Acts18
1Blătc wax đomc dlayc, Phao-lô songđ tăng A-tên setb jau ninyh tauv Cô-lin-tô dlanyh.2Yămz wa nănh pongh ah lanh Yu-tai munh, bux hipđ ayx A-qui-la, steengb yămz Boon-tat stâyz phangz, cloon nănh nyăngz au Bitc-sin-la tăng I-ta-li côkz ah yac pyăux taih, wâyc Ca-lau-đi-atc huungh setb lanyf êu yetx stong Yu-tai munh zuc setb wa Lô-ma dlanyh, Phao-lô songđ cloon stiz yămz,3yâuc wâyc songc ah huungđ cumh pâuz stangc, Phao-lô songđ cloon stiz yămz wa songc ayx cumh pâuz, wâyc stiz six gonh đupx njiuh stangc nyăngz munh.4Wax zanyf, yămz muif nomz tingc congz noib, Phao-lô yâuc yămz wa huyđ toongh nzaox gâyf, nănh quinb nzaox njinh Yu-tai munh cloon Hi-lapc munh.5Six tauv tuz Si-la cloon Ti-mô-tai tăng Ma-si-đô-ni dlanyh taih tauv, Phao-lô songđ tuz pungx stimz nzônh gâyf, ayx zanyx manyf phunz Yu-tai munh coong tauv Zâu Yê-su six Zâu Jix-Tuz.6Six wax đomc Yu-tai munh nzeengz nănh yâuc mađ nănh, nănh songđ boongf guyz, yâuc coong ănz stiz: “Nyâuh nyăngz samđ six cănh njămh ănz nyâuh nyăngz pyây! Nzof yaz yâuc max naih stoif! Tăng nây staox ninyh, yaz six ninyh lov wax đomc pitc stingx munh.”7Tauv setb wax nomz tinc, nănh ninyh nzac ah lanh canyx bongc Zâu Tênb-Huungh munh nyăngz pyau, bux hipđ ayx Ti-ti-atc Yu-sa-tat, nâyx lanh munh nyăngz pyau six yămz wa huyđ toongh cah sinh.8Six Ca-lit-batc cun huyđ toongh nyăngz munh, yâuc cloon nănh nyăngz pyau munh muif lanh zen Zâu, nzof naih đuungx lanh Cô-lin-tô munh numđ Phao-lô nzônh gâyf songđ zen yâuc ayx quaix-gâyf.9Wax zanyf, toix bah nzămc Zâu coong ănz Phao-lô yămz hinđ yangh nyăngz jau, coong: “Năngx gâyf cumh nzav oix zuc nzac jab coong, năngx gâyf stinyb njâuh.10Wâyc Yaz cloon mâyh yămz yâuc max naih mănv hayh ayx luungđ hoiđ mâyh, wâyc yămz nâyx nomz dlanyh naih đuungx lanh munh six săngh Yaz nyăngz.”11Tăng wa, Phao-lô songđ yămz wa ah nyăngv căn joz lav, nzaox Zâu Tênb-Huungh nyăngz gâyf phunz stiz.12Six Gan-li-ôn ayx quanz pyây cun A-ca-ya steengv wax zanyf, Yu-tai munh songđ hoopđ nyâuđ taih nzeengz cloon Phao-lô, yâuc ênz nănh ninyh wa stămđ zăngc tinc,13yâuc coong: “Nâyx tauh munh taih lungz songx munh bongc Zâu Tênb-Huungh max toix gâyf.”14Six Phao-lô nzăngđ cayx đa goib nzetx coong wac wax zanyf, Gan-li-ôn songđ coong ănz Yu-tai munh coong: “Nyâuh đomc Yu-tai munh lex, năngđ coong nây six senz naih ayx pamf tauv quanz pâu gâyf max six pamf ayx okx nyăngz jau, năngđ ha têx, yaz six năngx pungx stimz mungv nyâuh,15six năngđ coong nây