Matthew28
1Wax zanyf, blătc tingc congz noib, six gâyf paix nyăngz tah yetx noib bah đoomz tonx njâu, Mak-đa-la nyăngz Ma-li-ya cloon pitc tauh Ma-li-ya ninyh tex stâu.2Six phanv mangc, naih nib tongf niđ nzongf setb taih, Wâyc naih Zâu nyăngz stinz munh tăng guungh nzac taih tauv, clinyx wax nomz njăuz pyây yâuc stâyv wa cah zâyc.3Wax zanyf, stinz munh nyăngz hanyh jangx six cayx năngđ bungh bitc tâuf, nănh nyăngz guyz pec cayx năngđ toongb.4Nzof, wâyc wax tauh stinz munh nyăngz đănz tongf, wax đomc peengz songđ glinyf wa cayx năngđ munh tayc nâyx.5Six stinz munh coong ănz wax đomc munh nzif: “Nyâuh năngx gâyf cumh nzav, wâyc yaz pâyz coong nyâuh lov Yê-su, zuc tingz jămz wax Tauh.6Nănh max yămz nây đêh, Nănh tuz săngh taih nzof gôh, cayx năngđ Nănh coong nâyx. Staox taih geh, mangc tăpx Nănh ănz nyăngz tinc.7Mangc tuz bix phunb đangz muf, lănv bux phunz Nănh nyăngz stayb sây coong: ‘Nănh tuz tăng tayc săngh taih nzof. Phanv mangc, Nănh ninyh Ga-li-lê đangc nyâuh. Yămz wa nyâuh six tuz phătc Nănh.’ Mungv bex, yaz bux phunz nyâuh pâyz đangc nzof.”8Stiz songđ coonx setb stâu taih yâuc cumh nzav yâuc numđ nyađ nzongf, coonx muf bux ănz Nănh wax đomc stayb sây.9Six phanv mangc, Zâu Yê-su taih pongh stiz, yâuc coong: “Peengh oonz gôh bex!” Stiz songđ taih stătx, jom Nănh nyăngz staux yâuc paix Nănh.10Tăng wa, Zâu Yê-su coong ănz stiz: “Năngx gâyf cumh nzav. Oix zuc ninyh, bux ănz yaz nyăngz yâuf pez êu stiz ninyh Ga-li-lê, yămz wa, stiz six phătc yaz.”11Wax zanyf, stiz jinh đangh setb jau muf, Phanv mangc, wax đomc jămđ stâu peengz, nzac wa dlanyh muf, lănv nâyx đomc setb taih nyăngz dlayc ănz wax đomc stayb munh.12Wax đomc stayb munh songđ cloon wax đomc munh côx, căpx dlonf sangv soongb, songđ phunz nyanh đuungx phunz wax đomc peengz,13yâuc zăpx coong: “Oix zuc lănv coong: ‘Tauv đamx munf buz jinh đangh mâyc njoomh nănh nyăngz stayb sây bix taih nimc nănh nyăngz stayđ.’14Nzof năngđ coong nâyx đomc wac ninyh bux tauv quanz pyây pâyz, buz cănh căn nănh coong phunz nyâuh max zuc naih luungđ wac.”15Tăng wa, peengz stipx nyanh, songđ ayx âyz stiz zăpx wax đomc wac. Nâyx đomc wac yâuc tuz lănv quăng ninyh yămz Yu-tai munh, ayx tuz tauv nâyx yenh.16Wax zanyf săpc byetx lanh stayb sây ninyh tauv Ga-li-lê, ninyh tauv Zâu Yê-su bux phunz stiz wax nomz zoongz.17Tauv phătc Nănh stiz songđ canyx bongc Nănh, six naih ah phanx yâuc max zen.18Zâu Yê-su taih stătx căn stiz coong wac, yâuc coong: “Yămz guungh yămz nib nyăngz muif huungđ lokc jangx yâuc tuz jaoz phunz yaz nzuf.19Wâyc nây, nyâuh oix zuc ninyh bux manf stingx munh zen, yâuc tim Pha, tim Toonz, cloon Zâu Singx-Lingh nyăngz manyh ayx quaix-gâyf phunz stiz;20yâuc nzaox stiz ayx âyz yaz bux phunz nyâuh nyăngz muif huungđ. Mungv bex, yaz six cloon nyâuh yămz tuz tauv stêtb mâyv.”
FAR EAST BROADCASTING COMPANY