Иер41
1Шымше тылзын Мицпаш Годолий деке, Ахикам эрге деке, Измаил – Нефанийын эргыже, Елишаман уныкаже – да тудын пелен лу еҥ, тыгак кугыжан тӧраже-влак толыныт. Измаил кугыжа тукым гыч лийын. Кунам нуно Мицпаште пырля кочкын шинченыт,2Нефаний эрге Измаил да тудын дене пырля улшо лу еҥ кынелыныт да Годолийым, Ахикам эргым, Шафанын уныкажым, керде дене шуралтен пуштыныт. Тыге нуно Вавилон кугыжан кундемтӧралан шогалтыме еҥжым пытареныт.3Вара Измаил Мицпаште Годолий дене пырля улшо Иуда эрге-влакым, тыгак тушто улшо халдей сарзе-шамычым пуштын.4Годолийым пуштмо вес кечынже, кунам тидын нерген эше нигӧ пален огыл,5Сихем, Силом да Самарий гыч кандашле еҥ толын. Нуно пондашыштым пӱчкыныт, вургемыштым кушкедыныт, капыштым коркаленыт улмаш. Нине еҥ-влак Господьын пӧртышкыжӧ кинде надыр ден ладыным конденыт.6Измаил, Нефаний эрге, Мицпа гыч ваштарешышт шортын лектын. Нунын дене ваш лиймеке каласен: «Годолий деке, Ахикам эрге деке, кайыза».7Нуно олашке пурен веле шуктеныт, Нефаний эрге Измаил шке еҥже-влак дене нуным шӱшкыл пуштын, а капыштым вӱд погымо вынемыш кудалтен.8Но нунын кокла гыч лу еҥ Измаиллан каласен: «Мемнам ит пушт! Мемнан пасушто шылтыме шыдаҥ, шож, олив ӱй да мӱйна уло». Нуным Измаил моло иза-шольышт дене пырля пуштын огыл.9Тиде вӱд погымо вынемже, кушко Измаил Годолийлан кӧра пуштмо еҥ-шамычын капыштым кудалтен, Аса кугыжан вынемже лийын, кудыжым Израильын Вааса кугыжаж деч аралалтмыж годым кӱнчен. Измаил, Нефаний эрге, тиде вынемым колышо-влакын капышт дене темен.10Мицпаште кодшо уло калыкым – кугыжан ӱдыр-шамыч ден Мицпаште улшо моло еҥым – Измаил руалтен кучен. Капорол вуйлатыше Навузардан нуным Годолийын, Ахикам эргын, кид йымакше пуэн улмаш. Нефаний эрге Измаил, нуным пленыш налмеке, аммон-влак деке наҥгаяш тарванен.11Кунам Иоханан, Карей эрге, да тудын дене пырля улшо сарзывуй-шамыч Измаилын, Нефаний эргын, тыгай осал пашам ыштымыж нерген пален налыныт,12нуно шке еҥыштым погеныт да Нефаний эрге Измаил ваштареш кредалаш каеныт. Тудым нуно Гаваонышто, Кугу пӱя дене, поктен шуыныт.13Карей эрге Иохананым да пеленже улшо сарзывуй-шамычым ужмеке, Измаилын руалтен налме еҥже-влак чот куаненыт.14Чыланат, кӧм Измаил Мицпаште руалтен кучен, мӧҥгеш савырненыт да Карей эрге Иоханан деке куржыныт.15А Измаил, Нефаний эрге, да тудын кандаш еҥже Иоханан деч куржыныт да аммон-шамыч деке каеныт.16Карей эрге Иоханан да тудын дене пырля улшо сарзывуй-влак Нефаний эрге Измаил кид гыч утарыме чыла еҥым – сарзе, ӱдырамаш, йоча да евнух-шамычым – пеленышт налыныт. Измаил нуным Ахикам эрге Годолийым пуштмыж деч вара Мицпа гыч конден улмаш. Иоханан нуным Гаваон гыч наҥгаен.17Халдей-влак деч Египетыш шылын куржаш манын, нуно корныш тарваненыт, кайышыштла Вифлеем воктенысе Химамыште канаш шогалыныт. Вет Нефаний эрге Измаил Вавилон кугыжан кундемтӧралан шогалтыме Ахикам эрге Годолийым пуштын, сандене нуно халдей-влак деч лӱдыныт.
Institute for Bible Translation, Finland