Суд1
1Иисус колымеке, израиль эрге-влак Господь деч йодыныт: «Кӧмыт мемнан кокла гыч хананей-шамыч дене кредалаш икымше каят?»2Господь каласен: «Иуда тукым кая. Мый мландым тудын кидыш пуэм».3Иуда эрге-влак Симеон тукымысо иза-шольыштлан каласеныт: «Айста мемнан дене пырля, те мыланна хананей-шамыч деч мландынам поген налаш полшеда. А вара ме тендан мландыдам налаш полшена». Тыге Симеон тукым эрге-влак нунын дене пырля каеныт.4Иуда эрге-шамыч сар дене каеныт, да Господь хананей ден ферезей-влакым нунын кидыш пуэн. Везекыште нуно лу тӱжем еҥым пытареныт.5Тушто Адони-Везекым вашлийыныт, тудын дене кредалыныт да хананей ден ферезей-влакым кырен шалатеныт.6Адони-Везек куржын, но нуно тудым поктен каеныт да кученыт, кидысе да йолысо кугыварняжым пӱчкын ойыреныт.7Тунам Адони-Везек каласен: «Мый шымле кугыжан кидысе да йолысо кугыварняштым пӱчкынам, нуно ӱстелем йымалне кинде пудыргым погеныт. Кузе мый весе-шамыч дене ыштенам, Юмо мый денем тыгак ыштен». Адони-Везекым Иерусалимыш конденыт, да тушто тудо колен.8Иуда эрге-влак Иерусалим ваштареш кредалыныт да тудым сеҥен налыныт. Тушто илыше-шамычым керде дене пытареныт, а олам йӱлалтеныт.9Вара Иуда эрге-влак курыклаште, Кечывалвел мландыште да лоп верлаште илыше хананей-шамыч дене кредалаш каеныт.10Тидын деч вара нуно Хевронышто илыше хананей-шамыч ваштареш каеныт – Хевронын ончычсо лӱмжӧ Кириаф-Арба лийын – да [Енак тукым] Шешайым, Ахиманым да Фалмайым пуштыныт.11Тушечын нуно Давирыште илыше-влак ваштареш каеныт. Давирын ончычсо лӱмжӧ Кириаф-Сефер лийын.12Халев каласен: «Кӧ Кириаф-Сеферым сеҥен налеш, тудлан Ахса ӱдырем марлан пуэм».13Олам Гофониил, Халевын Кеназ шольыжын эргыже, сеҥен налын. Халев тудлан Ахса ӱдыржым марлан пуэн.14Ахсан каяш тарванымыж годым Гофониил тудым ачаж деч пасум йодаш туныктен. Кунам Ахса осёл ӱмбач волен, Халев тудын деч йодын: «Мом йоднет?»15Ахса вашештен: «Пӧлекым пуэн, мыйым суапландаре. Тый мылам Кечывалвел мландыште мландым пуэнат, пу мылам памаш-влакымат». Халев тудлан [йодмыж почеш] кӱшыл памашымат, ӱлыл памашымат пуэн.16[Иофорын,] Моисейын кеней калык гыч улшо оньыкугызажын, эргыже-влак Иудан калыкше дене пырля Пальме ола гыч Иуда тукымын ир мландышкыже, Арад дечын кечывалвелкыла, каеныт да тусо калык коклаште илаш тӱҥалыныт.17Вара Иуда тукым еҥ-влак Симеон тукым дене пырля Цефафыште илыше хананей-влак ӱмбаке каеныт да нуным кырен шалатеныт. А олам, Господьлан надыр шотеш пӧлеклен, пӱтынек пытареныт. Санденак тиде олам Хорма манын лӱмдаш тӱҥалыныт.18Иуда тыгак Газа, Аскалон, Екрон ола-влакым, [эше Азотым] да нунын йыр улшо верлам руалтен налын.19Господь Иуда эрге-влак пелен лийын. Нуно