1 Corinthians9

1Yaz max tuz pungx goib mah? Yaz max zâyf ah lanh cumh pâuz munh haz? Yaz max zeengx tuz phătc pănh nyăngz Zâu Yê-su mah? Ha max zâyf nyâuh six yaz nyăngz cumh pâuz yămz Zâu haz?2Yaz hănđ max zâyf ayx cumh pâuz munh yămz wax đomc pitc đomc munh, six yămz nyâuh cah njaf yaz six ayx ah lanh cumh pâuz munh. Wâyc nyâuh six săngh zanyx manyf coong yaz six ah lanh cumh pâuz munh yămz Zâu.3Yaz oix coong tauv munh cooux yaz wax đomc jau:4Ha buz bix max naih gâyf nhlinc hoopđ mah?5Ha buz bix max naih gâyf ênz ah lanh zen Zâu munh nzif taih ayx au, cayx năngđ wax đomc cumh pâuz munh cloon Zâu wax đomc yâuf cloon Sê-pha nâyx mah?6Max six cungb yaz cloon Ba-na-batc bix max naih gâyf tuz sec cumh pâuz heh?7Naih mănv ninyh ayx peengz zef năngx nhlinc pyau nyăngz năngv heh? Naih mănv songx tungh cuđ lauđ winb bix max nhlinc nănh nyăngz pyâu heh? Max six naih mănv jămđ pax jiz yuungh bix max hopb pax jiz yuungh nyăngz nu?8Yaz max zâyf cungb âyz nây stâyv sangc nyăngz munh coong nâyx đomc wac nef? Ha gâyf njanh max zâyf lauf coong ayx nâyx haz?9Wâyc naih ja yămz Mô-sê nyăngz gâyf njanh stâub coong: “Ngoongh wăngh nyuih blauh nyăngz săngx huđ năngx gâyf pongz ngoongh nyăngz nzetx.” Ha Zâu Tênb-Huungh numđ stauh phunz ngoongh wăngh mah?10Max six Nănh coong wâyc phunz pănh tuz gongx heh? Senz, nâyx đomc wac tuz ja taih six wâyc phunz pănh tuz gongx, coong njayh njingh nyăngz munh six oix zuc naih njih mungc bix njayh, nzof bopc blauh nyăngz munh six sâub sâuđ zu tuz tanb phunz nănh nyăngz phănc.11Năngđ coong buz nzaox meengc hoonh nyăngz jau phunz nyâuh, bix buz năngđ oix sâub tăng nyâuh nây stâyv sangc nyăngz tax huungđ six lauf hoođ gâyf lêc stah?12Năngđ coong pitc đomc munh lôx năngx naih gâyf nongc wax huungđ gâyf yămz nyâuh, buz six lauf naih gâyf nongc năngx đuungx têx? Six buz max nongc nâyx huungđ gâyf. Nzof, buz yâuc tanyđ muif huungđ wâyc max phunz laiv huungđ taih tăng nzez Zâu Jix-Tuz nyăngz Cuđ Jenx.13Ha nyâuh max pâyz tuz coong laiv lanh yămz wa bongc Zâu Tênb-Huungh nyăngz pyau ayx cumh pâuz, six lauf tuz nhlinc yămz wa bongc Zâu Tênb-Huungh nyăngz pyau wax đomc tax huungđ haz, nzof laiv lanh ayx cumh pâuz yămz wa congx tinc lauf tuz yămz wa congx tinc nyăngz phănc?14Lauf tinyh năngđ Zâu nzaox coong, Laiv lanh ninyh nzônh Cuđ Jenx six păngc Cuđ Jenx yămz.15Six yaz max nongc wax đomc gâyf tiny. Nzof, yaz ja nâyx đomc wac taih yâuc max zâyf oix nongc yaz tuz wax huungđ gâyf, wâyc, yaz nođ tayc lôx năngx gongx têx