Ephesians1
1Yaz, Phao-lô, âyz Zâu Tênb-Huungh nyăngz zux ix ayx Zâu Yê-su Jix-Tuz nyăngz cumh pâuz munh, pungx phunz yămz wa Ê-phê-sô wax đomc đăngb zeengh munh, senz nzuf stimz nzuf nyâuđ yămz Zâu Yê-su Jix-Tuz wax đomc zen nyăngz munh.2Joođ pănh nyăngz Zâu Tênb-Huungh six Pha cloon Zâu Yê-su Jix-Tuz nyăngz pôz cloon peengh oonz yămz nyâuh cah njaf.3Senz payh tuz tanv nyăngz Zâu Tênb-Huungh six pănh nyăngz Zâu Yê-su Jix-Tuz nyăngz Pha, senz sađ yămz wa cah zâyc guungh nyăngz Singx-Lingh cloon muif huungđ pôz phunz pănh yămz Zâu Yê-su Jix-Tuz cah njaf wax Tauh,4senz tăng max zeengx zuyx guungh zuyx nib wax zanyf, Zâu Tênb-Huungh bix sên pănh taih yămz Zâu Jix-Tuz, phunz pănh tuz đăngb zeengh yâuc max naih tinc nzêmh yămz Nănh nyăngz cah đangc, yămz stăngz nyăngz jau5Nănh bix tingc săngh phunz pănh tuz pênx Nănh nyăngz sây hoonb yămz Zâu Yê-su Jix-Tuz, âyz Nănh numđ nyađ nyăngz zux ix,6nongc tanv Nănh gwăngz eeng nyăngz pôz, senz Nănh goib âyx yâuc cungb stungx phunz pănh yămz Nănh stăngz nyăngz Toonz,7nzof yămz wax tauh Toonz, pănh bix tuz suc lauf păngc yămz Nănh nyăngz samđ, tuz quanyf stoif yămz Nănh puv quâyx nyăngz pôz,8nây pôz six Nănh sađ phunz pănh yâuc max naih pong stâub yămz muif huungđ tongb manyh cloon bănh sangz nyăngz jau,9ayx phunz pănh hayh pâyz tuz Zâu Tênb-Huungh đôz nzongf nyăngz zux ix, senz Nănh numđ nyađ nyăngz zux ix, nzof Nănh yâuc tingc săngh nâyx huungđ zux ix quaix đangc yămz Zâu Jix-Tuz,10phunz tauv beengc Nănh tingc taih nyăngz săngx huđ, songđ dlonf muif huungđ taih yămz Zâu Jix-Tuz, njinh yămz cah zâyc guungh nyăngz muif huungđ cloon yămz cah đi nib nyăngz muif huungđ, six yămz Nănh nzuf,11senz yămz pănh tuz cloon songc stipx phănc wax Tauh, wâyc tuz tingc taih quaix đangc âyz ayx phunz muif huungđ tuz setb taih âyz năngđ Nănh bênc taih nyăngz zux ix wax Tauh,12nongc phunz pănh, senz naih njih mungc yămz Zâu Jix-Tuz nyăngz munh, hayh tuz tanv Nănh nyăngz gwăngz eeng.13Yâuc yămz Nănh, nyâuh bix tuz numđ tauv senz gâyf nyăngz gâyf, senz phunz nyâuh hayh tuz njâuv nyăngz Cuđ Jenx, nzof nyâuh yâuc zen Nănh, songđ tuz sađ Singx-Lingh phunz cayx năngđ tăpb yenx nâyx, âyz Nănh nyunc nyăngz wac,14nzof nâyx tauh Singx-Lingh six nongc ayx ah cuyb tingc stinh phunz pănh, zu tauv laiv zanyf Nănh suc nzuf Nănh nyăngz munh lauf, nongc tanv Nănh nyăngz gwăngz eeng.15Wâyc nây, tăng yaz numđ coong tauv nyâuh nyăngz zen stimz yămz Zâu Yê-su, cloon nyâuh nyăngz stăngz phunz tauv wax đomc muif lanh đăngb zeengh munh,16yaz songđ wâyc nyâuh sâuf hâuđ max setc tiny, yâuc đamv tauv nyâuh yămz yaz cloo Zâu nyăngz jau,17phunz pănh nyăngz Zâu Yê-su Jix-Tuz nyăngz Zâu Tênb-Huungh, six gwăngz eeng nyăngz Pha, sađ Singx-Lingh nyăngz tongb manyh yâuc hinđ manyf phunz nyâuh hayh pâyz tuz Nănh,18ayx phunz nyâuh nyăngz nyâuđ njaf gwăngz, phunz nyâuh hayh pâyz tuz naih njih mungc yămz Nănh sên nyâuh taih nyăngz jau six ayx laix, cloon wax đomc đăngb zeengh munh tuz puv quâyx gwăngz eeng nyăngz phănc yămz Nănh six năngđ laix,19Nănh lub nzongf nyăngz tômx jab max naih laiv huungđ hayh pây tuz yămz pănh six năngđ laix, senz naih nyâuđ zen nyăngz munh, âyz năngđ Nănh lokc jangx nyăngz tômx jab,20Nănh bix ayx phunz Zâu Jix-Tuz tăng tayc săngh taih, yâuc phunz Zâu Jix-Tuz stâyv Nănh nyăngz byaoh phanx yămz wa cah zâyc guungh,21blătc nzuf muif huungđ jab, tômx lanyf, tômx jab, cloon ayx zâu, cloon muif huungđ naih manyh bux tauv laiv, max zâyf cungb yămz nâyx stâyv cuungv yâuc năngx cloon cah đangz stâyv timb.22Nănh ayx phunz muif huungđ buc yămz Zâu Jix-Tuz nyăngz staux đi, yâuc phunz Zâu Jix-Tuz ayx jiux pangx nyăngz pyây,23nzof jiux pangx six ayx Zâu Jix-Tuz nyăngz stinb, naih dloih nzuf yămz ayx phunz muif huungđ tuz clăkx clunh nzuf yămz manf dlayc wax Tauh.
FAR EAST BROADCASTING COMPANY