Зах7
1Дарий кугыжан нылымше ий вуйлатымыж годым Захарийлан Господьын шомакше лийын. Тиде индешымше тылзын, кислев тылзын, нылымше кечынже лийын.2Вефильыште илыше калык Шарецерым, Регем-Мелехым да нунын еҥыштым Господь поро лийже манын сӧрвалаш, тыгак Господь Саваофын храмыштыже улшо иерей-влак деч да пророк-шамыч деч тыге йодаш колтен: «Визымше тылзын ойгыраш да пӱтым кучаш кӱлеш мо? Икмыняр ий почела ме лач тыге ыштенна».4Тунам мылам Господь Саваофын шомакше лийын:5«Тиде мландын калыкшылан да иерейже-влаклан тыге каласе: ”Кунам те шымле ий мучко визымше да шымше тылзын пӱтым кученда да ойгыренда, пӱтым Мыланем кӧра кученда мо? Мыланем кӧра мо?6Кунам те кочкында да йӱында, шкендам темаш огыл мо кочкын-йӱында?7Тиде мутымак огыл мо Господь ончыч лийше пророк-влак гоч ойлен? Тунам Иерусалим ден тудын йыр улшо олалаште еҥ-влак эше иленыт да тушто тыныс озаланен, кечывалвел мланде ден тӧрверыштат илыше-шамыч лийыныт”».8Захарийлан Господьын шомакше лийын:9«Господь Саваоф тыге ойла: чын судым ыштыза, икте-весыда дек поро да чаманыше лийза.10Тулык вате ден тулык йочам, йот калык еҥ ден йорлым ида шыгыремдыл, шӱмыштыда икте-весылан осалым ида шоно».11Но нунын колыштмышт шуын огыл, нуно тупынь савырненыт да, колаш огыл манын, пылышыштым петыреныт.12Господь Саваофын закон ден шомакше-влакым колышташ огыл манын, нуно шке шӱмыштым тулгӱ гай пеҥгыдым ыштеныт. Нине закон ден шомак-влакым шке Шӱлышыж дене Тудо ончыч лийше пророк-влак гоч колтен улмаш. Сандене Господь Саваоф нунылан чот шыдешкен.13«Кунам Мый нуным ӱжынам, нуно колыштын огытыл, сандене, кунам нуно ӱжаш тӱҥалыт, Мыят нуным ом колышт, – ойла Господь Саваоф. –14Мый нуным тӱрлӧ калык коклашке пуалтен колтенам, нине калыкым нуно пален огытыл. Нунын деч вара тиде мланде пустаҥын, тушто нигӧ ок кошт – тыге нуно эн сай мландым ир мландыш савыреныт».
Institute for Bible Translation, Finland