2 Timothy3
1Six mâyh oix zuc pâyz nâyx đomc coong, tauv stêtb mâyv nyăngz noib lav, six naih zâuđ nanc.2Wâyc munh six cungb tâuh cănh tuz gongx, stăngz nyanh, ayx nzetx lub, ayx lub, coong pamf, max mungv nzif pha, max pâyz gâyf, max đăngb zeengh,3max nyâyh tauv mănv, max naih hoopđ stimz tongh âyx, cungb hayh coong wac huđ, max cun tuz cănh, cungb oix bopc munh, max numđ nyađ gongx nyăngz jau,4plănc minb ănz munh, siv săpx, zanyf cănh ayx lub, cungb oix nyađ năngx nzongf têx stăngz Zâu Tênb-Huungh,5cungh ngwaic mangc cayx năngđ cay zen gongx, six yâuc max nhlimc stiz zen wax huungđ nyăngz tômx jab, mâyh oix zuc pyenv goib wax đomc munh năngđ nâyx.6Wax đomc munh naih ah phanx nimx nzac munh nyăngz pyau ninyh, hox wax đomc nyâuđ oongx nyăngz munh nzif, naih stoif pong nzuf, zuc hox ayx bah laiv săngb pongz lauh nyăngz jau,7lauf njinh luh hoođ six max naih laiv zanyf hayh pâyz tuz senz gâyf.8Cah đangđ Yan-net cloon Yam-bê, nzeengz cloon Mô-sê ayx năngđ laix têx, nâyx đomc munh lauf nzeengz cloon senz gâyf năngđ wa nâyx, nâyx đomc munh nyâyh nyăngz jau six max săngh nongc, stiz six cungb ja ayx zen Zâu nyăngz munh cuungv.9Six stiz max hayh ninyh tuz côz, wâyc stiz ayx wax đomc oongx nyăngz jau six tuz hinđ manyf setb taih, yămz munh tinyh đoih nyăngz cah đangc, lauf cayx năngđ wa iz lanh munh nyăngz nâyx, zuc hinđ manyf wax đomc oongx nyăngz jau setb taih.10Six mâyh yâuc âyz yaz nzaox nyăngz wac ayx, săngh ayx năngđ laix, săngh nongc ayx luungđ, naih zen stimz, naih nyâuđ tanyđ tuz, naih nyâuđ stăngz munh, yaz tanyđ tuz nyăngz jau,11yămz yaz zuc ayx huđ, zuc pongh zâuđ nanc yămz wa An-ti-ôkx, cloon I-cô-ni-yum, cloon Li-sa-ta dlanyh, yaz zuc tanyđ wax đomc zuc ayx huđ nyăngz jau. Nzof Zâu yâuc njâuv yaz tuz gâyh đutb wax đomc zâuđ nanc nzuf.12Wâyc zuc, tinyh phanv laiv lanh oix lêpc gongx Zâu Yê-su Jix-Tuz six zuc ayx huđ.13Năngx naih wax đomc munh huđ munh cloon puv maoh nyăngz munh, six cungb cun ayx cun huđ ninyh, ninyh jaf munh yâuc zuc munh jaf stiz.14Six, mâyh oix zuc stâuđ năngx tăngđ yămz mâyh tuz hoođ quaix nyăngz jau yâuc năngx cayb zen, wâyc pâyz tuz coong mâyh six hoođ wax đomc tăng mănv,15nzof tăng năngx jenz, mâyh yâuc tuz hoođ pâyz coong Canyx Stâub six hayh ayx phunz mâyh naih tongb manyh, yâuc hayh tuz njâuv păngc zen yămz Zâu Yê-su Jix-Tuz.16Lomc zây Canyx Stâub six Zâu Tênb-Huungh hab siv ănz, hayh nongc nzaox tuz munh, coong mađ munh, zany munh, yâuc nzaox munh ayx peengh stimz nyăngz jau,17phunz Zâu Tênb-Huungh nyăngz munh hayh tuz clăkx clunh nzuf, tuz bênc săngh nongc ayx muif huungđ gongx nyăngz cumh pâuz.
FAR EAST BROADCASTING COMPANY