six cungb tinyh zenđ nyăngz jau, nzeengz manyh bux, yâuc nzeengz nyâuh cănh nyăngz gâyf têx nyâuh bix cănh bênc gôh. Yaz max oix stămđ tauv nâyx đomc jau.”16Nănh songđ luiđ stiz setb wa stămđ zăngc tinc ninyh.17Tăng wa, stiz songđ toopz Sô-sa-tê-nêt cun huyđ toongh nyăngz munh, stiz tinyh đoih bopc nănh yămz wa stămđ zăngc tinc nyăngz cah đangc, six Gan-li-ôn yâuc ayx max pâyz zâyx ănz nâyx đomc dlayc.18Nzof Phao-lô lauf năngx jinh yămz wa đuungx noib timb, nzăngđ cloon wax đomc yâuf pez tinyh gâyh, nănh cloon Bitc-sin-la, căn A-qui-la yămz đangđ nzac wa Si-li stâyz phangz muf, nănh songđ yămz wa Cên-cê-li tâyv pyây đongz wâyc nănh naih nyunc wac.19Tăng wa, stiz zef nzac Ê-phê-sô muf, Phao-lô songđ phunz stiz iz lanh yămz wa, nzof nănh six nzac huyđ toongh ninyh cloon Yu-tai munh nzeengz gâyf.20Stiz songđ êu nănh yămz wa tix cay ah dlapc timb, six nănh max nyenc yămz.21Nănh songđ coong tinyh gâyh wac ănz stiz, coong: “Năngđ coong Zâu Tênb-Huungh oix, yaz six năngx phunb đangz lauf pongh nyâuh timb,” nănh songđ nzac đangđ ninyh gâyh wa Ê-phê-sô.22Nzof tauv nănh setb wa Si-sa-li-ya coiđ sinh, nănh songđ staox wax Yê-lu-sa-lem ninyh tayđ jiux pangx tuz, nănh songđ muf wa An-ti-ôkx dlanyh.23Yămz wa tuz ah dlapc, nănh songđ setb jau ninyh, stunb quaix Ga-la-ti stâyz phangz cloon Pha-li-ji stâyz phangz ninyh, ayx phunz wax đomc zen nyăngz munh yetx stong tuz njoongh staox.24Wax zanyf, naih ah lanh Yu-tai munh, bux hipđ ayx A-bô-lô, yămz A-lêk-san-đê-li dlanyh steengb stâyv, yoiz hayh coong wac nyăngz munh, nzac taih tauv Ê-phê-sô dlanyh, nănh six ah lanh munh manyh pec Canyx Stâub.25Nănh tuz hoođ pâyz Zâu nyăngz gâyf, wâyc nănh nyâuđ njaf gwăngz, songđ nzaox yâuc pob manyf toix nzuf coong tauv Zâu Yê-su wax đomc jau, wax zanyf nănh six nzăngđ pâyz Yô-hanx ayx nyăngz quaix-gâyf cuungv.26Nănh yâuc pungx stimz nyăngz yămz wa huyđ toongh nzaox gâyf, six tauv mungv nănh tuz, Bitc-sin-la cloon A-qui-la songđ ênz nănh muf yâuc năngx cayb bux Zâu Tênb-Huungh nyăngz gâyf phunz nănh pâyz năngx nzuf.27Six A-bô-lô oix ninyh wa A-ca-ya stâyz phangz, wax đomc yâuf pez songđ oonz nyâuđ, yâuc ja jenx pungx phunz wax đomc stayb sây êu cayb stipx nănh năngx gongx, nănh ninyh tauv wa tinc, songđ stăngc tuz păngc Zâu nyăngz pôz bix zen wax đomc munh đuungx nzongf.28Nănh toongx songx caix cloon wax đomc Yu-tai munh njoongh nzongf, zoz Canyx Stâub taih yâuc pob coong Zâu Yê-su six Zâu Jix-Tuz.
FAR EAST BROADCASTING COMPANY