Руфь4
1Вооз ола капка деке лектын шинчын. Тукымым аралыше родыжын эртен кайымыжым ужмеке – кӧн нерген тудо Руфьлан ойлен улмаш, – Вооз тудлан каласен: «Тол тышке, шич». Саде еҥ воктекыже верланен.2Вооз оласе кугурак-влак кокла гыч лу еҥым ӱжын конден да нунылан каласен: «Тышке шичса». Нуно шинчыныт.3Вара Вооз тиде родыжлан каласен: «Моав мланде гыч пӧртылшӧ Ноеминь Елимелех родынан пасужым ужала.4Мый шоналтышым, тидын нерген тылат каласаш кӱлеш: тудым налнет гын, тыште шинчыше-влак да калыкнан кугуракышт ончылно тудым тӱлен нал. Ынет нал гын, каласе – мый палаш тӱҥалам. Вет тый дечет молылан нигӧлан налаш, а тый дечет вара мый улам». Тудыжо вашештен: «Мый тӱлен налам».5Тунам Вооз ешарен: «Ноеминь деч пасум налат гын, колышо эргыжын моав Руфь ватыжымат марлан налшаш улат. Тыге колышын тукымжо шуйымо да мландыже тудын тукымжылан пӧртылтымӧ лиеш».6Тидлан родыжо вашештен: «Тыге гын, мый тиде мландым налын ом керт, вет тудо икшывем-влаклан ок логал. Тудым тый тӱлен нал, а мый тидым ыштен ом керт».7Ожно Израильыште погым тӱлен налмым але тудым вес еҥлан кусарымым пеҥгыдемдыше тыгай йӱла лийын: иктыже шке йолчиемжым кудашын да весылан, [тукымым арален налаш келшыше родыжлан,] пуэн. Тыге израильтян-влак кутырен келшымыштым пеҥгыдемденыт.8Саде родыжо Воозлан каласен: «Нал шкаланет». Тудо йолчиемжым кудашын [да Воозлан пуэн].9Тунам Вооз кугурак-влаклан да уло калыклан каласен: «Те ынде чыланат танык улыда: мый Ноеминь деч Елимелехын, Хилеонын да Махлонын мо улыштым чыла налам.10Адакшым мландыже колышо еҥын тукымжыланак кодшо да колышын лӱмжӧ мемнан калык коклаште да тудын илыме олаштыже ынже йом манын, мый тыгак Махлонын тулык ватыжым, моав Руфьым, марлан налам. Таче те тидлан танык лийыда».11Ола капка дене улшо калык да кугурак-влак каласеныт: «Ме танык улына. Тек Господь тыйын пӧртышкет пурышо ватетым Израиль калыкын авашт лийше Рахиль ден Лия гайым ышта! Ефрафаште куатан лий, Вифлеемыште тыйын лӱмет чапланыже!12Тек Господь тиде самырык ӱдырамаш гоч тыйын урлыкетым Фамарьын Иудалан ыштыме Фаресын тукымжо гайым ышта!»13Тыге Вооз Руфьым марлан налын, да тудо Воозын ватыже лийын. Вооз тудын дене мален. Господь суапландарен, да Руфь мӱшкыраҥын – эргым ыштен.14Ӱдырамаш-влак Ноеминьлан ойленыт: «Моктымо лийже Господь – Тудо тылат тукыметым аралыше икшывым пуэн! Тек тудын лӱмжӧ Израильыште чаплана!15Тудо тылат илыш вийым пӧртылта, шоҥгеммекет ӱшанле эҥертыш лиеш. Вет тудым Руфь шешкыч ыштен – тудыжо тыйым йӧрата, тыланет тудо шым эрге дечат шерге».16Тиде йочам Ноеминь кидышкыже налын да ӧндалын нумалыштын, тудым йӧратен ончен.17Пошкудо ӱдырамаш-влак ойленыт: «Ноеминьын эрге шочын». Нуно йочалан Овид лӱмым пуэныт. Тудо Иессейын ачаже, Давидын кочаже лийын.18Теве Фаресын тукымжо: Фарес деч Есром шочын,19Есром деч – Рам, Рам деч – Аминадав,20Аминадав деч – Наассон, Наассон деч – Салмон,21Салмон деч – Вооз, Вооз деч – Овид,22Овид деч – Иессей, Иессей деч Давид шочын.
Institute for Bible Translation, Finland