Нав11
1Мо лийме нерген колмеке, Иавин, Асорын кугыжаже, Иовав деке, Мадонын кугыжаж деке, да Шимрон ден Ахсафын кугыжашт деке,2тыгак йӱдвел курыклаште, Киннерефын кечывалвел могырысо лапверыште, лопышто да касвелне, Нафоф-Дорышто, илыше кугыжа-влак деке,3эрвелне да теҥыз велне илыше хананей-влак деке, курыкышто илыше аморрей ден хеттей, ферезей ден иевусей-влак деке да Мицпа мландыште Ермон воктене илыше евей-влак деке тидын нерген увертараш колтен.4Нине кугыжа-влак теҥыз серысе ошма наре улшо сарзышт дене корныш лектыныт. Нунын имне ден сарлык орвашт пеш шуко лийын.5Израиль дене кредалаш манын, нуно иквереш погыненыт да Мером эҥер воктеке стан дене шогалыныт.6Но Господь Иисуслан каласен: «Нунын деч ит лӱд. Эрла тиде жапыште Мый [нуным] чылаштым израиль [эрге-влак] кидыш пуэм, да нуно пуштмо лийыт. Нунын имньыштын шӧныштым пӱчкеде, орваштым йӱлалте».7Иисус уло сарзывийже дене вучыдымын Мером эҥер деке толын лектын да ӱмбакышт кержалтын.8Господь нуным Израиль кидыш пуэн. Израильтян-влак нуным кырен шалатеныт да Кугу Сидон да Мисрефоф-Маим марте, эрвелыш Мицфэ лапвер деке шумеш поктен каеныт. Нунын кокла гыч нигӧ илыше кодын огыл, [нигӧ куржын утлен огыл].9Иисус нунын дене Господьын каласымыж семынак ыштен: имньыштын шӧныштым пӱчкеден, орваштым йӱлалтен.10Вара Иисус мӧҥгеш савырнен да Асорым руалтен налын, тудын кугыжажым керде дене пуштын. Тидын деч ончыч Асор моло кугыжаныш коклаште тӱҥлан шотлалтын.11Тушто илыше-влакым нуно керде дене пуштыныт, Господьлан надыр шотеш пӧлеклен, [чыла] пытареныт – ик илыше чонат кодын огыл, а Асорым Иисус йӱлалтен.12Чыла олам да нунын кугыжаштым Иисус сеҥен налын да, Господьын Моисей тарзыжын каласымыж семынак, Господьлан надыр шотеш пӧлеклен, керде дене пӱтынек пытарен.13Но кӱкшакалаште чоҥымо ола-влакым израильтян-шамыч йӱлалтен огытыл, Иисус ик Асорым гына йӱлалтен.14Олалаште мом поген налмым да [чыла] вольыкым израиль эрге-влак шкаланышт налыныт. Но еҥ-влакым чылаштым керде дене пытареныт: [нунын кокла гыч] илыше ик чонымат коден огытыл.15Мом Господь шке Моисей тарзыжлан кӱштен, тудымак Моисей Иисуслан кӱштен коден, а Иисус чылажымат тыгак ыштен: Господьын Моисейлан кӱштымыж гыч нимомат шуктыде коден огыл.16Тыге Иисус тиде мландым пӱтынек руалтен налын: курыклам, уло Кечывалвел мландым, пӱтынь Гесем кундемым, лопым, тӧрверым, Израиль курыкым, [курык воктенысе] лапверлам –17Сеир велыш шуйналтше Халак курык деч тӱҥалын, Ермон курык воктенысе Ливан лапверыште улшо Ваал-Гад марте сеҥен налын. Иисус нине мландын чыла кугыжажым руалтен кучен да пуштын.18Нине кугыжа дене Иисус кужу жап кредалын.19Евей-влакым – Гаваонышто илыше-шамычым – шотлаш огыл гын, израиль эрге-влак дене келшымаш ойпидышым ыштыше ик олат лийын огыл. Чыла олам израильтян-влак сеҥен налыныт.20Израиль дене кредалышт манын, Господь Шкежак нунын шӱмыштым вустыкым ыштен. Тыге нуно Господьлан надыр шотеш пӧлеклыме да пӱтынек пытарыме лийыныт, нунын дек нимогай чаманымаш лийын огыл. Господьын Моисейлан кӱштымыж семынак, нуно чылан пытеныт.21Тиде жапыштак Иисус курыкан вершӧрыштӧ – Хевронышто, Давирыште, Анавыште, Иуда ден Израильын курыклаштышт – [чыла] енак-влакым пытараш каен. Иисус нуным да олаштым, Господьлан надыр шотеш пӧлеклен, пӱтынек пытарен.22Израиль эрге-влакын мландыштышт ик енакат кодын огыл. Нуно Газаште, Гефыште да Азотышто веле кодыныт.23Тыге Иисус, Господьын Моисейлан каласымыж семынак, пӱтынь мландым сеҥен налын да тудым израильтян-влаклан тукымышт еда шеледен пуэн. Сар пытен, тыныс илыш тӱҥалын.
Institute for Bible Translation, Finland