Matthew24
1Setb bongc Zâu Tênb-Huungh nyăngz pyau ninyh, Zâu Yê-su yăngh jau ninyh wax zanyf. Nănh wax đomc stayb sây taih stătx yâuc nuz phunz Nănh mangc wax đomc bongc Zâu Tênb-Huungh nyăngz pyau.2Six Nănh coong ănz stiz: “Nyâuh phătc lâyc đomc max? Yaz coong senz bux nyâuh, yămz nâyx six max naih laiv nomz njăuz tinyh clăpb lâyc bix max zuc bopc lakb.”3Wax zanyf, Nănh jinh đangh stâyv wa Ca-lan zoongz, wax đomc stayb sây cănh lanyc taih naic Nănh: “Joođ bux phunz buz pâyz wax đomc dlayc six laiv zanyf setb taih, naih laiv huungđ njic hoouđ phunz pâyz coong Zâu cayx taih cloon stêtb mâyv nyăngz noib?”4Zâu Yê-su tauz ănz stiz coong: “Oix zuc năngx cayb bôngh năngx gâyf phunz mănv ênz nyâuh ninyh longđ.5Wâyc naih đuungx lanh six đamz yaz nyăngz manyh taih, coong: ‘Yaz six Zâu Jix-Tuz,’ yâuc ayx phunz đuungx lanh munh ninyh longđ.6Tauv wa zanyf, nyâuh six tuz numđ tauv panx peengz yâuc numđ lănv panx peengz nyăngz jau. Nyâuh oix zuc năngx cayb bôngh, năngx gâyf nyâuđ lunc, wâyc nâyx đomc dlayc six oix zuc setb taih, yâuc max zeengx zâyf tauv stêtb mâyv.7Wâyc nâyx stingx six cloon wax stingx tinyh bopc, nâyx nomz côkz yâuc cloon wax nomz côkz bopc zax, yâuc naih nyâuđ sab cloon nib tongf yămz đuungx đoif.8Năngđ naz nâyx đomc muif huungđ dlayc six quef coonz nyăngz zâuđ nanc.9Tauv wax zanyf, munh six ayx huđ ănz nyâuh yâuc tayx nyâuh tayc, wâyc yaz nyăngz manyh nyâuh six zuc manf stingx munh hănđ.10Naih đuungx lanh six zuc ninyh longđ, lanh plănc minb ănz lanh yâuc lanh hănđ lanh.11Naih za tâuc wac munh đuungx six setb taih, yâuc ayx phunz đuungx lanh munh ninyh longđ.12Wâyc naih stoif nyăngz jau phutx staox taih, đuungx lanh munh tinyh stăngz nyăngz jau songđ nămx nzac.13Six laiv lanh tanyđ tuz tauv tauh tauv mâyv, wax lanh nzăngđ tuz njâuv.14Nây Tênb-toongh côkz nyăngz Cuđ Jenx six tuz lănv nzônh pong nây guungh đi nongc ayx zanyx manyf phunz manf stingx pâyz, tăng wa songđ tauv stêtb mâyv gôh.15Wâyc nây, tauv nyâuh phătc ayx phunz muif huungđ huđ nyăngz dlayc setb taih wax tauh, yămz wa đăngb zeengh tinc, âyz tâuc wac munh Đa-ni-ên coong tauv nyăngz jau” (mănv toc oix zuc saz),16“tauv wax zanyf, laiv lanh yămz wa Yu-đê stâyz phangz oix zuc tiuv staox jêmh ninyh,17laiv lanh yămz wa pyau tuungx, năngx gâyf nzac taih nongc zoz laiv huungđ setb pyau ninyh,18zef laiv lanh yămz wa njăngx năngx gâyf lauf pyau zoz cănh nyăngz guyz lub.19Yămz wax đomc noib, munh nzif naih stinb cloon năngx jinh phunz sây hopb nu wax đomc senz zuc zâuđ gôh!20Six oix zuc cloo Zâu phunz nyâuh tiuv nanc nyăngz noib lav năngx gâyf setb taih toix guungh song, max six toix tingc congz noib.21Wâyc tauv wax zanyf six naih zâuđ nanc lub nzongf, tăng zuyx guungh zuyx nib staox taih tauv nâyx zanyf, max zeengx naih quaix ayx năngđ nâyx setb taih, blătc wa yâuc max naih gôh.22Năngđ coong max tob wax đomc noib stoc nzac six max naih laiv lanh tuz meengc setb. Six wâyc tuz sên taih nyăngz munh, wax đomc noib six tuz tob nzac.23Tauv wax zanyf, năngđ coong naih munh bux ănz nyâuh, coong: ‘mangc geh, Zâu Jix-Tuz yămz nây!’ max six ‘Yămz wa!’ nyâuh six năngx gâyf zen.24Wâyc naih wax đomc za Njâuv Zâu cloon wax đomc za tâuc wac munh setb taih ayx jix caox njingc cloon njic hoouđ lub nongc jaf munh, năngđ hayh jaf tuz six njinh jaf cloon tuz sên taih nyăngz munh.25Phanv mangc, yaz bux phunz nyâuh quaix đangc nzof bex.26Wâyc nây, năngđ coong munh coong ănz nyâuh: ‘Phanv mangc, Nănh yămz wa stâyz phangz blănf,’ nyâuh six