Luke18
1Tăng wa Zâu Yê-su coong ah cuyb wac pây, phunz stiz pâyz coong stiz oix zuc muif dlih cloo Zâu max setc tiny,2coong: “Naih ah nomz dlanyh naih ah lanh stămđ stoif quanz nănh max cumh nzav Zâu Tênb-Huungh, yâuc max nyangc mănv.3Yămz wax nomz dlanyh naih ah lanh munh nzif qua, wax tauh munh nzif njinh luh taih lov nănh, yâuc coong: ‘Joođ stăngc pob peengh stimz nyăngz jau phunz yaz cloon tămx yaz wax đomc munh.’4Joođ lauh nzof stămđ stoif quanz lauf max nyenc stăngc, six tauv blătc, nănh cănh nyâyh coong: ‘Yaz manyf max cumh nzav Zâu Tênb-Huungh yâuc max nyangc mănv,5Six wâyc nâyx lanh munh nzif qua njinh luh zenv yaz, yaz six peengh stimz pob wekc phunz nănh, phunz nănh max zuc njinh luh taih zenv yaz, ayx tuz tauv laiv zanyf yaz pob nâyx cuyb wekc tuz.’”6Tăng wa Zâu songđ coong: “Phanv mungv nâyx tauh max peengh stimz nyăngz stămđ stoif quanz coong nyăngz wac.7Năngđ nâyx, Zâu Tênb-Huungh max zâyf lauf pob peengh stimz nyăngz phunz Nănh sên taih nyăngz munh, six noib munf joođ Nănh wax đomc munh, bix Nănh yâuc max zeengx tauz stiz wax đomc haz?8Yaz coong bux phunz nyâuh coong Zâu Tênb-Huungh six coonx peengh stimz pob phunz stiz. Năngđ nâyx, tauv Bamh Munh taih Nănh six năngx lov tuz phătc zen stimz yămz nây bamh canz max?”9Tăng wa Nănh zef coong ah cuyb wac pây phunz ah phanx munh, six wax đomc munh cănh numđ stiz six ayx peengh stimz munh, bix mangc stam munh wax đomc:10“Naih iz lanh munh ninyh yămz bongc Zâu Tênb-Huungh nyăngz pyau cloo Zâu — ah lanh six Pha-li-si munh, ah lanh six sâub sôiv munh.11Pha-li-si munh cănh stâuđ wa cloo Zâu coong nâyx đomc wac ‘Zâu Tênb-Huungh lex yaz sâuf hâuđ Mâyh wâyc yaz max năngđ naih ah phanx munh — ayx stac, ayx max đăngb zeengh, yâuc ayx pongz lauh — yâuc max năngđ nâyx tauh sâub sôiv munh.12Ah nomz gâyf paix yaz njif nhlinc cloo zâu iz hâyđ. Yaz tuz nyăngz muif huungđ yaz yâuc pungx hoođ săpc phănc nyăngz ah phănc.’13Six wax tauh sâub sôiv munh stâuđ yămz côz côz, yâuc max nzađ zaub minb mangc cah zâyc guungh, poc wa puf tô nănh nyăngz cah lapc, yâuc coong: ‘Zâu Tênb-Huungh lex, joođ hâuđ lênh yaz, yaz six naih stoif nyăngz munh.’14Yaz coong bux nyâuh, nâyx lanh munh tauv phunb đangz muf nănh nyăngz pyau six tuz stunx ayx peengh stimz munh, max zâyf wax lanh, wâyc laiv lanh cănh zanyb nănh staox six zuc sămc nzac, nzof laiv lanh cănh nhlimc ayx jenz six tuz zanyb staox.”15Wax zanyf, naih munh ênz cloon wax đomc munh sây jenz taih phunz Zâu Yê-su, nongc phunz Nănh tăpx puf ănz, six phătc nâyx, stayb sây buz songđ coong wax đomc munh.16Six Zâu Yê-su êu stiz taih, yâuc coong: “Oix zuc phunz munh sây jenz taih lov yaz, năngx gâyf cangđ stiz. Wâyc Zâu Tênb-Huungh nyăngz côkz six săngh wax đomc munh năngđ nâyx đomc munh sây nâyx nyăngz.17Yaz coong senz bux nyâuh, tinyh phanv laiv lanh max stipx Zâu Tênb-Huungh nyăngz côkz cayx năngđ ah lanh munh sây jenz nâyx, wax lanh six max hayh tuz nzac Tênb-toongh côkz.”18Naih ah lanh ayx côx nyăngz munh naic Nănh coong: “Peengh stimz nyăngz stênx steengb lex, yaz oix zuc ayx luungđ nzăngđ tuz stâyv quâyx nyăngz mengc heh?”19Six zâu yê-su coong ănz wax lanh munh: “Săngh laix