1 Timothy4
1Singx-Lingh manyb manyf nyăngz coong, tauv stêtb mâyv nyăngz noib lav, six naih munh đuungx quanyf stiz nyăngz zen stimz, ninyh mungv manđ jaf yâuc lêpc manđ nyăngz gâyf,2tăng wax đomc pâyc zac nyâuđ yootz nyăngz munh, stiz nyăngz stimz nyâuđ zuc bi ninyh nzuf,3stiz cangđ max phunz munh zoongz pyau, yâuc êu njif wax đomc nhlinc hopb, senz Zâu Tênb-Huungh zuyx taih nongc phunz naih nyâuđ zen yâuc pâyz tuz senz gâyf wax đomc munh nongc nyâuđ sâuf hâuđ bix stipx.4Wâyc Zâu Tênb-Huungh zuyx taih nyăngz muif huungđ six gongx nzuf, max naih laiv huungđ săngh quanyf ax tinyh, phanv nongc nyâuđ sâuf hâuđ bix stipx six tuz,5wâyc nhlinc hopb six tuz stav đăngb zeengh taih, păngc yămz Zâu Tênb-Huungh nyăngz wac cloon cloo Zâu nyăngz wac.6Mâyh coong manyf nâyx đomc wac phunz yâuf pez, mâyh six săngh Zâu Yê-su Jix-Tuz ah lanh gongx nyăngz pâuz, tuz zen stimz nyăngz wac yuungf cloon mâyh lêpc nyăngz gâyf gongx.7Yâuc oix zuc pyenv goib munh bôf zongđ taih wax đomc max naih luungđ stuyh nyăngz câu. Six, oix zuc hoođ leenz cănh nyăngz stinb phunz hayh lêpc gongx Zâu,8wâyc zuc “hoođ leenz nây stinb a six tuz gongx max lauh, six hoođ lenz phunz hayh lêpc gongx Zâu six tuz gongx yămz muif huungđ, wâyc naih nyunc nyăngz wac phunz nâyx stâyv cloon cah đangz stâyv.”9Nâyx đomc wac six senz săngh zen mungc yâuc săngh stipx năngx nzuf,10wâyc pănh ayx cumh pâuz zâuđ yâuc nzeengz zax phunz nâyx huungđ jau, wâyc pănh naih njih mungc yămz stâyv quâyx săngh nyăngz Zâu Tênb-Huungh, Nănh six manf munh nyăngz njâuv Zâu, tah yetx six phunz zen nyăngz munh.11Oix zuc zăpx bux yâuc nzaox nâyx đomc jau.12Năngx gâyf phunz munh mangc stam wâyc mâyh nyăngv gunx, six oix zuc ayx gao gongx phunz zen nyăngz munh, yămz coong nyăngz wac, cloon ayx nyăngz jau, yămz stăngz nyăngz jau, yămz zen stimz, yămz đăngb zeengh nyăngz jau.13Oix zuc vaic toc stâub, quinb bux, yâuc nzaox ayx tuz tauv yaz ninyh.14Năngx gâyf quanyf yămz mâyh cah njaf nyăngz pôz, senz mâyh tuz sađ phunz tăng tâuc taih nyăngz wac, cloon wax đomc jiux pangx nyăngz munh côx tăpx puf ănz mâyh wax huungđ pôz.15Oix zuc nzac jab hoođ wax đomc jau, phunz munh phătc mâyh naih cun pâyz cun yongb staox.16Mâyh oix zuc năngx cayb leđ cănh nyăngz stinb cloon mâyh nzaox nyăngz wac. Oix zuc nzuf stimz ayx wax đomc cumh pâuz, wâyc ayx năngđ nâyx mâyh six njâuv tuz cănh nyăngz stinb cloon mungv mâyh wax đomc munh.
FAR EAST BROADCASTING COMPANY