phunz munh zoz yaz coong nyăngz wac taih ayx năngx jetx.16Wâyc zuc yaz nzônh Cuđ Jenx, six max naih luungđ phunz yaz numđ săngh ayx lub, wâyc yaz six zuc stayb yămz nâyx huungđ cumh pâuz. Năngđ coong yaz max ninyh nzônh Cuđ Jenx yaz senz zuc zâuđ gôh!17Năngđ coong yaz numđ nyađ ayx nâyx huungđ cumh pâuz, yaz six tuz stipx sâuđ nyâyc. Nzof năngđ coong yaz max numđ nyađ ayx, yaz lauf tuz jaoz phunz nongc ayx cumh pâuz munh nzof.18Ha nâyx, yaz nyăngz sâuđ nyâyc six luungđ heh? Nây six yămz yaz nzônh Cuđ Jenx six cungb ninyh nzônh cuungv, phunz yaz hayh ninyh nzônh Cuđ Jenx bix max zâuđ nongc tauv wax huungđ nzônh Cuđ Jenx nyăngz gâyf.19Hănđ six tuz pungx goib gâyh đutb muif huungđ, yaz lauf cănh ayx phunz yaz săngh muif lanh munh nyăngz pâuz, phunz yaz hayh ênz tuz đuungx lanh munh taih zen.20Cloon Yu-tai munh yămz yaz six ayx cayx năngđ Yu-tai munh, phunz yaz hayh ênz tuz Yu-tai munh taih zen. Cloon yămz gâyf njanh cah đi nyăngz munh yămz, yaz lauf ayx cayx năngđ yămz gâyf njanh cah đi nâyx, hănđ six yaz max zâyf yămz gâyf njanh cah đi, phunz yaz hayh ênz tuz yămz gâyf njanh cah đi wax đomc munh taih zen.21Cloon wax đomc max naih gâyf njanh nyăngz munh yămz, yaz ayx cayx năngđ max naih gâyf njanh nyăngz munh (yâuc max zâyf coong yaz max naih Zâu Tênb-Huungh nyăngz gâyf njanh, yaz six yămz Zâu Jix-Tuz nyăngz gâyf njanh cah đi), phunz yaz hayh ênz tuz wax đomc max naih gâyf njanh nyăngz munh taih zen.22Cloon wax đomc đoonh nyăngz munh yămz, yaz ayx cayx năngđ munh đoonh nâyx, phunz yaz hayh ênz tuz wax đomc đoonh nyăngz munh taih zen. Yaz yămz ayx cayx năngđ muif huungđ munh, phunz yaz hayh nongc muif huungđ zux ix njâuv tuz tix lanh munh.23Yaz ayx muif huungđ six wâyc Cuđ Jenx, Phunz yaz tuz săngh ah lanh Cuđ Jenx nyăngz munh.24Nyâuh max pâyz tuz coong tinyh tâu tiuv nyăngz munh six muif lanh tiuv nzuf, yâuc cungb ah lanh tuz stipx tany haz? Oix zuc tiuv cayx năngđ wa nâyx phunz nyâuh hayh tuz stipx sâuđ nyâyc.25Nzof yămz wax đomc tinyh tâu tiuv nyăngz munh, six muif lanh cănh hoođ lenz ayx tuz quênx. Stiz ayx tuz nâyx nongc phunz stiz tuz stipx hayh yootz nyăngz tany, nzof pănh tuz stipx nyăngz six max hayh yootz nyăngz tany.26Wâyc nây, yaz tiuv ayx nâyx, six max zâyf cungb tiuv cuungv, nzof yaz bopc, six max zâyf cungb bopc nzaox.27Six, yaz jaoz ayx tuz yaz nyăngz stinb a zuc buc, săngx đanyf yaz nzaox tuz munh blătc, yaz bix zef cănh zuc zoz setb.

FAR EAST BROADCASTING COMPANY

https://app.library.bible/content/4031cf477b55913c