Ephesians5

1Wâyc nây, nyâuh oix zuc ayx âyz Zâu Tênb-Huungh, năngđ Nănh stăngz nzongf nyăngz toonz sab nâyx,2oix zuc lanh stăngz lanh cayx năngđ Zâu Jix-Tuz stăngz pănh bix sađ Nănh cănh nyăngz mengc tayc wâyc pănh, ayx ah cuyb stanyb lanyh naih siv đangz stungx phunz Zâu Tênb-Huungh.
3Six pongz lauh nyăngz jau, cloon muif huungđ max đăngb zeengh nyăngz jau max six mauh tax huungđ njinh năngx gâyf coong tauv yămz nyâuh cah njaf, năngđ nây nzăngđ payh tuz cloon wax đomc đăngb zeengh munh,4yâuc năngx gâyf coong bah camx bah caiz nyăngz wac, max naih luungđ stuyh nyăngz wac, max six năngx jetx wac — nâyx đomc six max hoopđ zuc coong — six plănc taih oix zuc sâuf hâuđ Zâu.5Nyâuh oix zuc pâyz tingc coong, ayx pongz lauh nyăngz munh tauv laiv, ayx max đăngb zeengh nyăngz jau, max six mauh tax huungđ — six senz paix miuc hanyh nyăngz munh — yetx stong six max naih phănc yămz Zâu Jix-Tuz cloon Zâu Tênb-Huungh nyăngz côkz.6Năngx gâyf phunz mănv ayx nzetx blangc coong puv maoh jaf nyâuh, six wâyc nâyx đomc dlayc, Zâu Tênb-Huungh nzăngđ tingc max mungv Nănh nyăngz wac wax đomc munh nyăngz stoif.7Năngđ nây, nyâuh năngx gâyf cloon stiz songc laiv huungđ phănc,8wâyc cah đangc nyâuh six năngx jinh yămz nzămc, six nâyx zanyf nyâuh săngh gwăngz yămz Zâu cah njaf. Oix zuc yămz ayx cayx năngđ gwăngz nyăngz toonz sab nâyx9(wâyc tăng gwăngz setb taih nyăngz muif huungđ six gongx nzuf, peengh stimz, yâuc senz nyăngz),10oix zuc năngx cayb zah mangc jađ laiv huungđ six hoopđ Zâu nyăngz nyâuđ.11Năngx gâyf songc phănc cloon nzămc nyăngz jau ayx wax đomc max săngh luungđ nyăngz cumh pâuz, oix zuc coong manyf wax đomc jau setb taih six năngx gongx têx,12wâyc cungb đamv tauv stiz pinyx ayx nyăngz jau lôx năngx numđ nyayz nzof.13Muif huungđ tuz gwăngz siux tauv six tuz phătc manyf setb taih, tinyh phanv laiv huungđ tuz phătc manyf setb taih six săngh gwăngz nzuf.14Wâyc nây, naih wac coong: “Phâyx mâyc njoomh nyăngz munh lex, oix zuc điub gôh, oix zuc tăng wax đomc munh tayc nyoongz quef taih, Zâu Jix-Tuz songđ siux gwăngz mâyh.”
15Năngđ nây, nyâuh yămz nây stâyv sangc six oix zuc năngx cayb bôngh — năngx gâyf ayx cayx năngđ munh oongx munh, six oix zuc ayx cayx năngđ tongb manyh nyăngz munh,16naih săngx huđ congv oix zuc ayx năngx hoopđ, wâyc nâyx yenh noib six huđ nzongf.17Wâyc nây, năngx gâyf ayx cayx năngđ munh oongx munh, yâuc oix zuc pâyz tuz laiv huungđ six Zâu nyăngz zux ix.18Năngx gâyf tiu binz, wâyc tiu six ayx phunz munh huđ ninyh. Six plănc taih, oix zuc tuz Singx-Lingh pong nyâuđ,19oix zuc nongc nzungz đăngb, cloon tanv Zâu nyăngz nzungz, cloon Singx-Lingh nyăngz nzungz bix lanh ayx tauz lanh, yâuc nongc nzuf nyâuđ ayx nzungz tanv Zâu,20yămz manf dlayc, oix zuc muif dlih tim pănh nyăngz Zâu Yê-su Jix-Tuz nyăngz bux sâuf hâuđ Zâu Tênb-Huungh, six Pha,21oix zuc cumh nzav Zâu Jix-Tuz bix lanh buc lanh —
22Ayx au nyăngz munh lex, oix zuc buc nyâuh nyăngz langh cayx năngđ buc Zâu nâyx.23Wâyc langh six ayx au nyăngz pyây, lauf năngđ Zâu Jix-Tuz six ayx jiux pangx nyăngz pyây nâyx — nzof Nănh six ayx jiux pangx nyăngz Njâuv Zâu.24Jiux pangx buc Zâu Jix-Tuz ayx năngđ laix yămz manf dlayc au lauf zuc buc cănh nyăngz langh năngđ wa nâyx.25Ayx langh nyăngz munh lex, oix zuc stăngz cănh nyăngz au, cayx năngđ Zâu Jix-Tuz stăngz jiux pangx yâuc sađ cănh nyăngz mengc tayc wâyc jiux pangx nâyx,26phunz Nănh nongc womz đaox yâuc nongc Nănh nyăngz gâyf stav ayx phunz jiux pangx đăngb zeengh taih,27nongc phunz Nănh hinđ manyf Nănh gwăngz eeng nyăngz jiux pangx, max naih wâyx yâuc max jăpc nyăuv, max naih laiv huungđ năngđ nâyx, six ayx phunz jiux pangx tuz đăngb zeengh yâuc max naih tinc nzêmh.28Lauf tinyh năngđ, langh oix zuc stăngz cănh nyăngz au cayx năngđ cănh nyăngz stinb nâyx. Laiv lanh stăngz cănh nyăngz au six stăngz cănh nyăngz stinb.29Wâyc max naih mănv hănđ cănh nyăngz stinb ax tiny, stong yuungf gongx yâuc lif nănh, lauf cayx năngđ Zâu Jix-Tuz cloon jiux pangx nâyx,30wâyc pănh six ayx Nănh nyăngz stinb sangc nyăngz muif huungđ phănc.31“Wâyc nây, munh toonz six zuc gâyh nzif pha cloon nănh nyăngz au căpx taih, iz lanh six săngh ah nomz stinb.”32Nâyx huungđ pinyx vâyv nyăngz jau six senz lub nzongf — yaz six jinh đangh coong tauv Zâu Jix-Tuz cloon jiux pangx.33Six, nyâuh lauf zuc năngđ nâyx — muif lanh munh — langh six oix zuc stăngz cănh nyăngz au cayx năngđ cănh nyăngz stinb nâyx, nzof au six lauf oix zuc buc cănh nyăngz langh.

FAR EAST BROADCASTING COMPANY

https://app.library.bible/content/4031cf477b55913c