mâyh bix hipđ yaz ayx peengh stimz munh heh? Max naih mănv peengh stimz tinyh, cungb Zâu Tênb-Huungh ah tauh cuungv.20Mâyh pâyz gâyf njanh coong — năngx gâyf văngf munh, năngx gâyf tayx munh, năngx gâyf ayx stac, năngx gâyf ayx za zanyx manyf, oix zuc hâuđ lênh cănh nyăngz nzif pha.”21Wax tauh munh tauz: “Yaz tăng năngx jenz âyz nzuf nâyx đomc gâyf nzof.”22Six numđ ayx nâyx Zâu Yê-su songđ coong ănz wax lanh munh: “Mâyh năngx sămv ah huungđ. Oix zuc maic nzuf mâyh naih nyăngz muif huungđ bix nzâyz ninyh stăngc munh zâuđ munh, mâyh songđ naih jax dlaih yămz wa cah zâyc guungh — bix taih, lêpc yaz.”23Six tauv nănh numđ nâyx đomc wac, nănh songđ numđ stauh, wâyc nănh puv quâyx nzongf.24Mangc phătc nănh stauh, Zâu Yê-su songđ coong: “Puv quâyx nyăngz munh nzac Zâu Tênb-Huungh nyăngz côkz senz zâuđ nzongf!25Wâyc maf loh plunx quaix stimb bluyc lôx năngx hâyđ têx, pây cloon puv quâyx munh nzac Zâu Tênb-Huungh nyăngz côkz.”26Wax đomc munh yămz wa mungv numđ ayx nâyx, songđ naic coong: “Năngđ nâyx bix naih mănv hayh tuz njâuv heh?”27Nănh tauz coong: “Laiv huungđ bamh munh max ayx tuz, six Zâu Tênb-Huungh ayx tuz.”28Tăng wa Pi-tê naic coong: “Stayb pha mangc jađ, buz quanyf nzuf muif huungđ bix lêpc mâyh.”29Zâu Yê-su songđ coong ănz stiz: “Yaz coong senz bux nyâuh, laiv lanh wâyc Zâu Tênb-Huungh nyăngz côkz, bix quanyf pyau, au, yâuf pez, nzif pha, max six sây,30yămz nây yangh stâyv nănh six tuz stipx năngx đuungx têx, nzof đangz stâyv, yâuc tuz stâyv quâyx nyăngz mengc.”31Tăng wa, Nănh ênz săpc nyâyc lanh stayb sây ninyh lanyc, songđ coong bux stiz: “Mungv bex, pănh jinh đangh ninyh wa Yê-lu-sa-lem dlanyh, muif lanh tâuc wac munh ja coong tauv Bamh Munh wax đomc jau, six tuz ayx săngh nzuf.32Nănh six zuc jaoz phunz pitc stingx munh nyăngz puf đi, zuc pib mađ, zuc phătc stanc, yâuc zuc nzuv nzanh ănz.33Bopc Nănh tuz, stiz songđ tayx Nănh, six tauv wax noib pôz Nănh zef tuz săngh taih.”34Stayb sây buz max saz nâyx đomc wac, wâyc nâyx đomc wac six năngx jinh zuc pinyx, wâyc nây stiz max hayh saz tuz Nănh coong wax đomc wac.35Zâu Yê-su ninyh tauv stătx Yê-li-cô dlanyh, Naih ah lanh munh pha mâyc buđ stâyv wa jau sinh joođ nhlinc.36Nănh numđ munh đuungx pitb wa, nănh songđ naic mungv jađ naih laiv huungđ dlayc setb.37Munh coong bux nănh: “Yê-su Na-sa-leetx munh pitb nây.”38Tăng wa nănh hamv lub coong: “Yê-su lex, Đa-witx nyăngz sây stunz, joođ hâuđ lênh yaz.”39Ninyh đangc wax đomc munh mađ nănh, êu nănh gâyf nyaoc. Six nănh zef hamv năngx lub têx timb: “Đa-witx huungh nyăngz, sây stunz lex, joođ hâuđ lênh yaz.”40Tăng wa, Zâu Yê-su songđ yămf wa, êu ênz nănh taih stătx Nănh. Tauv wax tauh munh taih stătx, Nănh songđ naic wax tauh munh coong:41“Mâyh oix nongc yaz ayx luungđ phunz mâyh heh?” Wax tauh munh songđ tauz coong: “Zâu lex, joođ phunz yaz hayh mangc phătc jau.”42Zâu Yê-su songđ coong ănz nănh: “Oix zuc phătc jau gôh! Mâyh nyăngz zen stimz cănh zany phunz mâyh tuz gongx.”43Wax tauh munh pha songđ lênh dlih mangc tuz phătc jau ninyh lêpc Zâu Yê-su, yâuc tanv Zâu Tênb-Huungh. Phătc nâyx đomc dlayc munh songđ tinyh đoih tanv Zâu Tênb-Huungh.
FAR EAST BROADCASTING COMPANY