Лев17
1Господь Моисейлан каласен:2«Ааронлан, тудын эргыж-влаклан да чыла Израиль калыклан увертаре – теве мом нунылан Господь кӱшта:3Израиль калык гыч [але тендан дек ушнышо ӧрдыжъеҥ кокла гыч] иктаж-кӧ надырлан ӱшкыжым, шорыкым але казам стан кӧргыштӧ але тудын деч ӧрдыжтӧ шӱшкылеш гын,4но тудым Юмо дене вашлийме омашыш пурымо вер деке, Господь илыме вер ончыко, ок кондо, [ – тидым тудо йӱлалтен пуаш але утаралташ манын, Господьлан келшыше тамлыпушан надыр шотеш конден кертеш, – да кӧ вольыкым стан деч ӧрдыжтӧ шӱшкылеш да тудым Юмо дене вашлийме омашыш пурымо вер деке ок кондо,] тыгай еҥ вӱрым йоктарымылан титакан лиеш. Тудо вӱрым йоктарен, садлан шке калыкше кокла гыч кораҥдыме лийшаш.5Тиде законым теве молан ыштыме: израиль эрге-влак шке надыр вольыкыштым ондак нурышто шӱшкылыныт, но ынде тудым Господь ончыко – Юмо дене вашлийме омашыш пурымо вер воктеке, иерей деке – кондышаш да Господьлан татулык надыр шотеш шӱшкылшаш улыт.6Тек иерей вольык вӱрым Юмо дене вашлийме омашыш пурымо вер воктенысе Господьын жертвенникше ӱмбаке шыжыкта, а кояжым йӱлалтен тӱргыкта. Тиде Господьлан келшыше тамлыпушан надыр лиеш.7Тек Израиль калык тетла шояк юмо-влак почеш коштмо дене ок яжарлане, шояк юмо-влаклан надырым огеш кондо. Тек тиде нунылан курым-курымеш тукым гыч тукымыш шуктен шогышаш закон лиеш.8Нунылан эше каласе: израиль тукым еҥ але тендан коклаште илыше иктаж йотъеҥ йӱлалтен пуымо але вес тӱрлӧ надырым пуа гын,9но тудым Господьлан надыр шотеш кондашлан Юмо дене вашлийме омашыш пурымо вер деке ок кондо – тиде еҥ шке калыкше кокла гыч кораҥдыме лийшаш.10Израиль тукым еҥ але тендан коклаште илыше йотъеҥ иктаж-могай вӱрым кочкышлан кучылтеш гын, тыгай вӱр кочшо еҥ ваштареш Мый чурием савырем да тудым шке калыкше кокла гыч пытарем.11Вет кеч-могай илышын чонжо – вӱрыштӧ. Тендан дене касарыме йӱлам шукташ манын, Мый тыланда тиде вӱрым жертвенникеш кондаш палемденам. Вет вӱрыштӧ илыш уло, тудо сулыкым касара.12Садланак Мый Израиль калыклан ойленам: тендан кокла гыч иктат вӱрым кочкышлан кучылтшаш огыл, тыгак тендан коклаште илыше йотъеҥат тидым ыштышаш огыл.13Израиль тукым еҥ але тендан коклаште илыше йотъеҥ кочкаш йӧрышӧ янлыкым але кайыкым сонарыште куча гын, тудын вӱржым чыла йоктарышаш да рок дене урышаш.14Вет кажне илышын чонжо – тудын вӱрыштыжӧ, вӱр – тудын илышыже. Садлан Мый Израиль калыклан каласенам: нимогай илышын вӱржым кочкышлан ида кучылт, вет кеч-могай илышын чонжо – тудын вӱрыштыжӧ. Вӱрым кочшо кажне еҥ кораҥдыме лийшаш.15Иктаж-кӧ – израиль тукым еҥ але йотъеҥ – колышо вольыкым але янлык кушкед пуштмо вольыкым кочкеш гын, вургемжым мушшаш да шкежат мушкылтшаш. Тыгай еҥ кас марте ару огыл, вара ару лиеш.16Тудо вургемжым ок муш да шкежат ок мушкылт гын, законым пудыртымылан титакан лиеш».
Institute for Bible Translation, Finland