Лев27
1Господь Моисейлан каласен:2«Израиль калыклан увертаре: иктаж-кӧ Господьлан айдемым пуаш сӧра гын, тудым тыйын каласыме ак дене сулен налын кертеш.3Коло гыч кудло ияш марте пӧръеҥлан ак витле сикль ший лийшаш, тудым святой сикль дене висыман.4А ӱдырамашлан ак кумло сикль лийшаш.5Визыт гыч коло ияш марте пӧръеҥ йочалан ак коло сикль, а ӱдыр йочалан лу сикль лийшаш.6Ик тылзаш гыч вич ияш марте рвезылан ак вич сикль, а ӱдырлан кум сикль ший лийшаш.7Кудло да тылеч кугурак ийготан пӧръеҥлан ак латвич сикль ший, а ӱдырамашлан лу сикль лийшаш.8А сӧрышӧ еҥ йорло да палемдыме акым пуэн ок керт гын, тек сӧрымӧ айдемым иерей дек конда. Сӧрышӧ еҥын мыняр пуэн кертмыжым шотыш налын, иерей тудлан акым каласа.9Господьлан надыр шотеш кондаш лийме вольык кокла гыч иктаж-кудыжым Господьлан пуаш сӧрат гын, тиде вольык святой лиеш.10Тудым вес вольык дене вашталташ ок лий: сайымат – начар дене, начарымат – сай дене. А кӧ содыки сӧрымӧ вольыкым весе дене вашталта гын, кок вольыкшат святой лийыт.11Господьлан пуаш сӧрымӧ вольык ару огыл гын, – тыгайым Господьлан надыр шотеш кондаш ок лий – тудым иерей деке кондыман.12Иерей, вольыкын сай але начар улмыжым шотыш налын, тудлан акым каласа. Могай акым палемда, тугай ак лийшаш.13Сӧрышӧ еҥ ты вольыкым мӧҥгеш тӱлен налнеже гын, тек тудо каласыме ак деке эше ик визымше ужашым ешарен тӱла.14А кӧ Господьлан святой пӧлек шотеш шке пӧртшым пуаш сӧра, тунам иерей, тиде пӧртын сай але шӱкшӧ улмыжым шотыш налын, тудлан акым пуышаш. Могай акым палемда, тугай ак лийшаш.15Сӧрышӧ еҥ шке пӧртшым мӧҥгеш налнеже гын, тек каласыме ак деке ик визымше ужашым ешарен тӱла – тунам пӧрт угыч тудын лиеш.16Кӧ Господьлан святой пӧлек шотеш шке тукым мландыж гыч пасум пуаш сӧра – пасун акшым, тушто мыняр пырчым ӱдаш лиймым шотыш налын, шотлыман. Ик хомер шожым ӱдымӧ мланде кумдыклан витле сикль шийым тӱлыман.17Кӧ шке пасужым Господьлан Пайрем ийын пуаш сӧра гын, пасулан тичмаш акым пуыман.18Кӧ шке пасужым Пайрем ий деч вара пуа гын, иерей тудлан, шушаш Пайрем ий марте мыняр ий кодмым шотыш налын, палемдыме акым волтышаш.19Пасум пуаш сӧрышӧ еҥ тудым мӧҥгеш налнеже гын, пасун акше деке ик визымше ужашым ешарен тӱлышаш. Тунам пасу тиде еҥлан пӧртылтымӧ лиеш.20Но тиде еҥ пасужым тӱлен налын огыл да тудым вес еҥлан ужалыме гын, пасужым тетла тӱлен налын ок керт.21Пайрем ийын, кунам пасу озажлан пӧртылтымӧ лийшаш, тудо мӧҥгеш налаш лийдыме святой пӧлек семын Господьлан кодеш. Тиде пасу иерей-влакын мландышт лиеш.22Кӧ Господьлан святой пӧлек шотеш пасум шке тукым мландыж гыч огыл, а вес еҥ деч тӱлен налмым пӧлекла,23тунам иерей, Пайрем ий марте мыняр ий кодмым шотыш налын, тиде мландылан акым палемдышаш. Пӧлеклыше еҥ тиде акым ты кечынак тӱлышаш, вет тидыже Господьлан пуымо святой пӧлек лиеш.24А Пайрем ийын тиде пасу пӧртылтымӧ лиеш. Кӧ деч тудым налме, кӧн тукым мландыже лийын – тиде пасу тудын дек пӧртылеш.25Чыла акым святой сикль дене шотлыман, ик сикльыште – коло гера.26Господьлан святой пӧлек шотеш вольыкын икымше шочшыжым пуаш ок лий, вет тудо тугакат Господьын. Шолдыра ден тыгыде вольыкын икымше шочшышт Господьын улыт.27Но тиде ару огыл вольык гын, тудым палемдыме ак почеш мӧҥгеш тӱлен налман, тышке эше ик визымше ужашым ешарыман. А тудым мӧҥгеш тӱлен огыт нал гын, палемдыме ак дене ужалыман.28Кӧ Господьлан шке погыж гыч пӧртылташ лийде пуэн – тиде кеч айдеме, вольык але тукым мланде лийже, – тудым ужаленат, мӧҥгеш тӱлен налынат ок керт. Чылажат, мом тыге пуымо – Господьлан пуымо поснак святой пӧлек.29Пӧртылташ лийде пуымо айдемымат мӧҥгеш тӱлен налаш ок лий. Тудо пуштмо лийшаш.30Мландын пуымо кеч-могай лектыш гыч, тиде пасу лектыш але пушеҥге саска лийже, луымшо ужаш – Господьын. Тиде – Господьлан пуымо поснак святой пӧлек.31Кӧ шкенжын луымшо ужашыжым мӧҥгеш тӱлен налнеже гын, тек тудын акше деке эше ик визымше ужашым ешара.32Шолдыра ден тыгыде вольык деч луымшо ужаш – кӱтӱчын пондыж йымач эртыше кажне луымшо вольык – Господьлан пуымо поснак святой пӧлек.33Тидын годым вольык сай але уда логалмым ончыман огыл, ик вольыкым весе дене вашталтыман огыл. А кӧ вашталта гын, кок вольыкшат святой лийыт. Нуным мӧҥгеш тӱлен налаш ок лий».34Теве Господьын Моисей гоч израиль калыклан Синай курык ӱмбалне пуымо кӱштымашыже-влак.
Institute for Bible Translation, Finland