13Oix zuc ninyh nzac jeengh găpc. Wâyc jeengh quăng jau lub six ninyh tauv zuc mêtc, yâuc naih munh đuungx yăngh nzac quaix wax tungđ jeengh.14Six jeengh găpc cloon jau jenz six ninyh tuz meengc săngh, naih munh stoc lov phătc wax stinz jau.15Oix zuc bôngh tauv za tâuc wac munh, six pâyb bah jiz yuungh đupx taih lov nyâuh wax đomc, six stiz nyăngz nyâuđ njaf six cayx năngđ njab clô cungb oix zeb tăpc.16Nyâuh mangc stiz nyăngz pyâu songđ pâyz tuz stiz gôh, max naih mănv ninyh wa nzim plungz zoz tungh cuđ pyâu, max six ninyh wa njăngx nzim zoz bănx tauh pyâu?17Lauf tinyh năngđ, wax đomc njăngx gongx six săngh pyâu gongx, njăngx huđ six săngh pyâu huđ.18Njăngx gongx max hayh săngh pyâu huđ, njăngx huđ max hayh săngh pyâu gongx.19Laiv zâyz njăngx max săngh pyâu gongx six zuc coix quanyf ănz tâuf.20Wâyc nây, nyâuh mangc tăng stiz nyăngz pyâu nyâuh six hayh saz tuz stiz gôh.21Max zâyf muif lanh êu yaz coong: ‘Zâu lex, Zâu lex’, bix tuz nzac Tênb-toongh côkz, six cungb ayx âyz yaz nyăngz Pha nyăngz zux ix yămz wa cah zâyc Tênb-toongh wax đomc munh cuungv.22Tauv wax noib naih munh đuungx six coong ănz yaz: ‘Zâu lex, Zâu lex, buz max zâyf nongc Mâyh nyăngz bux tâuc wac, nongc Mâyh nyăngz bux luiđ manđ yâuc nongc Mâyh nyăngz bux ayx đuungx huungđ jix caox njingc haz?’23Wax zanyf yaz six coong ănz stiz: ‘Yaz max pâyz nyâuh! Ayx huđ nyăngz munh lex, tiuv gâyh yaz gôh!’24Wâyc nây, muif lanh munh, tinyh phanv laiv lanh mungv yaz nâyx đomc wac bix âyz ayx, six pây năngđ ah lanh tongb manyh nyăngz munh, ayx nănh nyăngz pyau ănz njăuz pyây peengh cah zâyc.25Bungc lub nzac, womz lub cuutb, nzaox lub sâyb nzac wax sênz pyau, yâuc max lakb wâyc ayx ănz njăuz pyây cah zâyc.26Six laiv lanh mungv yaz nâyx đomc wac bix max âyz ayx, six pây năngđ ah lanh munh oongx munh, ayx nănh nyăngz pyau ănz wa njăuz staiz minc.27Naih bungc lub nzac, womz lub cuutb, nzaox lub sâyb nzac pyau, wax sênz pyau songđ lakb quaiz đuungx nzongf.”28Six, Zâu Yê-su nzaox nâyx đomc wac tuz, songx munh songđ numđ njingc Nănh nzaox nyăngz wac,29wâyc Nănh nzaox nyăngz wac six cayx năngđ naih lokc jangx, yâuc max năngđ stiz wax đomc nzaox gâyf stênx steengb.
FAR EAST BROADCASTING COMPANY