курыклам сеҥен налыныт, но лапверыште илыше-шамычым поктен колтен кертын огытыл – нуныжын кӱртньӧ дене чоткыдемдыме сарлык орвашт лийын.20Моисейын кӱштымыж семынак, Халевлан Хевроным пуэныт. [Тушто тудо Енак эрге-влакын кум олаштым шкаланже налын.] Тушечын тудо Енакын кум эргыжым поктен колтен.21Вениамин эрге-влак Иерусалимыште илыше иевусей-шамычым поктен колтен кертын огытыл. Иевусей-влак таче кечынат Вениамин эрге-шамыч дене пырля Иерусалимыште илат.22Иосиф эрге-влак Вефильым сеҥен налаш каеныт, Господь нунын пелен лийын.23Нуно Вефиль деке [миеныт да] олам ончаш еҥ-шамычым колтеныт. Тиде олан ончычсо лӱмжӧ Луз улмаш.24Ончаш мийыше-влак ола гыч лекше еҥым ужыныт, [тудым кученыт] да каласеныт: «Кузе мыланна олаш логалаш – ончыкто, тунам ме тыланет порым ыштена».25Тудо нунылан пураш лийме верым ончыктен. Иосиф эрге-влак олаште илыше-влакым керде дене пытареныт, а тиде еҥым да тудын уло родо-тукымжым колтеныт.26Тиде еҥ хеттей-влакын мландышкышт каен да тушан олам чоҥен, тудым Луз манын лӱмден. Таче кечынат олан лӱмжӧ тидак кодын.27Манассий эрге-влак Беф-Саным, [вес семынже Скифопольым,] Фаанахым, Дорым, Ивлеамым, Мегиддом да нунын йыр улшо илем-влакым сеҥен налын кертын огытыл. Хананей-шамыч тиде мландыштак кодыныт.28Кунам Израиль вийым поген, хананей-влак тудлан ӧкым пашам ыштен иленыт, но тиде мланде гыч нуным пӱтынек поктен колтен огыл.29Ефрем эрге-влакат Газерыште илыше хананей-шамычым поктен колтен кертын огытыл. Хананей-влак умбакыжат Газерыште Ефрем эрге-шамыч коклаште иленыт [да нунылан ӧкым пашам ыштеныт].30Завулон эрге-влакат Китронышто да Наглолышто илыше-шамычым поктен колтен огытыл. Хананей-влак нунын коклаште иленыт да нунылан ӧкым пашам ыштеныт.31Тыгак Асир эрге-влак Аккошто илыше-влакым, [нуно Асирлан ӧкым пашам ыштен иленыт, тыгак Дор,] Сидон, Ахлав, Ахзив, Хелва, Афек да Рехов олалаште илыше-шамычым поктен колтен огытыл.32Сандене Асир эрге-влак тудо мландысе хананей-шамыч коклаште иленыт, вет нуным тушеч поктен колтен огытыл.33Неффалим эрге-влакат Вефсамисыште да Беф-Анафыште илыше-шамычым поктен колтен огытыл да тусо хананей-влак коклаште иленыт. Вефсамисыште да Беф-Анафыште илыше-влак нунылан ӧкым пашам ыштеныт.34А Дан эрге-шамычым курыклаште аморрей-влак шыгыремдылыныт, нунылан лапверыш волаш пуэн огытыл.35Аморрей-шамыч Херес курыкышто, [туштыжо маска ден рывыж-влак иленыт,] тыгак Аиалонышто да Шаалвимыште илаш кодыныт. Иосиф эрге-шамычын аморрей-влакым сеҥымекышт, аморрей-влак нунылан ӧкым пашам ышташ тӱҥалыныт.36Аморрей-влакын мланде чекышт Акравим кӱкшака ден Села деч тӱҥалын да умбакыла шуйнен.
Institute for Bible Translation, Finland