Шотл25
1Ситтимыште илаш шогалмышт годым израильтян-влак моав ӱдырамаш-влак дене яжарланаш тӱҥалыныт.2Шке юмыштлан кондымо надыр сийым кочмашке моав ӱдырамаш-влак нунымат ӱжыныт. Израильтян-влак [нунын надырыштым] кочкыныт да нунын юмыштлан кумалыныт.3Тыге израиль калык Ваал-Фегор лӱман шояк юмым шотлаш тӱҥалын. Тунам Израиль ӱмбак Господьын шыдыже ылыжын.4Господь Моисейлан каласен: «Калык вуйлатыше-влакым пого да чылаштым кечывал кечын Мыйын ончылнем пушт. Тунам Мыйын кугу шыдем израиль калык деч кораҥеш».5Моисей Израильын судьяже-влаклан каласен: «Тек кажныже шке еҥда-влак кокла гыч Ваал-Фегорым шотлышо еҥ-влакым пуштеш».6Тиде жапыште ик израиль пӧръеҥ Моисейын да уло калыкын шинча ончылнышт – нунышт тыгодым Юмо дене вашлийме омашыш пурымо вер дене шортын шогеныт – шке декше мадиан ӱдырамашым конден.7Тидым ужын, Финеес, Елеазарын эргыже, иерей Ааронын уныкаже, калык тӱшка деч кораҥ каен, кидышкыже умдым налын.8Тудо израиль пӧръеҥ почеш омашыш пурен да тушан пӧръеҥымат, ӱдырамашымат мӱшкырышт гыч шуралтен. Тунам израиль калыкым пытарымаш чарнен.9Тиде пытарымаш деч чылаже коло ныл тӱжем еҥ колен.10Господь Моисейлан каласен:11«Финеес, Елеазарын эргыже, иерей Ааронын уныкаже, израиль калык деч Мыйын шыдем кораҥден. Нунын коклаште тудо Мыйын верч шыдешкен, сандене Мый шке шыдем дене израиль калыкым шым пытаре.12Финееслан каласе: Мый тудын дене ойпидышым ыштем да тудлан эсен илышым пуэм.13Финеес шке Юмыж верч шыдешкен да тидын дене израиль калыкын сулыкшым касарен, сандене тиде ойпидыш почеш тудо да тудын тукымжо курымеш иерей лийыт».14Мадиан ӱдырамаш дене пырля пуштмо израиль еҥын лӱмжӧ Зимри улмаш. Тудо Салун эргыже, Симеон тукым гыч улшо ик урлыкын вуйлатышыже лийын.15Пуштмо мадиан ӱдырамашын лӱмжӧ Хазва улмаш. Тудо Цурын ӱдыржӧ, а Цуржо ик мадиан тукымын вуйлатышыже лийын.16Господь Моисейлан каласен:17«Мадиан-влаклан тушман лийза, нуным пытарыза.18Вет нунат тендан дене тушман семын чоян ыштеныт: Фегор дене да шке Хазва шӱжарышт дене – мадиан вуйлатышын ӱдыржӧ дене – тендам алгаштареныт. Тудыжо Фегор верч калыкым пытарыме кечын пуштмо лийын».
Institute for Bible Translation, Finland