Мк11
1Иерусалим деке лишеммышт годым нуно Елеон курыкысо Виффагий ден Вифаний деке миеныт. Иисус кок тунемшыжым ончык колтен2да нунылан манын: «Ончылныда улшо ялыш кайыза. Тушко пурымекыда, те тымарте нигӧат кушкыждымо, йолыштен шогалтыме самырык осёлым тунамак ужыда. Тудым мучыштарыза да вӱден кондыза.3”Молан тидым ыштеда?” манын йодыт гын, каласыза: ”Осёл Господьлан кӱлеш, вашке тудым мӧҥгеш колта”».4Тунемшыж-влак каеныт, уремыште капка воктеке йолыштен шогалтыме самырык осёлым ужыныт да тудым мучыштареныт.5Тушто шогышо кокла гыч южышт нунылан ойленыт: «Мом те ыштеда? Молан самырык осёлым мучыштареда?»6Тунемше-влак Иисус кузе кӱштымӧ семынак ойленыт. Еҥ-влак нуным колтеныт.7Нуно самырык осёлым Иисус деке конденыт, осёл ӱмбак вургемыштым пыштеныт. Иисус кушкыж шинчын.8Шукынжо корнеш вургемыштым шареныт, молышт – пушеҥге гыч пӱчкын налме укшым.9Ончыч кайыше калыкат, шеҥгеч мийыше-влакат кычкыреныт:«Осанна!Господь лӱм дене Толшотек моктымо лиеш!10Мемнан Давид ачанан Господь лӱм дене лишемше кугыжанышыжетек моктымо лиеш!Тек осанна пылпомышто йоҥгалтеш!» 11Иерусалимыш мийымеке, Иисус храмыш пурен. Чыла ончен савырнен, но кас шуынат, латкок тунемшыж дене пырля Вифанийыш каен.12Вес кечын Вифаний гыч лекмышт годым Иисусын кочмыжо шуын.13Тудо тора гычак лышташ дене леведалтше смоква пушеҥгым ужын. Ала саскаже уло манын, лишкырак ончалаш миен, но пушеҥге деке лишеммеке, лышташ деч молым нимомат муын огыл. Саска лийме жап але шуын огыл улмаш.14Тунам Иисус смоква пушеҥгылан каласен: «Тыйын саскатым ынде нигӧ нигунам ынже коч!» Тунемшыж-влак Тудын мутшым колыныт.15Иерусалимыш мийымекышт, Иисус храмыш пурен да тушеч сатум ужалыше ден налше-влакым поктен лукташ тӱҥалын. Тудо окса вашталтыше-влакын ӱстелыштым да кӧгӧрчен ужалыше-влакын теҥгылыштым савыркален кышкен,16храм кудывече гоч ӱзгарым нумал каяш чылалан чарен.17Тудо нуным тыге туныктен: «”Мыйын пӧртем чыла калык-влакын кумалме пӧртышт лиеш” манын возымо огыл мо? А те тудым агыше-влакын пыжашышкышт савыренда!»18Архиерей ден закон туныктышо-влак тидым колыныт. Иисусын туныктымыжо калыкым чот ӧрыктарен, сандене нуно Тудын деч лӱдыныт да, Тудым кузе пытараш манын, йӧным кычалаш тӱҥалыныт.19Кастене Иисус ола гыч лектын каен.20Эрдене эрак, эртен кайымышт годым, нуно смоква пушеҥгым вож марте кошкен шогалшым ужыныт.21Мо лиймым шарналтен, Иисуслан Петр ойлен: «Равви, ончо! Тыйын каргыме смоква пушеҥгет кошкен!»22Иисус каласен:23«Юмылан ӱшаныза. Тыланда чынак ойлем: кӧ тиде курыкланат ”Нӧлталт да теҥызыш шуҥгалт” манын кӱшта да, шӱмыштыжӧ кокытеланыде, кӱштымыж семын лиеш манын ӱшана гын, тыгак лиеш.24Сандене тыланда ойлем: кумалмаштыда мом йодыда, чылажымат налына манын ӱшаныза, тунам йодмыда шукталтеш.25Кунам кумал шогеда, тендан ваштареш еҥ-влакын титакыш пурымыштым кудалтыза, тунам Пылпомышысо Ачадат титакдам кудалта.26Еҥын титакшым огыда кудалте гын, Пылпомышысо Ачадат тендан языкдам ок кудалте».27Иисус тунемшыж-влак дене пырля адак Иерусалимыш толын. А кунам Иисус храмыште коштын, Тудын деке архиерей, закон туныктышо ден калык кугурак-влак миеныт.28Нуно йодыныт: «Могай кучемвий дене Тый чыла тидым ыштылат? Кӧ Тыланет тидым ышташ кучемвийым пуэн?»29Иисус нунылан вашештен: «Мыят тыланда йодышым пуэм. Мыйын йодышлан вашештыза, тунам Мыят могай кучемвий дене чыла тидым ыштымем каласем.30Иоаннын тынеш пуртымыжо Пылпомыш гыч але айдеме деч лийын? Мыланем вашмутым пуыза».31Нуно шке коклаштышт каҥашеныт: «Пылпомыш гыч манына гын, Тудо каласа: ”Вара молан те тудлан ӱшанен огыдал?”32Айдеме деч манына гын...» Нуно калык деч лӱдыныт, Иоанным чыланат пророкланак шотленыт.33Сандене нуно Иисуслан вашештеныт: «Огына пале». Иисус каласен: «Тугеже Мыят могай кучемвий дене тидым ыштымем ом ойло».
Institute for Bible Translation, Finland