Рим13
1Кӱшыл кучемвийым кучышо-влакын мутыштым кажне еҥ колыштшаш‚ вет кеч-могай кучемвий – Юмо деч‚ чыла кучемвийым Юмо шогалтен.2Тыгеракын, кӧ кучемвийлан торешлана‚ Юмын ыштыме радам ваштареш шогалеш‚ а ваштареш шогалше-влак шке ӱмбакышт судитлымашым налыт.3Вет поро пашам ыштыше огыл‚ а осалым ыштыше еҥ вуйлатыше-влак деч лӱдшаш. Кучемвий деч ынет лӱд гын‚ порым ыште‚ тунам тудо тыйым мокта.4Тудо – Юмын тарзыже, тыланет сай лийже манын ышта. Но тый осалым ыштет гын‚ лӱд, вет тудо таклан огыл кердым нумалеш: тудо – Юмын тарзыже‚ тудын гоч Юмын шыдыже осалланыше ӱмбак возеш.5Тыгеже мут колыштшо лийман. Тидыжым Юмын судшылан кӧра веле огыл‚ но совестьлан кӧрат ыштыман.6Тидлан верч те йозакымат тӱледа‚ вет кучемвийым кучышо-влак Юмылан служитлат‚ эре тиде пашам ыштат.7Тыгеракын‚ мом пуышашдам кажнылан пуыза: кӧлан лӱм окса – лӱм оксам, кӧлан йозак – йозакым‚ кӧлан лӱдмаш – лӱдмашым‚ кӧлан чап – чапым.8Ваш йӧратымаш деч моло шотышто нигӧланат парымеш ида код. Весым йӧратыше еҥ законын чыла йодмыжым шуктен.9Вет кӱштымаш-влак: «ит яжарлане»‚ «ит пушт»‚ «ит шолышт»‚ «шойыштын, еҥ ӱмбаке таныклен ит ойло»‚ «еҥын мо улыжлан ит сутлане» да кеч-могай моло кӱштымаш ик ойышто иктешлалтеш – «шкендым кузе йӧратет‚ лишылъеҥетымат тугак йӧрате». 10Йӧратымаш лишылъеҥлан осалым ок ыште‚ сандене йӧратымаш – законым шуктымаш.11Те кызытсе жапым паледа: ынде мыланна омо деч помыжалташ жап шуын‚ вет утаралтмаш кызыт мемнан деке ӱшанаш тӱҥалмына годсо деч лишнырак.12Йӱд мучашке шуын‚ да кече лишемын. Тыгеже пычкемышын пашажым кодышаш да волгыдын саргуралже дене вӱдылалтшаш улына,13кечывал кечысе семын шкенам сайын кучен илаш тӱҥалына‚ орен‚ аракам йӱын‚ яжарланен‚ аташланен‚ ӱчашен да кӧранен огына иле.14Иисус Христос Господьна дене вӱдылалтса‚ да кап ден чонда верч тыршымашым сутланымаш марте ида шукто.
Institute for Bible Translation, Finland