John17
1Zâu Yê-su coong nâyx đomc wac tuz songđ zaub minb staox guungh ninyh, yâuc coong: “Pha lex, săngx huđ tauv nzof. Joođ phunz Mâyh nyăngz Toonz tuz gwăngz eeng, Phunz Toonz lauf hayh ayx phunz Pha tuz gwăngz eeng,2wâyc Pha phunz Yaz naih lokc jangx cun muif lanh munh, Pha jaoz laiv lanh munh phunz Yaz, Yaz six sađ phunz wax đomc munh tuz stâyv quâyx nyăngz mengc.3Stâyv quâyx nyăngz mengc, six phunz laiv lanh munh pâyz Pha wax đomc, six senz nyăngz ah tauh Zâu Tênb-Huungh, cloon Zâu Yê-su Jix-Tuz, six Pha paiđ taih wax Tauh.4Yaz yămz nây bamh canz ayx phunz Pha tuz gwăngz eeng, yâuc ayx săngh nzuf Pha jaoz phunz Yaz ayx nyăngz cumh pâuz.5Pha lex, nâyx zanyf joođ Pha ayx phunz Yaz tuz gwăngz eeng yămz Pha nyăngz cah đangc, cayx năngđ tăng max zeengx naih nây bamh canz, yaz bix naih gwăngz eeng yămz Pha nâyx.6Pha jaoz phunz Yaz yămz nây bamh canz wax đomc munh Yaz yâuc phunz stiz pâyz Pha nyăngz manyh. Stiz six săngh Pha nyăngz, Pha jaoz stiz phunz Yaz, stiz yâuc ayx âyz Pha nyăngz wac.7Nâyx zanyf, stiz pâyz tuz coong yetx stong muif huungđ Pha sađ phunz Yaz wax đomc, six tăng Pha taih,8wâyc Pha sađ wax đomc wac phunz Yaz, Yaz yâuc sađ phunz stiz, stiz stipx wax đomc wac yâuc senz pâyz tuz coong Yaz tăng Pha taih, stiz yâuc zen coong Pha cănh paiđ Yaz taih.9Yaz joođ phunz stiz. Yaz max joođ phunz bamh canz munh, six phunz Pha jaoz phunz Yaz wax đomc munh, wâyc stiz săngh Pha nyăngz.10Yaz nyăngz muif huungđ six Pha nyăngz; lauf năngđ Pha nyăngz six Yaz nyăngz nâyx, Yaz yâuc wâyc stiz tuz gwăngz eeng.11Yaz max yămz nây bamh canz nzof, six stiz năngx jinh yămz nây bamh canz, Yaz six muf Pha wa. Đăngb Zeengh nyăngz Pha lex, joođ pêuz stiz yămz Pha nyăngz manyh cah njaf, six Pha sađ phunz Yaz nyăngz manyh, phunz stiz hayh songc ah tiuh nyâuđ, cayx năngđ Pănh nâyx.12Yaz năngx jinh cloon stiz yămz nyăngz săngx huđ, Yaz jămđ stiz yămz Pha nyăngz manyh, six Pha sađ phunz Yaz nyăngz manyh. Yaz jămđ stiz, yămz stiz songđ max naih mănv zuc gaih, blătc nzuf zuc mêtc wax tauh sây, phunz Canyx Stâub nyăngz wac tuz setb taih toix nzuf.13Six nâyx zanyf, Yaz muf Pha wa, Yaz năngx jinh yămz nây bamh canz, yaz coong nâyx đomc wac, phunz stiz nyăngz nyâuđ naih Yaz nyăngz numđ nyađ clăkx clunh nzuf.14Yaz jaoz Pha nyăngz wac phunz stiz nzof, bamh munh songđ hănđ stiz wâyc stiz max săngh nây bamh canz nyăngz, lauf năngđ Yaz max săngh bamh canz nyăngz nâyx.15Yaz max joođ Pha ênz stiz setb nây bamh canz, six joođ Pha pêuz omz stiz tuz gâyh đutb munh huđ.16Stiz max săngh nây bamh canz nyăngz, lauf cayx năngđ yaz max săngh nâyx bamh canz nyăngz nâyx.17Joođ Pha nongc senz gâyf stav nănh stiz đăngb zeengh taih; Mâyh nyăngz wac six senz gâyf.18Pha paiđ Yaz yămz nây bamh canz ayx năngđ laix, six Yaz lauf paiđ stiz yămz nây bamh canz ayx năngđ wa nâyx.19Wâyc stiz Yaz cănh yămz ayx đăngb zeengh, phunz stiz lauf tuz đăngb zeengh yămz senz gâyf.20Yaz six max zâyf cungb joođ phunz nâyx đomc munh cuungv, six lauf năngx phunz cloon laiv lanh mungv stiz nzônh nyăngz wac bix zen Yaz wax đomc munh timb,21phunz stiz tinyh đoih songc ah tiuh nyâuđ, năngđ Pha yămz Yaz cah njaf, Yaz lauf yămz Pha cah njaf nâyx, yâuc phunz stiz yămz Pănh cah njaf, phunz bamh munh zen coong Pha paiđ Yaz taih.22Pha sađ phunz Yaz nyăngz gwăngz eeng, Yaz lauf sađ phunz stiz, phunz stiz hayh songc ah tiuh nyâuđ, năngđ Pănh songc ah tiuh nyâuđ nâyx;23Yaz yămz stiz cah njaf, Pha yâuc yămz Yaz cah njaf, phunz stiz tuz clăkx clunh songc ah tiuh nyâuđ, phunz bamh munh pâyz tuz coong Pha paiđ Yaz taih, Pha yâuc stăngz stiz cayx năngđ Pha stăngz Yaz nâyx.24Pha lex, Mâyh jaoz laiv lanh phunz Yaz, Yaz oix Yaz yămz laiv stiz lauf tuz cloon Yaz yămz wa, phunz stiz tuz phătc Yaz nyăngz gwăngz eeng, six Pha sađ phunz Yaz nyăngz gwăngz eeng, wâyc tăng max zeengx zuyx guungh zuyx nib Pha bix stăngz Yaz nzof.25Peengh stimz nyăngz Pha lex, bamh munh manyf max pâyz Pha, six Yaz pâyz Pha; nâyx đomc munh yâuc pâyz tuz coong Pha paiđ Yaz taih.26Yaz phunz stiz pâyz tuz Pha nyăngz manyh, yaz zef năngx phunz stiz pâyz timb, phunz Pha stăngz Yaz wax huungđ stăngz yămz stiz cah njaf, nzof Yaz yâuc yămz stiz cah njaf.”
FAR EAST BROADCASTING COMPANY