Руфь2
1Ноеминьын Елимелех марийжын тукымыштыжо Вооз лӱман поян да лӱмлӧ родыжо лийын.2Ик кечын моав Руфь Ноеминьлан каласен: «Лиеш мо, мый пасушко каем да, кӧн шинчаштыже поро кумылым сулем, тудын почешыже кодшо шурно парчам погем?» Ноеминь тудлан вашештен: «Кай, ӱдырем».3Тудо каен да пасушто тӱредше-влак почеш парчам поген. Туге лектын: тиде пасун озаже Елимелехын тукымжо гыч Вооз улмаш.4Лач тунамак Вифлеем гыч шке пасушкыжо Вооз толын да тӱредше-влаклан каласен: «Господь тендан дене лийже!» Нунышт тудлан вашештеныт: «Тек Господь тыйым суапландара!»5Тӱредше-влакым вуйлатыше тарзе деч Вооз йодын: «Тиде самырык ӱдырамаш кӧн тукымжо гыч?»6Тарзе вашештен: «Тиде самырык ӱдырамаш – моав калык гыч, тудо Ноеминь дене пырля Моав мланде гыч толын.7Тудо йодо: ”Лиеш мо, мый тӱредше-влак почеш кодшо шурно парчам погаш тӱҥалам?” Эрденак толын, але мартеат каныде гаяк пашам ышта».8Тунам Вооз Руфьлан каласен: «Колышт, ӱдырем! Вес пасушко погаш ит кошт, тышечын ит кае. Мыйын тарзе ӱдырамаш-влакем дене тыштак код.9Тый кушто тӱредмым ончо да почешышт кошт. Тыйым ынышт тӱкӧ манын, мый тарзем-влаклан каласышым. Йӱмет шуэш гын, тарзем-влакын йӱмӧ атышт гыч йӱын кертат».10Руфь сукен шинчын, вуйжым мланде марте савалтен да каласен: «Мо дене мый поро кумылетым суленам, молан тый йот мланде гыч толшо верч тынар тыршет?»11Вооз тудлан вашештен: «Мариет колымо деч вара авалийшет дене поро улмет нерген мыланем ойленыт. Тый шке ачат ден аватым, шочмо мландетым коден каенат да тылат ончыч палыдыме калык деке толынат.12Тек Господь тыге ыштыметлан поро дене пӧртылта. Господь деч, Израильын Юмыж деч, Кудын шулдыржо йымаке тый аралалташ толынат, тек тыланет кугу пӧлек лиеш».13Руфь каласен: «Озам, тек мый ончыкыжымат поро кумылетым сулен налаш тӱҥалам! Ик тарзетымат ом шого гынат, тый мыйым лыпландарышыч, чонемлан келшышын ойлышыч».14Кунам кочкаш жап шуын, Вооз тудлан каласен: «Тол тышке, киндым коч, шултышетым йошкар арака сыркаш тушкалте». Руфь тӱредше-влак дене пырля шинчын. Вооз тудлан пуштылмо пырчым пуэн. Руфь теммешкыже кочкын, да кочкышыжо эше утен кодын.15Вара Руфь кынелын да адак парчам погаш каен. Вооз тарзыже-влаклан кӱштен каласен: «Тек тудо кылта-влак коклаштат пога, тидлан тудым ида шылтале.16Шурно парчам кылта гычат кудалтен кодыза. Тек тудо пога [да кочкеш], тудым ида вурсо».17Тыге Руфь пасушто парчам кас марте поген коштын. Погымо парчажым шиймеке, шож ик ефа наре лектын.18Шурныжым налын, тудо олашке пӧртылын. Авалийшыже тудын кунар погымыжым ужын. Вара Руфь [помышыж гыч] тудлан кочмыж деч кодшыжым луктын пуэн.19Авалийшыже тудын деч йодын: «Тый таче кушто погенат? Кушто пашам ыштенат? Тек тылат порылыкым ыштыше еҥ суапландарыме лиеш!» Руфь авалийшыжлан кӧн пасушто лиймыжым каласен: «Кӧ дене пашам ыштенам, тудын лӱмжӧ Вооз».20Ноеминь шешкыжлан манын: «Тек Господь тудым суапландара! Тудо илыше-влакымат, колышо-влакымат шке порылыкшо деч посна коден огыл». Ноеминь эше ешарен: «Тиде айдеме – мемнан тукым гыч, тудо мыланна тукымым аралыше родына лиеш».21Моав Руфь [авалийшыжлан] каласен: «Тудо мыланем эсогыл мане: ”Тӱред пытарымешке мыйын тарзе ӱдырамаш-влакем дене пырля лий”».22Ноеминь Руфь шешкыжлан вашештен: «Ӱдырем, тудын тарзе ӱдырамашыже-влак дене пырля коштмет пеш сай лиеш. Вет вес еҥын пасуштыжо тылат иктаж-мом удам ыштен кертыт».23Тыге Руфь Воозын тарзе ӱдырамашыже-влак дене пырля пашам ыштен. Шож ден шыдаҥым тӱред пытарымешке, тудо шурно парчам поген коштын да авалийшыж дене пырля илен.
Institute for Bible Translation, Finland