Ephesians3
1Wâyc nây, yaz, Phao-lô, wâyc Zâu Yê-su Jix-Tuz yâuc wâyc nyâuh pitc stingx munh bix zuc yămz nzauh —2naih dlih nyâuh lauf tuz numđ tauv Zâu Tênb-Huungh jaoz Nănh nyăngz pôz phunz yaz cun, yâuc wâyc nyâuh nâyx huungđ pôz bix tuz jaoz phunz yaz,3âyz năngđ yaz tuz hinđ phunz pâyz yămz hinđ yangh nyăngz jau, cayx năngđ yaz ja yămz wa cah zâyc wax đomc pinyx vâyv nyăngz jau nâyx,4toc tauv wax đomc jau, nyâuh six cănh pâyz tuz yaz pyac nyâuđ yămz Zâu Jix-Tuz pinyx vâyv nyăngz jau,5senz max zeengx tuz hinđ setb taih phunz bamh munh pâyz yămz cah đangc wax jaz guungh đi, six tauv nâyx zanyf, păngc Singx-Lingh, wax đomc jau bix tuz hinđ phunz wax đomc đăngb zeengh cumh pâuz munh cloon Nănh wax đomc tâuc wac munh —6nây six coong tauv: wax đomc pitc stingx munh senz tuz cloon pănh songc stipx phănc nyăngz munh, six songc yămz ah nomz stinb nyăngz phănc wax đomc, yâuc tuz songc stipx nyunc phunz nyăngz phănc yămz Zâu Yê-su Jix-Tuz nyăngz Cuđ Jenx,7yaz tuz ayx Cuđ Jenx nyăngz pâuz six wâyc Zâu Tênb-Huungh sađ nyăngz pôz, nây pôz six Nănh nyăngz tômx jab tuz sađ phunz yaz.8Wax huungđ pôz tuz sađ phunz yaz — ah lanh munh năngx jenz quaix yămz wax đomc đăngb zeengh munh tauv laiv — nongc nzônh Zâu Jix-Tuz max hayh zah tuz tongf nyăngz puv quâyx jau phunz wax đomc pitc stingx munh,9yâuc nongc phunz tinyh đoih tuz pâyz tauv ayx laix six cun pinyx vâyv nyăngz jau, senz tuz pinyx vâyv pâyz sax stâyv quaix taih yămz Zâu Tênb-Huungh, senz zuyx muif huungđ wax Tauh,10wâyc nây nâyx zanyf, păngc yămz jiux pangx, bix Zâu Tênb-Huungh nyăngz muif huungđ tongb manyh nyăngz jau tuz hinđ phunz wax đomc ayx pyây cun nyăngz munh cloon naih lanyf yămz wa cah zâyc guungh wax đomc,11âyz Nănh stâyv quâyx nyăngz zux ix yâuc tuz ayx săngh yămz pănh nyăngz Zâu Yê-su Jix-Tuz,12yâuc yămz Nănh, pănh bix tuz pungx stimz ninyh yămz stătx Zâu Tênb-Huungh yâuc max numđ cumh nzav wâyc zen caođ Nănh.13Wâyc nây, yaz joođ nyâuh năngx gâyf nămx nyâuđ, yămz yaz wâyc nyâuh bix pongh nyăngz zâuđ nanc, nzof wax đomc zâuđ nanc six nyâuh nyăngz gwăngz eeng.14Wâyc nâyx đomc jau, yaz quâyc yămz Tênb-toongh Pha nyăngz cah đangc,15yâuc păngc Nănh bix yămz cah zâyc guungh nyăngz muif huungđ cloon cah đi nib tuz oonz bux,16joođ Nănh âyz Nănh puv quâyx nyăngz gwăngz eeng, nongc Nănh Singx-Lingh nyăngz jab ayx phunz nyâuh tuz njoongh staox yămz nyâuh nyăngz nyâuđ,17phunz Zâu Jix-Tuz păngc nyâuh nyăngz zen stimz bix yămz nyâuh nyăngz nyâuđ cah njaf, phunz hayh tuz nzac đuungh yâuc stâuđ tăngđ yămz stăngz nyăngz jau,18phunz nyâuh cloon wax đomc muif lanh đăngb zeengh munh, hayh pâyz tuz tongb ayx laix six quăng, đao, njăngb, đôz,19yâuc hayh pâyz tuz Zâu Jix-Tuz nyăngz stăngz, senz max naih mănv hayh pâyz tuz tauv nyăngz jau, phunz nyâuh hayh tuz taox pong nzuf Zâu Tênb-Huungh clăkx clunh nyăngz muif huungđ jau.20Joođ huungv staox hayh ayx tuz blătc nzuf muif huungđ pănh joođ max six nyâyh nyăngz jau wax Tauh ninyh, senz jinh đangh yămz pănh cah njaf ayx cumh pâuz wax huungđ tômx jab,21cloo phunz Nănh tuz gwăngz eeng yămz jiux pangx, yâuc yămz Zâu Yê-su Jix-Tuz ninyh tauv panc stâyv panc đaic. A-meen.
FAR EAST BROADCASTING COMPANY