1 Corinthians3
1Yâuf pez lex, yaz max hayh coong ănz nyâuh cayx năngđ âyz Singx-Lingh nyăngz munh, six cayx năngđ cay âyz stinb a nyăngz munh, yâuc cayx năngđ ah yađ steengb nyăngz munh sây jenz yămz Zâu Jix-Tuz nâyx.2Yaz six phunz nyâuh hopb nu max zâyf phunz nhlinc năngv, wâyc nyâuh max zeengh hayh nhlinc tuz. Wâyc, ayx tuz tauv nâyx zanyf, nyâuh lauf max zeengx hayh nhlinc tuz.3Nzof nyâuh six năngx jinh săngh âyz nây stinb a nyăngz munh. Wâyc yămz nyâuh cah njaf, yâuc năngx naih tinyh hănđ cloon tinyh nzeengz nyăngz jau, ha nâyx max zâyf nyâuh six âyz nây stinb a săngh, yâuc yămz ayx cayx năngđ stâyv sangc nyăngz munh nâyx haz?4Wâyc, nâyx lanh coong: “Yaz lêpc Phao-lô,” wax lanh lanh yâuc coong: “Yaz lêpc A-bô-lô,” ha nâyx nyâuh max zâyf săngh nây stâyv sangc nyăngz munh haz?5Ha, A-bô-lô six mănv? Nzof Phao-lô six mănv heh? Stiz six cungb săngh ayx pâuz wax đomc cuungv, nzof nyâuh yâuc păngc stiz bix zen, yâuc âyz Zâu bênc phunz mănv cănh naih mănv nyăngz phănc.6Yaz six songx, A-bô-lô six ănz womz, six Zâu Tênb-Huungh cănh ayx phunz lub taih.7Wâyc nây, songx nyăngz munh cloon ănz womz nyăngz munh, six max setb luungđ, Zâu Tênb-Huungh six ayx phunz lub taih wax Tauh.8Nzof songx nyăngz munh cloon ănz womz nyăngz munh, six tinyh năngđ, mănv yâuc cănh âyx mănv ayx nyăngz cumh pâuz bix tuz stipx sâuđ nyâyc.9Wâyc buz six săngh Zâu Tênb-Huungh nyăngz cumh pâuz munh, nzof nyâuh six Zâu Tênb-Huungh njayh nyăngz njăngx njingh, cloon Zâu Tênb-Huungh zâyv nyăngz pyau.10Âyz Zâu Tênb-Huungh sađ pôz phunz yaz, yaz songđ njăpc coonz tay cayx năngđ ayx stangc pyây nyăngz munh nâyx, nzof pitc lanh munh yâuc păngc wa bix zâyv staox, six muif lanh munh oix zuc năngx cayb bôngh nănh zâyv staox nyăngz jau,11wâyc max naih mănv hayh njăpc pitc nomz coonz tay blătc nzu tuz njăpc săngh wax nomz, nây six Zâu Yê-su Jix-Tuz.12Nzof năngđ coong, laiv lanh nongc, sămz, nyanh, njăuz zâuz, njăngx, mađ caođ, bah gao, zâyv ănz wax nomz coonz tay,13muif lanh munh nyăngz cumh pâuz six tuz hinđ manyf setb taih, tauv naih ah noib six tuz hinđ manyf wax đomc cumh pâuz nzuf; wâyc wax đomc cumh pâuz six tuz hinđ manyf setb taih yămz wa tâu nzuf, nzof tâu six cănh zah mangc jađ pănh muif lanh nyăngz cumh pâuz six nongc laiv huungđ zâyv.14Năngđ coong laiv lanh nyăngz cumh pâuz max zuc tâuf sac, yămz nănh zâyv nyăngz jau, wax lanh munh six tuz stipx sâuđ nyâyc;15năngđ coong laiv lanh nyăngz cumh pâuz zuc tâuf pu sac, wax lanh munh six zuc stâyb nzuf, nzof nănh lauf cănh tuz njâuv, six cayx năngđ cay clăngv quaix tâuf nâyx.16Nyâuh max pâyz tuz coong nyâuh six Zâu Tênb-Huungh nyăngz congx tinc nzof Zâu Tênb-Huungh nyăngz Singx-Lingh yâuc săngh yămz nyâuh cah njaf haz?17Năngđ coong laiv lanh ayx huđ Zâu Tênb-Huungh nyăngz congx tinc, Zâu Tênb-Huungh six lauf mêtc wax tauh, wâyc Zâu Tênb-Huungh nyăngz congx tinc six đăngb zeengh, nzof nyâuh six congx tinc.18Năngx gâyf cănh jaf pănh. Năngđ coong nyâuh naih laiv lanh numđ cayx năngđ six naih tongb manyh yămz nây stâyv sangc, wax lanh munh oix zuc ayx pênx “munh oongx”, phunz nănh hayh tuz naih tongb manyh.19Wâyc nây bamh canz nyăngz tongb manyh âyz Zâu Tênb-Huungh mangc six oongx nzongf. Wâyc naih wac ja coong: “Nănh nongc wax đomc tongb manyh munh nyăngz tongb manyh taih ayx ploz lopb stiz.”20Yâuc naih ja coong: “Zâu Pâyz tuz wax đomc tongb manyh munh stuv nyăngz jau, six max săngh nongc.”21Wâyc nây, năngx gâyf naih mănv ayx nzetx lub yămz nây bamh munh. Wâyc muif huungđ six săngh nyâuh nyăngz nzuf,22hănđ six Phao-lô, max six A-bô-lô, max six Sê-pha, max six bamh canz, max six săngh mengc, max six tayc nyăngz jau, max six nâyx zanyf nyăngz dlayc, max six cah đangz nyăngz dlayc. Muif huungđ six săngh nyâuh nyăngz nzuf,23nzof nyâuh six săngh Zâu Jix-Tuz nyăngz, nzof Zâu Jix-Tuz yâuc săngh Zâu Tênb-Huungh nyăngz.
FAR EAST BROADCASTING COMPANY