Шотл20
1Икымше тылзын израиль калык Син ир мландыш толын да Кадесеш шогалын. Тушто Мариам колен, тудым тушанак тоеныт.2Тушто калыклан вӱд лийын огылат, еҥ-влак Моисей ден Аарон ваштареш погыненыт.3Нуно Моисейлан тыге ӧпкелен ойленыт: «Господь ончылно иза-шольына-влак колымо годым меат колена гын, сайрак лиеш ыле!4Молан те Господьын калыкшым тиде ир мландыш конденда? Тышан вольыкна дене пырля колаш мо?5Молан те мемнам Египет гыч тиде йӧрдымӧ верыш конденда? Тыште шурным ӱдаш ок лий, тыште смоква пушеҥгат, виноградат, гранат саскат уке! Эсогыл йӱаш вӱдат уке!»6Моисей ден Аарон, калык деч кораҥын, Юмо дене вашлийме омашыш пурымо вер деке толыныт да кумык возыныт. Тунам нунылан Господьын чапше кончен.7Господь Моисейлан тыге каласен:8«Пондым нал да Аарон изат дене пырля уло калыкым пого. Вара шинча ончылнышт кӱ курыклан вӱдым пуаш кӱштен каласе, да тушеч вӱд йогаш тӱҥалеш. Тыге тый курык гыч вӱдым луктат да калык ден вольыкым йӱктет».9Моисей, Господьын кӱштымыж семынак, Тудын чурий ончылныжо улшо пондым налын.10Вара Моисей ден Аарон калыкым кӱ курык деке погеныт. Моисей каласен: «Пудыранчыкым нӧлталше-влак, колыштса! Ме тыланда вӱдым тиде курык гыч лукшаш улына мо?»11Моисей кидшым нӧлталын да пондыж дене кӱ курыкым кок гана перен – тушечын вӱд йогаш тӱҥалын. Вӱд тунар шуко лийын – калыкат, вольыкат теммеш йӱыныт.12Господь Моисей ден Ааронлан каласен: «Те Мыланем ышда ӱшане да израиль калыклан Мыйын святой улмем ышда ончыкто. Сандене ты калыкым Мыйын пуымо мландыш те огыл намиен пуртеда!»13Тиде Мерива вӱд лийын. Тыште израиль эрге-влак Господьлан ӧпкелен ойленыт, да Тудо нунылан Шкенжын святой улмыжым ончыктен.14Кадес гыч Моисей шке еҥже-влакым Едомын кугыжаж деке колтен да тыге каласаш кӱштен: «Тыйын Израиль шольыч тыге ойла: мыланна могай нелылыкым ужаш логалын – тый палет.15Мемнан кугезына-влак Египетыш илаш кусненыт, ме тушто кужу жап иленна. Египтян-влак мемнамат, ача-кочана-влакымат индыреныт.16Тунам ме Господь деч полышым йодын кумалынна. Тудо мемнам колын: шке Суксыжым колтен да мемнам Египет гыч луктын. Ынде ме Кадесыште, тыйын мландет воктенысе олаште, улына.17Поро лий, шке мландет гоч эртен каяш пу. Ме пасу ден виноград аҥа гоч огына кай, тыйын тавет гыч вӱдым огына йӱ. Ме Кугыжан корно дене веле каена. Тыйын мландетым эртымешке, пурла велкат, шола велкат огына савырне».18Но Едом вашештен: «Мемнан мландына гоч ида кай, а каеда гын, ме керде дене кредалаш лектына».19Израиль эрге-влак тудлан каласеныт: «Ме кугу корно дене каена. Тендан вӱддам йӱаш да вольыкнам йӱкташ тӱҥалына гын, ме тыланда тӱлена. Мыланна нимат огеш кӱл – мландыда гоч эртен каяш гына пуыза».20Но Едом вашештен: «Мемнан мланде гоч те огыда кай!» Нуно кугу, виян сарзывийым погеныт да израиль калык ваштареш лектыныт.21Тыге Едом израиль калыкым шке мландыж гоч колтен огыл, да израиль калык тудын деч вес велыш савырнен каен.22Кадесым коден, израиль эрге-влак Ор курык деке толыныт.23Ор курыкышто, Едом чек воктене, Господь Моисей ден Ааронлан каласен:24«Ааронлан шке ача-кочаж-влак деке каяш жап шуын. Мерива вӱд воктене те Мыйын кӱштымем колыштын огыдал. Сандене Аарон Мыйын израиль калыклан пуымо мландышкем ок пуро.25Аарон [изатым] да тудын Елеазар эргыжым [уло калык ончылно] Ор курыкыш кӱзыктӧ.26Аарон ӱмбач иерей вургемжым кудаш да Елеазар эргыжлан чикте. Тушан Аарон кола да шке ача-кочаж-влак деке кая».27Моисей Господьын кӱштымыж семынак ыштен: уло калык шинча ончылно нуно Ор курыкыш кӱзеныт.28Тушто Моисей Ааронын вургемжым кудашын да Елеазар эргыжлан чиктен. Тушан, курык вуеш, Аарон колен. А Моисей ден Елеазар курык гыч воленыт.29Ааронын колымыж нерген уло калык пален налын. Ааронын колымыжо шотышто израиль эрге-влакын шортмо йӱлашт кумло кече шуйнен.
Institute for Bible Translation, Finland