James5
1Six, puv quâyx nyăngz munh lex, mungv bex, oix zuc pungx stingb hamv haoh, wâyc nyâuh cayx zuc pongh nyăngz zâuđ nanc.2Nyâuh nyăngz jax toongx zuc huđ nzuf, nzof nyâuh nyăngz guyz quav zuc jeengz tăpc nhlinc nzuf.3Nyâuh nyăngz sămz nyanh setb đingv, nây đingv six ayx zanyx manyf nzeengz cloon nyâuh, nzof nănh yâuc nhlinc nyâuh nyăngz stinb a cayx năngđ tâuf nâyx. Nyâuh yâuc cungb zaub njâuh nyâuh nyăngz jax toongx yămz wax đomc stêtb mâyv nyăngz noib.4Phanv mangc, wax đomc ayx congz munh nyăngz congz nyanh, yâuc zuc nzauf yămz nyâuh nyăngz tinc, senz ayx congz sâub nyâuh nyăngz jeengz zunb wax đomc munh, nănh jinh đangh hamv stingb yônx, nzof wax đomc sâub jeengz zunb nyăngz congz munh yônx haoh nyăngz stingb, yâuc ninyh tauv tinb panc peengz nyăngz Zâu bah noomh.5Nyâuh yămz nây stâyv sangc tuyh yoh nyađ nhlinc hopb. Nyâuh otx nyâuh nyăngz nyâuđ năngx cunc nongc phunz tayx ayx a wax noib.6Nyâuh tingc peengh stimz munh nyăngz stoif yâuc tayx tayc, stiz yâuc max tămx cloon nyâuh.7Wâyc nây, yâuf pez lex, oix zuc nongc nyâuđ tanyđ ayx tuz tauv Zâu taih. Phanv mangc, ayx njingh nyăngz munh nongc nyâuđ zu saix nyăngz jengz zunb tăng wa nib, pungx stimz zu ayx tuz tauv tuz stipx zunb coonz bungc cloon zunb đany bungc.8Nyâuh lauf oix zuc nongc nyâuđ zu. Yâuc ayx phunz nyâuh nyăngz nyâuđ zen năngx tăngđ wâyc Zâu taih nyăngz săngx huđ tauv stătx gôh.9Yâuf pez lex, năngx gâyf lanh cloon lanh tinyh yônx tinyh nzeengz, phunz nyâuh max zuc stămđ stoif. Phanv mangc, Stămđ Stoif Quanz jinh đangh stâuđ lâyc jeengh cah đangc.10Yâuf pez lex, oix zuc ayx âyz wax đomc tâuc wac munh zuc tanyđ zâuđ nyăngz jau cloon naih stimz đao nyăngz jau, six tim Zâu nyăngz manyh ninyh nzônh gâyf wax đomc munh.11Phanv mangc, pănh stunx naih stimz đao wax đomc munh six senz naih oonz looc. Nyâuh lauf tuz numđ coong tauv Yoopx zuc tanyđ zâuđ nyăngz jau, nzof nyâuh yâuc tuz phătc Zâu nyăngz zux ix phunz nănh, wâyc Zâu naih nyâuđ hâuđ lênh munh yâuc nyâuđ gongx.12Yaz nyăngz yâuf pez lex, tah yetx six, năngx gâyf nyunc wac, yâuc năngx gâyf nuz guungh max six nuz nib max six nuz laiv huungđ nyunc wac, six, “naih” oix zuc coong “naih”, nzof “max naih” six coong “max naih”, phunz nyâuh nzăngđ max zuc stămđ stoif.13Yămz nyâuh naih tix lanh jinh đangh tanyđ zâuđ nanc max? Wax lanh oix zuc cloo Zâu. Naih tix lanh numđ nyađ max? Wax lanh oix zuc ayx nzungz tanv Zâu.14Yămz nyâuh naih tix lanh săngh gumc max? Wax lanh oix zuc êu wax đomc jiux pangx nyăngz munh côx taih, stiz oix zuc tim Zâu nyăngz manyh cloo Zâu tayv phunz wax lanh munh, yâuc yămh yâuh phunz nănh.15Nongc zen stimz cloo Zâu six njâuv tuz wax lanh săngh gumc nyăngz munh, nzof Zâu six njăpc wax lanh munh nyoongz quef. Năngđ coong wax lanh munh naih ayx longđ stoif, nănh six tuz quanyf phunz.16Wâyc nây, oix zuc lanh nhlimc stoif phunz lanh, yâuc lanh cloo Zâu phunz lanh, phunz nyâuh hayh tuz zany gongx. Peengh stimz nyăngz munh cloo Zâu nyăngz wac six lanyh nzongf.17Ê-li-ya six lauf ah lanh bamh munh cayx năngđ pănh nâyx, nănh cloo Zâu joođ êu guungh năngx gâyf bungc lub, guungh songđ max bungc lub nzac wax nomz stâyz phangz tuz pôz nyăngv phanx.18Tăng wa nănh zef cloo Zâu, guungh songđ bungc lub, nib yâuc setb jeengz zongx.19Yaz nyăngz yâuf pez lex, năngđ coong yămz nyâuh cah njaf naih tix lanh munh ninyh longđ gâyh senz gâyf, bix zef naih tix lanh munh ênz nănh phunb đangz lauf,20six oix zuc pâyz coong laiv lanh ênz tuz naih stoif nyăngz munh phunb đangz lauf, max ninyh longđ jau, wax tauh munh six njâuv tuz nănh nyăngz mengc hoonh gâyh đutb zuc tayc nyăngz jau, yâuc plopx tuz đuungx huungđ stoif.
FAR EAST BROADCASTING COMPANY