1 Timothy2
1Wâyc nây, tah yetx yaz zăpx mâyh coong, oix zuc cloo Zâu joođ, yâuc cloo Zâu sâuf hâuđ tayv phunz munh tinyh đoih,2phunz wax đomc huungh stix cloon yetx stong ayx quanz nyăngz munh tauv laiv, phunz pănh yămz nây stâyv sangc hayh tuz banyh banyh yămz, yâuc tuz gwanb stimz lêpc gongx Zâu yâuc tuz yămz gongx.3Nâyx six gongx nyăngz yâuc hoopđ pănh nyăngz Njâuv Zâu, six Zâu Tênb-Huungh,4Nănh oix nongc muif lanh munh tuz njâuv yâuc pâyz tuz senz gâyf.5Wâyc cungb naih ah tauh Zâu Tênb-Huungh cuungv yâuc cungb naih ah Tauh yămz Zâu Tênb-Huungh cloon bamh munh mungh tongx — six Zâu Yê-su Jix-Tuz, ah tauh bamh munh,6Nănh nyunc sađ cănh nyăngz mengc nongc ayx zax stinh suc muif lanh munh, cayx năngđ zanyx manyf wac taih toix săngx huđ nâyx,7yâuc wâyc nâyx huungđ zanyx manyf wac, yaz bix tuz njăpc taih ayx nzônh gâyf munh cloon cumh pâuz munh — yaz coong senz yămz Zâu Jix-Tuz, yaz max coong jaf — yaz ayx stênx steengb phunz wax đomc pitc stingx munh zen yâuc pâyz senz gâyf.8Năngđ nây, yaz oix nongc yămz muif nomz tinc nyăngz munh pha tinyh đoih stuungb đăngb zeengh nyăngz puf staox guungh ninyh cloo Zâu, năngx gâyf siv totc yâuc năngx gâyf tinyh panx,9lauf tinyh năngđ, yaz oix nongc wax đomc munh nzif, zoongz zuz năngx toix jau, ayx stimz nyâuđ dlênc, yâuc hayh cun tuz cănh, nongc zoongz cănh nyăngz stinb, max zâyf coong binf pyây đongz max six zoongz sămz, zoongz zâuz, max six guyz quav saix,10yâuc ayx muif huungđ cumh pâuz gongx nzăngđ payh tuz hipđ ayx cumh nzav Zâu Tênb-Huungh nyăngz munh nzif.11Munh nzif oix zuc stingb njâuh mungv munh nzaox gâyf, oix zuc buc năngx nzuf.12Nzof, yaz max phunz munh nzif nzaox max six nzauf lanyf cun munh pha, six oix zuc stingb njâuh.13Wâyc A-đam tuz zuyx taih đangc, nzof nzăngđ tauv Ha-wa,14yâuc max zâyf A-đam zuc jaf, six munh nzif zuc jaf, bix zuc longđ stoif.15Six năngđ coong munh nzif njinh luh zen gongx, stăngz munh, yâuc đăngb zeengh, nyâyh gongx nyăngz jau, yâuc păngc steengb sây stiz six tuz njâuv.
FAR EAST BROADCASTING COMPANY