James3
1Yaz nyăngz yâuf pez lex, yămz nyâuh cah njaf năngx gâyf naih đuungx lanh ayx stênx steengb, wâyc pâyz tuz coong pănh six zuc tingc stoif năngx niđ têx.2Wâyc pănh tinyh đoih six hayh naih ayx longđ đuungx stinz jau. Năngđ coong laiv lanh max coong wac longđ, wax lanh six clăkx clunh nyăngz munh, hayh cun tuz njinh cănh nyăngz stinb nzuf.3Năngđ coong pănh lopb maf longh ănz maf nyăngz nzetx nongc ayx phunz nănh mungv pănh, pănh songđ hayh cun tuz lomc nănh nyăngz stinb.4Phanv mangc jađ wax đomc đangđ, hănđ lub lomc laiv yâuc zuc nzaox lub stâyb ninyh, muif saz đangđ tuz coi ninyh six păngc ah nomz tungh coi jenz nzongf, phunz laix đangđ munh âyz nănh oix ninyh laiv tix yâuc laix ninyh.5Lauf tinyh năngđ, byetc six ah huungđ năngx jenz quaix, six yâuc hayh ayx nzetx lub tanv tuz wax đomc cumh pâuz lub. Phanv mangc ah cuyb tâuf byetc manyf jenz six hayh pu tuz săngh tungđ jêmh lub.6Byetc lauf cayx năngđ tâuf nâyx, ah huungđ max đăngb zeengh yămz pănh nyăngz stinb, ayx wâyx lomc stinb, yâuc puf sac njinh săngh stâyv munh, nzof nănh yâuc cănh zuc puf sac yămz wa tâuf coiđ.7Muif huungđ jămx staov, nooc, nyoongz nib nyăngz tax huungđ, cloon yămx coiđ nyăngz muif huungđ six zuc cun nzuf yâuc zuc bamh munh cun.8Six max naih mănv hayh cun tuz stinz byetc, ah huungđ okx nzongf max hayh cun tuz buc, naih tôc tayc nyăngz njaiz pong nzuf.9Pănh nongc byetc tanv Zâu six pănh nyăngz Pha, pănh yâuc nongc byetc zaux munh, senz tuz zuyx taih âyz Zâu Tênb-Huungh nyăngz hanyh jangx wax huungđ.10Tăng ah nomz nzetx bix naih tanv nyăngz wac cloon zaux nyăngz wac setb taih. Yaz nyăngz yâuf pez lex, max hoopđ zuc naih năngđ nâyx setb taih.11Ah nomz nof womz tăng ah nomz njăuz cotb đunh setb taih, six max hayh songc setb womz camz cloon womz imz, zâyf max?12Yaz nyăngz yâuf pez lex, bănx tauh njăngx max hayh săngh ca-lan pyâu, nzof tungh cuđ mâyb lauf max hayh săngh bănx tauh pyâu, zâyf max? Nzof womz đaih sting lauf max hayh setb tuz womz camz.13Yămz nyâuh cah njaf naih laiv lanh lemđ yâuc naih tongb manyh max? Nănh oix zuc ayx wax đomc gongx nyăngz cumh pâuz, phunz stunx coong nănh ayx gongx nyăngz jau six tăng stimz dlênc yămz tongb manyh nyăngz jau setb taih.14Six năngđ coong nyâuh naih numđ hănđ, numđ nhlenx, yâuc cungb tâuh cănh tuz gongx, six năngx gâyf ayx nzetx lub, yâuc coong puv maoh nhlengc cloon senz gâyf.15Nây max zâyf tăng cah zâyx taih nyăngz tongb manyh, nây six tăng bamh canz nyăngz, stinb a oix nyăngz, yâuc tăng manđ taih.16Wâyc laiv nomz tinc naih numđ hănđ cloon cungb tâuc cănh tuz gongx têx, wax nomz tinc songđ naih sêu lunc cloon muif huungđ huđ nyăngz jau.17Six, tăng cah zâyc taih nyăngz tongb manyh tah yetx six đăngb zeengh, zef naih hoopđ stimz tongh âyx, yâuc dlênc, lanh mungv lanh, naih nyâuđ hâuđ lênh munh yâuc ayx gongx nyăngz jau, max naih iz tiuh nyâuđ, max naih pâyc zac nyâuđ yootz.18Peengh stimz nyăngz nhlimb six tuz songx yămz hoopđ stimz tongh âyx nyăngz jau, phunz wax đomc naih hoopđ stimz tongh âyx nyăngz munh.
FAR EAST BROADCASTING COMPANY