Ис38
1Тудо кечылаште Езекий колышаш гай черланен. Тудын дек пророк Исаий, Амос эрге, толын да каласен: «Тыге Господь ойла: пӧртет шотышто пытартыш кӱштымашым кодо – тый колет, от парем».2Тунам Езекий чурийжым пырдыж велыш савырен да Господьлан кумалын:3«О Господь, шарналте – мый Тыйын ончылнет ӱшанле лийынам, чын да шылталаш лийдымын иленам, Тылат келшыше паша-влакым ыштенам». Да Езекий чон йӧсыж дене шортын колтен.4Исаийлан Господь деч шомак лийын:5«Кай да Езекийлан каласе: ”Давид кугезе кочатын Господь Юмыжо тыге ойла: Мый тыйын кумалметым кольым, шинчавӱдетым ужым. Мый ӱмыретым латвич ийлан шуем.6Тыйым да тиде олам Ассирий кугыжан кидше деч утарем. Тиде олам Мый арален кодем”.7Господь каласыме шомакшым шукта манын, теве тылат Тудын деч палдарыше пале:8”Теве Мый кече деч вочшо ӱмылым, кудыжо Ахазын тошкалтышыж дене волен, лу тошкалтышлан мӧҥгеш кӱзыктем”». Тунам тошкалтыш дене волышо ӱмыл лу тошкалтышлан мӧҥгеш кӱзен.9Черланымыж деч вара пареммеке, Езекийын, Иуда кугыжан, кумалмыже:10«Шоналтышым мый: пел ӱмырым гына илымеке,мылам вес тӱнян капкаж гоч эрташ логалеш,мый кодшо илышаш ий-влак деч посна кодам.11Шоналтышым мый: ом уж тетла Господьым,илыше-шамычын мландыштышт Господьым ом уж!Ом уж тетла еҥ-влакым ты тӱняште.12Мыйын илемем рончен погат,кӱтӱчӧ омаш семын пӱтырат.Кузе куышо еҥ куэмым пӱтыра,туге мый шке илышем пӱтыралынам.Станокышто пӱчмӧ семын Тудо мыйым пӱчкын кудалта.Кечывалымат, йӱдымат Тый мыйым колымаш дек лишемдет!13Эр марте мый чытен вученам,а Тудо лу-влакем лев семын пудыртылеш.Кечывалымат, йӱдымат Тый мыйым колымашыш наҥгает!14Турня, вараксим семын йӱкым луктам,йӱкем кӧгӧрченын гай шып.Эре кавашке ончен, шинчамже ноен:”Йӧсӧ мыланем, Господь! Мылам полшо!”15Но мом мый каласен кертам?Мом Тудо каласен, тидымак ыштен.Чон ойгемлан кӧра кодшо илыш корнем нелын эрта.16О Господь! Тидын дене еҥ-влак илат,мыйынат илышем тыгаяк,но Тый мыйым паремдет, мыйым илышым кодет!17Тиде ойго мылам сайыш савырнен –йӧратымашет дене Тый чонемым колымаш вынем гыч луктынат,чыла сулыкем туп шеҥгекет кудалтенат.18Вет вес тӱня огыл Тыйым чапла,колымаш огыл Тыйым мокта,шӱгарыш вочшо-влак огыл Тыйын ӱшанле улметлан инанат.19Илыше, лач илыше Тыйым чапландара,лач тыге мый таче ыштем!Ача йочаж-влаклан Тыйын ӱшанле улмет нерген каласкала.20Господь мыйым утара!Господьын пӧртыштӧ ме илыме чыла кечыштынакылан семӱзгар йӱк почеш мурым мурена».21Исаий каласен: «Тек коштымо смоквам кондат да пуалын шӱймӧ верыш пыштат – тудо паремеш».22А Езекий йодын: «Господьын пӧртышкӧ эше каем манын, могай палдарыше пале лиеш?»
Institute for Bible Translation, Finland