John2
1Tauv wax noib pôz, naih ah phangz coonx yămz wa Ca-na njăngv, Ga-li-lê stâyz phangz, Zâu Yê-su nyăngz nzif lauf yămz wa.2Zâu Yê-su cloon Nănh wax đomc stayb sây lauf tuz êu ninyh wa coonx hinh.3Tauv tiu gaib nzuf, Zâu Yê-su nyăngz nzif coong ănz Nănh: “Stiz tiu nzuf nzof.”4Zâu Yê-su songđ tauz nănh coong: “Nzif lex, nâyx đomc dlayc naih luungđ quenđ tauv yaz cloon nzif heh? Yaz nyăngz săngx huđ max zeengx tauv.”5Zâu Yê-su nyăngz nzif coong ănz wax đomc pâuz coong: “Nănh bux nyâuh ayx laiv huungđ bix ayx âyz bex.”6Yămz wa naih joz nomz njauz eengz six Yu-tai munh cănh lanyc nongc ayx stav wâyx nyăngz jau, ah nomz eengz ănz cox tuz iz pôz tongđ womz.7Zâu Yê-su bux stiz: “Oix zuc taox womz ănz wax đomc eengz năngx pong.” Tăng wa stiz songđ taox womz ănz eengz pong tekb têx beengc cah nzetx.8Zâu Yê-su coong ănz stiz: “Nâyx zanyf phanv quab setb taih, bix nzâyz ninyh phunz cun hinh nyăngz munh gôh.” Tăng wa, stiz songđ nzâyz ninyh.9Six tauv cun hinh nyăngz munh, zangđ wax đomc womz mungv songđ numđ pênx tiu (six nănh max pâyz tiu tăng laiv tix taih, six wax đomc pâuz — quab womz nyăngz munh — stiz pâyz), jămđ hinh nyăngz munh songđ êu săngb langh taih10yâuc coong ănz nănh: “Muif lanh munh six tinyđ tiu cuđ đangc, tauv zeb hopb binz, nzăngđ tinyđ tiu stam lêc. Six mâyh năngx njâuh tiu cuđ tuz tauv nâyx zanyf.”11Nây six tah yetx hâyđ Zâu Yê-su ayx jix caox njingc yămz Ca-na njăngv, Ga-li-lê stâyz phangz, Nănh hinđ manyf Nănh nyăngz gwăngz eeng, Nănh wax đomc stayb sây songđ zen Nănh.12Blătc wax đomc dlayc, Zâu Yê-su, cloon Nănh nyăngz nzif cloon wax đomc yâuf, yâuc cloon Nănh wax đomc stayb sây nzac wa Ca-bê-na-um dlanyh ninyh, six stiz lauf max yămz wa sax noib.13Cayx tauv Yu-tai munh nyăngz Pyenv Mengc Stêtz, Zâu Yê-su songđ staox wa Yê-lu-sa-lem dlanyh ninyh.14Nănh phătc yămz bongc Zâu Tênb-Huungh nyăngz pyau naih munh maic ngoongh wăngh, pax jiz yuungh cloon nooc coopz, yâuc naih cloon wănc nyanh nyăngz munh stâyv yămz wa.15Nănh nongc langb binf săngh ah stinz pya tuz, songđ luiđ stiz setb bongc Zâu Tênb-Huungh nyăngz pyau ninyh nzuf, njinh ngoongh wăngh cloon pax jiz yuungh, Nănh yâuc yamc wănc nyanh munh nyăngz nyanh zef njăpc cloon stiz nyăngz đah mâyf.16Nănh coong ănz wax đomc maic nooc coopz nyăngz munh: “Oix zuc nzâyz nâyx đomc setb cungh ngwaic ninyh căn. Năngx gâyf ayx Yaz Pha nyăngz pyau săngh maif maic nyăngz tinc.”17Nănh wax đomc stayb sây songđ săngx tauv naih wac ja, coong: “Yaz wâyc Zâu nyăngz pyau Joomz nyâuđ năngđ tâuf sac yaz nâyx.”18Wâyc nây, Yu-tai munh songđ tauz yâuc coong ănz Nănh: “Mâyh cayx ayx luungđ njic hoouđ phunz buz phătc, nongc stunx coong mâyh naih gâyf ayx nâyx đomc dlayc heh?”19Zâu Yê-su tauz, Nănh coong ănz stiz: “Zeb nâyx sênz bongc Zâu Tênb-Huungh nyăngz pyau gôh, pôz noib cah njaf yaz six zâyv nănh staox taih.”20Tăng wa, Yu-tai munh coong: “Nâyx sênz bongc Zâu Tênb-Huungh nyăngz pyau zâyv stâyx săpc guc nyăngv nzăngđ tuz săngh, mâyh bix zâyv nănh pôz noib cah njaf naz?”21Six, Nănh coong wax sênz bongc Zâu Tênb-Huungh nyăngz pyau six cănh coong tauv Nănh nyăngz stinb.22Năngđ nâyx, tauv Nănh tăng tayc săngh taih wax zanyf, Nănh wax đomc stayb sây songđ săngx tauv Nănh coong nâyx zâux wac, stiz songđ zen Canyx stâub cloon Zâu Yê-su coong nyăngz wac.23Zâu Yê-su yămz wa Yê-lu-sa-lem quaix Pyenv Mengc Stêtz wax dlapc, naih munh đuungx zen Nănh nyăngz manyh wâyc phătc Nănh ayx đuungx huungđ jix caox njingc nyăngz dlayc.24Six, Zâu Yê-su lauf max max mungc tauv stiz, wâyc Nănh pâyz muif lanh munh nzuf,25nzof Nănh yâuc max sămv zuc nongc mănv ayx zanyx manyf phunz toix laiv lanh munh, wâyc Nănh cănh pâyz nzuf muif lanh munh nyăngz nyâuđ.
FAR EAST BROADCASTING COMPANY