năngx gâyf ninyh wa. Max six ‘Phanv mangc, Nănh yămz wa pyau njaf,’ nyâuh six năngx gâyf zen.27Wâyc bungh bitc tâuf tăng tongz pôngz nzăpc ninyh tauv staiz pôngz năngđ laix, six Bamh Munh nzac taih wax zanyf lauf năngđ wa nâyx.28Tinyh phanv laiv tix naih munh tayc, nooc ưngx af songđ nzoomf yămz wa gôh.29Six tauv wax đomc zâuđ nanc nyăngz noib lav ah quaix, bah noib six nzămc jaz ninyh, lav yâuc max siux gwăngz, wax đomc stingz tau six tăng guungh tuih nzac taih, Yămz guungh naih jab nyăngz muif huungđ yâuc zuc đănz tongf.30Tauv wax zanyf, Bamh Munh nyăngz njic hoouđ six setb yămz wa cah zâyc guungh, guungh đi manf stingx munh yămz nây nib minc six yônx meengc haoh. Stiz six tuz phătc Bamh Munh yămz wa vănx nzac taih naih jab yâuc naih gwăngz eeng lub nzongf.31Nănh six paiđ Nănh nyăngz stinz munh pyom blungh blex stingb buib nhlangđ, stiz six sâub dlonf Nănh sên taih nyăngz munh yămz pyâyz phangz, tăng nâyx phangz guungh coonz ninyh tauv wax phangz guungh coonz.32Oix zuc hoođ ah tauh wac pây tăng bănx tauh njăngx. Laiv zanyf phătc quah setb tunb goib noomh, nyâuh songđ pâyz coong cayx tauv zunb dlih.33Lauf năngđ wa nâyx, laiv zanyf nyâuh phătc nâyx đomc dlayc, nyâuh songđ pâyz coong Nănh taih tauv stătx, yămz wa jeengh cah đangđ.34Yaz coong senz bux nyâuh coong, nâyx nzêuh munh six max quaix ninyh tuz tauv laiv zanyf wax đomc muif huungđ dlayc setb taih.35Guungh nib six quaix ninyh nzuf, six yaz nyăngz wac stâyv quâyx max quaix.36Năngx naih wax noib cloon wax săngx huđ six max naih laiv lanh pâyz, njinh wax đomc stinz munh yămz wa Tênb-toongh cloon Toonz lauf max pâyz, cungb Pha pâyz cuungv.37Wâyc Nô-ya wax nzêuh ayx năngđ laix, six tauv Bamh Munh taih lauf năngđ wa nâyx.38Wâyc yămz womz max zeengx yămx guungh đi wax zanyf, munh nhlinc hopb, maic sab zoz bongf tuz tauv Nô-ya nzac đangđ ninyh wax noib,39Stiz yâuc max pâyz luungđ ayx tuz tauv womz yămx taih cuutb stiz ninyh nzuf — tauv Bamh Munh taih six lauf năngđ wa nâyx.40Tauv wax zanyf, iz lanh munh pha yămz wa njăngx — ah lanh tuz ênz muf, ah lanh zuc queengx ănz wa.41Iz lanh munh nzif yămz wa quinz njăuz mac — ah lanh tuz ênz muf, ah lanh zuc queengx ănz wa.42Wâyc nây, oix zuc bôngh stimz wâyc nyâuh max pâyz tuz toix laiv noib nyâuh nyăngz Zâu taih.43Nyâuh oix zuc pâyz ayx nâyx coong, năngđ coong pyau zâu pâyz tuz laiv săngx huđ stac munh taih, nănh six bôngh stimz yâuc max phunz stac munh nzac nănh nyăngz pyau.44Wâyc năngđ nâyx, nyâuh six oix zuc bênc săngh zu, wâyc yămz nyâuh nyâyh max tauv nyăngz săngx huđ Bamh Munh six taih.45Wâyc nây, laiv lanh six nyâuđ zanyx naih tongb manyh nyăngz pâuz bix tuz zâu paiđ phunz nănh jămđ zâu nyăngz pyau munh nongc âyz săngx huđ bênc nhlinc hopb phunz stiz?46Năngđ coong nănh nyăngz zâu phunb đangz lauf, phătc wax tauh pâuz ayx âyz năngđ nâyx, six wax tauh pâuz senz naih oonz looc gôh.47Yaz coong senz bux nyâuh coong zâu six jaoz phunz nănh cun nzuf zâu naih nyăngz muif huungđ.48Six năngđ coong wax tauh pâuz bix huđ yâuc cănh yămz nyâuđ nyâyh coong: ‘Yaz nyăngz zâu bâyf max zeengx lauf căn,’49yâuc bopc cloon nănh ayx pâuz wax đomc toic, zef cloon wax đomc tiu binz munh songc nhlinc songc hopb,50wax tauh pâuz nyăngz zâu six lauf toix nănh max bôngh nyăngz noib cloon nănh max bôngh nyăngz săngx huđ.51Zâu six zoz nănh bopc niđ nzongf yâuc tingc phunz nănh cloon pâyc zac nyâuđ yootz nyăngz munh songc yămz; yămz wa six naih pungx stingb haoh yâuc tăpc nyah tanyđ.
FAR EAST BROADCASTING COMPANY